Read bura-pabir Ibrani 9 Bible Online

Ibrani 9 - bura-pabir bible

Ibrani 9

¹Wala alkawal na ntangkəma nda, tsa ka tsawayeri kamnyar vəngkər səli, ka vəi vəngkər səli akwa duniya ni.

²Kamnyar mdə namtə tent ni ka kutari suɗa, bwa na aɓəlaɓəla ni ka zwalər putə pitəlayeri, ka tebər, ka buradi tə mdə hamta aka Hyel. Antə mda ana kəga vəi ni Vəi na Ɓɗakkarkara.

³Tsuwa aghəla lapəli na suɗkur ni, vəi damwa aɗi tə mda ana pəla, Vəi na Ɓɗakkarkara Ta Shang.

⁴Bwa ngəni ni ka bagaɗi ar dinar kamnyar mba sur shiwur na msəra, ka Akwatiyir Alkawal. Shanga suayeri ngəni suɗə ni mdə fəi shanga dza ɗa ka dinar. Akwa Akwati ni tsuwa tughum laga tə mdə nam ka dinar, na ka manna, ka zwalər Haruna na ku ɗəɗa thlali nda, ka pelayeri na suɗa na ka tsawayeri ata ni.

⁵Tsuwa ata kəra akwati ni an kerubayeri na ka səli, na pəbələmta ɓəɓəka ɗa akwa hamta shanggur aka kujarar kətadzə ni. Amma suayeri ngəni mda amzhi ngkərɓəla ɗa pal pal kulini wa.

⁶Aghəla tə mdə ku ɗəmhə shanga su apani ni, antə pristayeri ata ləkəma ka mwari akwa kuta tent na aɓəlaɓəla ni tədək viri kamnyar hara kəthlərər ɗa.

⁷Amma akwa kuta tent na suɗkur ni, tar prist na ola daci andər ləkwari, tsuwa ka duku akwa məva. Tsuwa tsa aɗi ana ləmbwa wa, tar ma tsa ka mamshi akəlari tə tsa ata hamta aka Hyel, kamnyar kəcə bikərni ka kəcə bikər mjirni na ku hara biku kula səndər ɗa.

⁸Atar ngəni Mambəl na Ɓɗakkarkara ni akwa ncanta abbər lakur mwari akwa Vəi na Ɓɗakkarkara ni tsu harharari, təng tə kutari na aɓəlaɓəla ni tsu aɗi ni.

⁹Ngəni an karapu ata kəra zaman ngəni. Tsa akwa ncanta abbər cautayeri ka saɗakayeri ar mwaɓi tə mda ana hamta aka Hyel ni amzhi kəcimta ɗəffa mjir vəngkər səli ni wa.

¹⁰Kamnyar tsawayeri ngəni akwa kəthlər ata kəra susəma, ka sur sa, ka thlahalayeri, kəga tsawayeri na ar kəcimtadzi abwar dza daci, har ka vədza aka sakatə Hyel ata sə namtə tsawu na bilənari.

¹¹Amma Kristi ku kurtə si ka ndzi Prist na olta shang ar suayeri na ɓɗakɓɗaku tə mburu kəgari kulini. Tsa ləkwa tent na olta shang, ka na ɓɗakta shang amtazi, natə aɗi mda an nam ka tsi wa, tsuwa aɗi ar duniya ngəni wa.

¹²Tsa ləkwa vəi na Ɓɗakkarkara Ta Shang ni ka duku daci. Tsuwa tsa aɗi ləkwa ka mamshir kwiyayeri kəga gyalayeri wa, amma ka mamshir kərari surni, ka wuta ala mburu mbantədzi na akur wa.

¹³Kamnyar ma har mdə na aɗi kəcəkəcari wa, an ata pshingkər mamshir kwiyayeri ka gyalayeri, ka kuktəngkər pənju na ar kənayeri ka kəcimta mda abwar dza,

¹⁴to, man tə mda ata pəlari ata kəra mamshir Kristi ri? Ai mamshir ni ata kəcimta dzamər mburu, ka mburu zhar hara suayeri na kula ampani ni, kamnyar ka mburu vəngkər səli aka Hyel na ka mpika. Kamnyar arni tsa aɗi ka manjivar wa, tsuwa tsa ku hamta kərni aka Hyel atar Mambəl na ba saka madə ni.

