Read bura-pabir Yakub 3 Bible Online

Yakub 3 - bura-pabir bible

Yakub 3

¹Maɗaməma, ka hang akwa nca giri ndzi mjir thlipa aka mdə wa. Kamnyar giri ku sənda abbər yeru na ana thlipa aka mji ni, mda ata sə hara ala yeru shariya na mwavərari.

²Kamnyar shanga mburu ana kəɗar sha. Kamnyar ma yeru an ata mzhi ngkəngkahə mnya yeru, yeru ata ndzi mji na kalkalari, har ka yeru mzhi ɓəlatə kər yeru akwa kəlara bwa.

³Mburu ana pu linjam akwa mnya taku kamnyar ka tsa kələngkər ala mburu, har ka mburu mzhi mwantə ni akwa kəlara vəi tə mburu hira.

⁴Wul giri sharayeri na ana mwa ata kəra yimi bu! Wala tə da ol'ol ni, shambar na ka duna ata tər ɗa. Antə tsuwa sur nggur shar na raka ata mzhi shinar ɗa ka mwantə ɗa akwa bwa tə mdər nggur shar ni hira.

⁵Kenggyar ni tsu apani. Wala tə tsa an tingnga akwa bwayeri ar dza ni, tsa ana gaya ata kəra suayeri na ol'ola. Wul giri laku tə u'u na raka ana mzhi mbamta mtaku ka tsa ndzi hayang ni bu!

⁶Kyanggyara mdə ndzi tsu apa u'u ni. Akwa nca bwayeri ar dza mburu, tsa an duniyar ɗimikur ni! Tsa ana diɓərantə shanga dza mda, ka psətə shanga ndzəndziyir mda ata u'u. Tsuwa arni kəyir u'u an akwa ha kər alari.

⁷Kamnyar kəlara jili mwaɓi, wala ɗika, ka suayeri na ana mwa ka yimər kuta ɗa, ka suayeri na ana ndzi akwa yimi, mda ana mzhi ɗiɓəla ɗa.

⁸Amma mda aɗi na amzhi ɗiɓəla kyanggyar wa. Tsa an shatan na ana ghər wa, nghyinghyari ka gwar ar tsi mda.

⁹Ka tsa antə mburu ana hu Mthlaku na Tədda, tsuwa tsu ka tsa antə mburu ana nggəl mji, natə Hyel namtə ɗa akwa dludzərni.

¹⁰Tsu akwa mnya duku antə huwa ka nggəla ana səɓəla. Maɗama'na, aɗi kalkal ka su ngəni ndzi apani wa.

¹¹Yimi na msəra ka na ɗəɗahu ana səɓəla akwa kucirkila duku ya?

¹²Maɗama'na, kamnda amzhi ya shika ya, nənga ntursha ata mzhi ya kamndə ri? Laku aɗi tə jiɓər yimi na məmashu ata mzhi hamta yimi na msəra wa.

¹³Wan ɗəɗu na amzhi nggaɓəla su akwa nca giri ri? Ma aɗi ka tsa ncanta atar ndzəndziyirni ka ndzi ka daraja, ka tsa hara kəthlərərni ka jili tərghəikər na thlata akəla ɗəɗukur.

¹⁴Amma ma ɗəffa giri akwa mba giri kamnyar jili ɗimikur səlka ka hirkər tə giri kəgari, to, giri aɗiya hartə jirkur atar gaya ka thlandər nə wa.

¹⁵Kamnyar jili ɗəɗukur ngəni aɗi thlata amtazi wa, amma tsa ar duniya, kula mambəla, ncir shatankur daci.

¹⁶Kamnyar kəlara vəi tə səlka ka hirkər aɗi ata, mda ata wutə ləkji ka shanga jili kəmanggarkur anda.

¹⁷Amma ɗəɗukur na thlata amtazi an namtə mburu ka mburu ndzi kəcəkəcari. Tsuwa tsa ana namtə mburu ka mburu ndzi ka hangkal, ka kanaɗikur, ka kətadza na nghyinghyari, akwa hara ɓɗakkur aka mji tədəku. Tsa aɗi ana nca zumzumkur wa, wala hara shimnyakur wa.

¹⁸Tsuwa mda ana wutə yar nfwa na ar jirkur ni akəla mjir msərakur na ana thləka hwulfər msərakur ni.