Read bura-pabir Yakub 2 Bible Online

Yakub 2 - bura-pabir bible

Yakub 2

¹Maɗama'na, giri aɗiya nca zumzumkur akwa daɓwa giri wa, təng tə giri ku hamta jiri aka Mthlakər mburu Yesu Kristi, na Mthlakər səli ni.

²Kamnyar ma mdə laga na ka lenduwar dinar ata tsiyari ka ləptu na ɓɗaku si akwa tsaptədzər giri, antə mdər tur laga na ka dasa si tsuwa,

³giri ata hir nar daraja aka mdə na ka ləptərni ɓɗaku ni, atar pəla alari, “Asəra kara ndzəndzi azi ata vəi na ɓɗaku ni,” ka giri pəla aka mdər tur ni abbər, “Thləthlatə anda,” wala tsuwa “Ndzəndzi ata di.”

⁴Ai giri akwa nca zumzumkur aka nvwa giri, tə giri akwa hara shariya akwa dzam na ɗimi.

⁵Psi giri thləma giri maɗama'na natə I hirhira! Hyel aɗi carɓəla mjir tursu na abwar duniya ni abbər ka da an ndzi mjir gəna akwa hamta jiri, ka ndzi mjir fa kifər kuthlikur tə tsa hara alkawalari aka mji na hir nə wa ya?

⁶Amma giri ana rutə mdə na ngguɗi! Aɗi mjir gəna andər hara bwani ala giri nə wa ya? Aɗi da andər mwantə giri akwa shariya nə wa ya?

⁷Aɗi da andər mnya ɗimi ata kəra thləm na ɓɗaku tə mdə kəga giri kəgari nə wa ya?

⁸Jiri ata hara ɓɗaku ma giri akwa ɓəla tsawur kuthlikurər Hyel apatə kakaɗər Hyel ku pəla, “Ka gə hir ntəwulər nga apatə gə hir kər nga” ni.

⁹Amma ma giri akwa nca zumzumkur, to giri akwa hara biku, antə tsawu ku ngkəi giri ka biku.

¹⁰Kamnyar kəlara mdə na akwa ɓəlatə shanga tsawayeri ni, ma tsa ku ɓəli pal akwa nca ɗa, tsa ku ndzi mdər biku akwa shanga ɗa.

¹¹Kamnyar tsu tsa na pəla, “Ga aɗiya ləkə wa” ni, an pəla, “Ga aɗiya tsi mdə wa” ni. Antə ma ga aɗi ləkə wa, amma ga ku tsi mda, to, ga ku ndzi mdər ɓəli tsawu ni.

¹²Antə apani ka gari ka hara kəthlərər giri akwa laku na ata ncanta abbər giri an mji tə mda ata hara ala giri shariya na ka msərmsərkur.

¹³Kamnyar akwa shariya, Hyel aɗi ata sə kətadzə mji na kula kətadzə mdə wa. Amma wala akwa shariya Hyel ata kətadzə mda.

¹⁴Maɗama'na, ma mdə pəla abbər tsa ka hamta jiri, amma tsa aɗi akwa kəthlər kəgari wa, man ampaniyari ri? Hamta jirərni ni ata mzhi mbantə ni nggye?

¹⁵Ma gə wutə ɓzərma nga wala ngkwarma' ngə laga kula ləptu, akwa tur susəmər ɓukci,

¹⁶antə gə pəla alari, “Ka Hyel na gə sa'a, ka tsa na gə susəma ka ləptu,” kula gə hamta alari su tə dzari akwa turari. To, jili ngəni man ampaniyari ri?

¹⁷Tsu apani tsuwa antə hamta jiri shini, ma aɗi ka kəthlərari wa, tsa aɗi ka ampani wa.

¹⁸Nuhum mdə laga asə pəla, “Ai mdə laga ata mzhi ndzi ka hamta jiri, ka nvwani ndzi ka kəthlərari.” Amma I akwa pəla, “Apa madi tə ga ata mzhi ncaɓəla ali abbər gə ka hamta jiri kula kəthlərari nə ri? Arna I ata ncanta ala gə hamta jirərna japu ka kəthlərari.”

¹⁹Ga ku hamta jiri abbər Hyel an duku. Ɓɗak laga! Ai wala shatanayeri ku hamta jiri apani, har ka yakata kamnyar thlivəra.

²⁰Gə caku ya, tə har ga akwa bara ka mdə ncaɓəla ala ga abbər hamta jiri kula kəthlərari an kula ampani ni?

²¹Sakatə Ibrahim na kəkar mburu hamta ɓzərni Ishaku ata bagaɗi ar hamta saɗaka ni, aɗi kəthlərərni an namtə ni tə tsa ndzi ka jirkur akəma Hyel nə wa ya?

²²To, giri akwa wul laku tə hamta jirərni ka kəthlərərni hara kəthlər ata kəma duku. Kəthlərərni ku hara tə hamta jirərni ndzi nghyinghyari.

²³Apani mdə ku nghyaɓəla su tə kakaɗər Hyel pəla abbər, “Ibrahim ku hamta jiri aka Hyel, antə Hyel wuta abbər hamta jirərni ni ku namtə ni kalkal akəma Hyel.” Kamnyar ngəni antə mdə pəla Ibrahim pazhir Hyel ni.

²⁴Kulini giri ata mzhi wuta abbər mda ata mzhi ndzi ka jirkur akəma Hyel atar kəthlərərni, amma aɗi atar hamta jiri shini wa.

²⁵Tsu an jili su tə Rahab na karwa ni hara. Atar kəthlərərni antə tsa ndzi ka jirkur akəma Hyel, akwa sakatə tsa ɗuwamta mjir wul ashira tsəɗi nda, ka pwarɓəla ɗa lapiya ata laku damwa ni.

²⁶Kamnyar tsu apatə dza na kula mambəl an mtəmtari ni, antə hamta jiri na kula kəthlərari an mtəmtari.