¹⁵Antə apani Kristi an mdər nam daɓwa mburu ka Hyel akwa sakar alkawal ngəni bilən ni, kamnyar ka mji tə mdə ku kəga ɗa ni, sə dlu kifa na ba saka madi tə Hyel hara alkawalari ni. Tsuwa ngəni ata mzhi hara, kamnyar tə Kristi ku kurtə mti kamnyar msərantə mji ta biku tə da hara akwa sakar alkawal na ntangkəma nda.

¹⁶Kamnyar ma mdə ku hara alkawal ar hamta kifərni, tar ka mdə na hara alkawal ni mtə katagu.

¹⁷Kamnyar alkawal ar fa kifa aɗi ka duna wa, ma har mdə na hara alkawal ni tsu aɗi ka mpika. Amma tar aghəla tə mdə ni ku mti antə alkawal ni ata ndzi ka duna.

¹⁸An su na hara tə alkawal na ntangkəma nda aɗi ndzi ka duna wa, tar ma mdə pumta mamshi ni.

¹⁹Kamnyar aghəla tə Musa ku karatəmta shanga tsawayeri ni aka shanga mji, antə tsa ata kətə mamshir gyalayeri ka kwiyayeri, ka gwartə ka yimi. Antə tsa kətə soso ar izob ata kəma duku ka shishi na mamza ar təma, ka pshingkər mamshi ni ata kəra kakaɗər Tsawa ka shanga mji.

²⁰Antə tsa pəla, “Ngəni an mamshir alkawal natə Hyel tsawa ala giri ka giri ɓəlata.”

²¹Tsu apani tsuwa antə Musa ku pshingkər mamshi ata kəra mbwar tent ka ata kəra shanga kariyayeri na akwa mbwar vəngkər səli ni.

²²Jiri akwa sakar tsawu ni abaka shanga mda ana kəcimta ni ka mamshi. Kamnyar ma atar pumta mamshi wa, laku aɗi tə mda ata mzhi tifəmta biku aka mdə wa.

²³An su na hara tə ndzi dwali ka mdə namtə shanga suayeri na ndzi apa shanggura suayeri na amtazi ni ka da ndzi kəcəkəcari akwa laku ngənda ni. Amma ar suayeri na amtazi ni, da akwa tur saɗaka na ku təramta ngəni ka ɓɗakkur.

²⁴Kamnyar Kristi aɗi ləkwa vəi na Ɓɗakkarkara natə mda an nam ka tsi wa, na shanggura na jirari ni wa. Awa, vəi na amtazi ka kərari, antə tsa ləkwa, kamnyar ka tsa ndzi akəma Hyel ata vəya mburu.

²⁵Tsuwa Kristi aɗi ata tur ka tsa jaktə hamta kərni tədəku apatə Prist na ola ana ləkwa Vəi na Ɓɗakkarkara ta Shang tədək məva ka mamshir mwaɓi ni wa.

²⁶Kamnyar ma ku ndzi apani, tar ka tsa ɗar bwani tədəku təng akwa baɗitər duniya. Amma təng tsa səɓəla ka duku daci akwa kurər zaman ngəni kamnyar ka tsa kələmta biku atar hamta kərni saɗaka.

²⁷Tsuwa tsu apatə mdə ku thlamta aka mji abbər ka da mtə ka pal daci, aghəla nda tar shariya ni,

²⁸tsu apani tsuwa Kristi ku hamta kərni saɗaka ka duku daci kamnyar kələmta bikayeri ar mji hang. Tsuwa tsa ata jaktə si, si na suɗkur, aɗi kamnyar ka tsa kələmta biku wa, amma kamnyar ka tsa mbantə mji na akwa sək səyirni ni ka kucali abbər ka tsa mbantə ɗa ni.