Read bura-pabir Ibrani 8 Bible Online

Ibrani 8 - bura-pabir bible

Ibrani 8

¹Su tə I akwa bara pəlari ni an apani, mburu ka Prist laga na Ola, na andzəndzi abwa mazəma dəkəl kuthlikur ar Mdə na olta Shang akwar amtazi.

²Prist ngəni ol ni akwa hara kəthlərərni akwa vəi na Ɓɗakkarkara ta Shang, akwa tent na jirari, natə Mthlaku ka kərari surni an namta, aɗi mdə wa.

³Kamnyar mda ana vəi prist ni dzak kamnyar hamta cautayeri kəga saɗakayeri. Antə ku ndzi dwali aka prist ngəni tsuwa ka tsa wutə su tə tsa ata hamtari.

⁴Ma tsa an akwa duniya, tsa aɗi ata ndzi prist wala raka wa, təng tə pristayeri aɗi na akwa hamta cauta kalkal apatə tsawu ku thlamta ni.

⁵Kamnyar pristayeri ngəni ana hara kəthlər akwa Vəi na Ɓɗakkarkara, na ndzi apa shanggura Vəi na Ɓɗakkarkara na amtazi ni. Kamnyar sakatə Musa akwa bara nci tent ni, Hyel tsawa alari abbər, “Ka gə wuta abbər ga ku namtə shanga su akwa dludzər su tə mdə ncanta ala ga ata kəra gar nda.”

⁶Amma kulini mdə ku hamta kəthlər na təramta na waci nda ka daraja ciju, apatə alkawal tə tsa akwa mwa kəgari akwa daɓwa mburu ni an ɓɗakari. Kamnyar mdə hara ngəni ata kəra alkawalayeri na ɓɗakari.

⁷Kamnyar ma alkawal na ntangkəma an ku ndzi kalkal, sakani mda aɗi ata tur alkawal na suɗkur wa.

⁸Amma Hyel ku wutə vəi shar mjirni antə tsa pəla, “Saka akwa si, ndə Mthlaku, tə I ata sə hara alkawal bilən ka mjir Israila ka mjir Yahudi.

⁹Aɗi ata ndzi apa alkawal natə I hara ka kəkayeri arɗa, vir tə I tamtə ɗa ka tsi ka səɓəla ka da akwa tsəɗi Masar ni wa. Kamnyar tə da aɗi kəsi alkawalərna ka jirkur wa, antə I ku shinadzə bwahili ala ɗa.

¹⁰Amma ngəni an alkawal tə I ata sə harari ka mjir Israila akwa virayeri na ata si, ndə Mthlaku I ata pu tsawayeri arna akwa kəra ɗa, kəi rəbutə ɗa ata ɗəffa ɗa. I ata ndzi Hyel arɗa, antə da ata ndzi mjirna.

¹¹Antə da aɗi ata tur ka mdə thlipa aka nvwani wa, wala ka mdə laga pəla aka ɓzərma'ni abbər ‘Ka gə səndə Mthlaku abbər tsa an Hyel’ wa, kamnyar shanga mji ata sə səndə ra, baɗitə ka na ntsahari har ka na olari.

¹²I ata tifəmta ala ɗa bikər ɗa, tsuwa I aɗi ata ɗangtə bikər ɗa kəra wa.”

¹³Akwa gariyirni ata kəra alkawal bilən ni, Hyel ku ncanta abbər alkawal na ntangkəma ni ku kurtə hali. Tsuwa kəlara su tə sakarni ku təramta, aɗi ata fəi wa tsa ata sha.