Read bura-pabir Ibrani 7 Bible Online

Ibrani 7 - bura-pabir bible

Ibrani 7

¹Kamnyar Melkizedek ngəni ni an kuthlir Salem, tsuwa tsa an prist ar Hyel na Amta ta Shang. Sakatə Ibrahim akwa səha akwa mpa, aghəla tə tsa dlərəmta kuthlyayeri ka tsəgəi ɗa, antə da kəɓa ka Melkizedek. Antə Melkizedek ku vədza alari barka.

²Antə Ibrahim ku hamta alari zaka ar shanga su tə tsa kəgari. Ntangkəma karapur Melkizedek an “Kuthlir Jirkur.” Tsuwa tsa an kuthlir Salem, watau “Kuthlir Msərakur.”

³Melkizedek aɗi ka baba wala mama wa, wala dur wa. Tsa aɗi ka vir ya wala vir mtərni tsu wa. Tsa ndzi apa Ɓzər Hyel, ka ləkəma ndzi prist na ba saka madi.

⁴Wul giri jili olkur tə tsa kəgari! Har Ibrahim na kəkar mburu ku hamta alari zakar shanga su tə tsa wuta akwa mpa.

⁵Tsuwa tsawur Musa ku thlamta abbər shanga pristayeri na akwa nyarmbwar Lawi ata dlu zaka akəla mji, watau akəla maɗama' ɗa, wala tə da ka kəra ɗa ma da kəkar Ibrahim ni.

⁶Amma Melkizedek, na aɗi səɓəla akwa nyarmbwar mjir Lawi wa, ku dlu zaka akəla Ibrahim. Antə Melkizedek ku vədzə barka alari, tsa natə Hyel ku kurtə hara alari alkawalayeri.

⁷Jiri, aɗi sur beɗi wa, mdər vədzə barka aka mda, ku təramta mdər dlu barka.

⁸Pristayeri andər dlu zaka ar shanga su tə mji wuta. Amma shanga mji ana mta, tar Melkizedek shini, kamnyar kakaɗər Hyel pəla abbər arni tsa tsu ka mpika.

⁹Har ma mburu ata mzhi pəla abbər Lawi ka kərari, natə nyarmbwarni andər dlu zaka ni, ku hamta zakarni atar Ibrahim.

¹⁰Kamnyar sakatə Ibrahim kəɓa ka Melkizedek ni, mda aɗi yaɓəla Lawi katagu wa, tsa tsu akwa dza kəkarni.

¹¹Kamnyar ma har mda ata mzhi ndzi kəcəkəcari ndəlang akəma Hyel atar pristayeri na akwa nyarmbwar Lawi, kamnyar atar ni antə mdə vəi tsawu ni, kamnyar mə tə mda ata tur prist damwa ka tsa səɓəla apa Melkizedek, zum ta mdə na akwa nyarmbwar Haruna ri?

¹²Kamnyar ma mdə ku pali pristkur, ata ndzi dwali ka mdə pali tsawu ni tsuwa.

¹³Kamnyar mdə tə mdə gari suayeri ngəni ata kərari ni thlata akwa dur damwa, dur natə mda aɗi wala duku na ku ɗar hara kəthlər ar pristkur wa.

¹⁴Antə mburu ku sənda ata bəbal abbər Mthlakər mburu səɓəla akwa nyarmbwar Yahuda, tsuwa Musa aɗi ɗar kamnyari abbər pristayeri ata sə səɓəla akwa nyarmbwa ndaga wa.

¹⁵Antə su ngəni ku ndzi ata bəbal ka duna sakatə prist damwa səɓəla apa Melkizedek.

¹⁶Yesu ndzi prist ni aɗi atar nu tsawur nyarmbwa laga tə mda an ɗəmhə wa, amma atar dunar mpikə na akur wa.

¹⁷Kamnyar mdə ku hara seɗa ata kərari, abbər, “Ga an prist na ba saka madi apa jili ar Melkizedek.”

¹⁸Akwa laku laga, mdə ku vəi tsawu na waci athlimbəli, kamnyar tsa kula duna, tsuwa kula ampani.

¹⁹Kamnyar tsawur Musa ni aɗi mzhi namtə su ciɗəɗu wa. An su na hara tə mdə səɓəla ka laku damwa natə mburu ata mzhi mwari adzə Hyel akwa laku na kasəlari ni.

²⁰Tsuwa Hyel ɗəmhə laku ngəni bilən ni ka kahyel. Shanga pristayeri na akəmata tsa ni ləkwa kəthlər ni kula kahyel.

²¹Amma ar Yesu tsa dlu kəthlər ar pristkur ni ka kahyel akwa. Kamnyar Hyel pəla, “Mthlaku ku kurtə hara alkawal ka kahyel antə tsa aɗi ata shari alkawal ni wa, ‘Ga an prist na ba saka madi.’ ”

²²Atar tsawu ngəni antə Yesu ndzi mdə na ata nghyaɓəla alkawal ni na jirari.

²³Pristayeri na waci ni hang, kamnyar mta aɗi ana zhar ɗa ka da ləkəma ka kəthlərər ɗa wa.

²⁴Amma ar Yesu tsa prist na ba saka madi, kamnyar arni tsa ba saka madi.

²⁵Antə apani tsa ata mzhi mbantə mji na ata si adzə Hyel atar ni tədəku, kamnyar tə tsa ka mpika ba saka madi, ka tsa kiɗə su akəla Hyel kamnyar ɗa.

²⁶Kamnyar jiri kalkal ka mburu wutə jili prist apani, na ɓɗakkarkara, kula sur nggəla, kula biku, na aɗi ana paktə kər ka mjir biku wa, tsuwa natə mdə ku haptə səliyirni ta shang amtazi.

²⁷Tsa aɗi apa pristayeri na ol'ol nda wa. Kamnyar tsa aɗi ata tur ka tsa hamta saɗakayeri tədək viri wa. Kamnyar jili prist na ndagə ni ana hamta saɗaka kamnyar kəcə bikərni ntangkəma, kambəla tsa hamta kamnyar kəcə bikər mjirni. Amma ar Yesu tsa hamta saɗaka ka duku daci, sakatə tsa hamta kərni ni.

²⁸Kamnyar akwa tsawur Musa mda ata carɓəla pristayeri na ol'ola akwa nca mji na kətəikətəyari. Amma aghəla tsawu ndaga antə Hyel vətə Ɓzərni atar alkawal na ka kahyel, antə Ɓzərni ku ndzi Prist na nghyinghyari ciɗəɗu ba saka madi.