Read bura-pabir Yakub 4 Bible Online

Yakub 4 - bura-pabir bible

Yakub 4

¹Mi andər səntə mpa kəga beɗi akwa nca giri nə ri? Aɗi nggukər bara msərakur an akwa ɓuji akwa ɗəffa giri wa ya?

²Giri ana nggukə su, amma giri aɗi ana wutə wa, antə giri ata tsi mda. Giri ana səlkər su tə mji kəgari, amma giri aɗi ana wutə wa, antə giri ana beɗi ka pthlu mpa kamnyar ka giri dlutsa. Giri aɗi ana wutə su tə giri ana barari nə wa, kamnyar giri aɗi ana kiɗa akəla Hyel wa.

³Tsuwa wala ma giri an hara adduwa kamnyari, Hyel aɗi ana nggatə adduwar giri nə wa, kamnyar giri ana bara su ni kamnyar msərakur kəra giri daci.

⁴Giri mji na kula jirkur! Giri aɗi sənda abbər pazhikur ka duniya an dawakur ka Hyel wa ya? Kamnyar kəlara mdə na akwa bara ka tsa ndzi pazhir duniya ni, tsa akwa namtə kərari dawar Hyel.

⁵Nənga giri akwa tamatə su tə kakaɗər Hyel pəla ni ata ndzi gapani ri, sakatə tsa pəla, “Hyel nghyinghyari ka jili səlkə na ar hirkur[1] ata kəra mambəl natə tsa vu akwa dza mburu” ni?

⁶Amma Hyel akwa jakjakə hara ala mburu ɓɗakkur na hang ka duna, apatə kakaɗu ku pəla an su na hara tə tsa pəla akwa kakaɗərni abbər, “Hyel ana nggəlar mji na ka kər olkur, amma tsa ana hir mji na ka tərghəikər.”

⁷Antə apani ka giri hamta kəra giri aka Hyel. Ka giri ngkatə laku aka Shatan antə tsa ata hwi kazhar giri.

⁸Ka giri shahədzi adzə Hyel, antə tsa ata sə shahədzi adzə giri. Kəcimta giri tsiya giri, giri na mjir biku, ka giri namtə surharar giri ka tsa ndzi kəcəkəcari, giri na ka hangkala giri suɗsuɗə ni.

⁹Ka ɗəffa giri ndzi ka ɗəffə ɓzəɓza, ka giri tuwa ka shimwi. Zhar ka kumshir giri shin ka tuwa, ka kucalər giri tsuwa shin ka ɗəffə ɓzəɓza.

¹⁰Ka giri tərghəi kəra giri akəma Mthlaku, antə tsa ata haptə giri.

¹¹Maɗaməma, giri aɗiya mnya ɗimi ata kəra nvwa giri wa. Apani kəlara mdə na ku mnya ɗimi ata kəra ɓzərma'ni, wala hara shariya alari, tsa akwa nggəl tsawur Hyel, akwa ngka vəi shar tsawu ni. Antə ma ga akwa nggəl tsawu ni, ata ndzi abbər ga aɗi mdər ɓəla tsawu nə wa, amma mdər kyar tsawu ni.

¹²Hyel duku shini andər hamta shariya, tsuwa tsa duku andər thlamta shariya. Tsa shini an ka dunar mbantə mpika mda, wala tsi mda. Amma ar nga, ga an wa ri, har tə ga ata hara shariya aka mdə ni?

¹³Psi gir thləma giri, giri na ana pəla abbər, “Ashina wala ɗəpa yeru ata mwari akwa di laga, ka yeru ndzi anda mnyar məva pal, ka yeru fəli ka wutə kwaba hang.”

¹⁴Amma giri aɗi sənda ata kəra su na ata mzhi hara ɗəpa wa! Shang kwang mpika giri ni mə laga ri? Ai tsa ndzi apa ɗuza na ana səɓəla mnyar saka laga raka daci, ka tsa jaktə wuyamtadzi.

¹⁵Ai kalkal ka giri pəla abbər, “Ma Mthlaku ku hira, tə yeru tsu ka mpika, yeru ata hara ngəni wala na ndaga.”

¹⁶Amma kulini ni, giri akwa gaya ka karidzi. Ai shanga jili karidzi ngəni aɗi ɓɗaku wa.

¹⁷Apani kəlara mdə na ku səndə su na kalkal tə ka tsa hara, antə tsa zhar harari, to tsa ku hara biku.