Read bura-pabir Yakub 5 Bible Online

Yakub 5 - bura-pabir bible

Yakub 5

¹Psi gir thləma giri, giri na ka gəna! Tuwa giri ka kuraku kamnyar jili bwaniyayeri na akwa si ata kəra giri!

²Gənar giri ku hiɗamtadzi, tsuwa ləma ku kwasəmnya ləptayeri ar giri.

³Dinar kəga adzərfa ar giri shang ku hara zəmərvəya, tsuwa zəmərvəya na hilantə ɗa ni ku ndzi seɗa ata kəra giri, giri akwa karidzi kəgari ni ata sə səməmnya dza giri apa u'u. Giri ku tsaptə gəna aka kəra giri akwa virayeri ngəni, na akwa kurər duniya ni.

⁴Wul giri ja, kwabar mji na kəthlər ala giri akwa fakər giri tə giri ngkata ala ɗa ni akwa tuwa ka thləma giri, tsuwa tuwar mji na hara kəthlər akwa fakər giri ni ku mzhita akəma Mthlakər mji dlama dlama.

⁵Giri ku ndzi akwa ngga msəra akwa duniya, akwa səm ka sa apatə giri hira. Apani giri ku təksantə kər giri apa gyal na ka sakarni tə mda akwa mwantari akwa vəi thla wulyari.

⁶Giri ku hara shariya aka mjir jirkur ka tsi ɗa, amma da aɗi dawar giri wa.

⁷Apani maɗaməma, ka giri mbwi ɗəffa giri, har ka giri vədza aka vir səyir Mthlaku. Wul giri jili mbwiɗəffu tə mdər fakəu ana hara akwa sakatə tsa akwa sək ka sur fakərni hara ɓɗaku ni bu. Tsa ana mbwi ɗəffari ka tsa sək yimər thləka, aghəla nda tsuwa ka tsa sək yimi na aghəl ta shang.

⁸Apani wala giri ma, tar ka giri mbwi ɗəffa giri, ka giri ntsətədzi, kamnyar sakar səyir Mthlaku ku hara kudzəhu.

⁹Maɗaməma, giri aɗiya nggungguni ata kəra nvwa giri wa, ta mda sə hara ala giri shariya. Nggədza mdər hara shariya ni abaka si, har ma tsa anyarmbwa.

¹⁰Maɗaməma, ka giri thlipə surharar naɓiyayeri na gari ala giri akwa thləma Mthlaku ni. Ka giri mbwi ɗəffa giri tsu apa da, ka nggitə kəlara bwani na ata wutə giri.

¹¹Kamnyar mburu ana pəla aka mji na ku nggitə su abbər arɗa msəra ala ɗa. Ai giri ku nggata ata kəra mbwiɗəffər Ayuba, tsuwa giri asəndə su tə Mthlaku sə hamta alari aghəla bwaniyayeri ni shang. Kamnyar Mthlaku an nghyinghyari ka kətadza, tsuwa tsa hir dlar mda.

¹²Amma na olta shang, maɗama'na, giri aɗiya kahyel wala raka ma giri akwa hara alkawal wa. Giri aɗiya kahyel ka vəi na amtazi wa, wala ka duniya wa, wala ka su damwa wa. Amma ka giri pəla, “I” daci, ma su na akwa ɗəffa giri ni an “I”, wala tsuwa ka giri pəla, “Awa” daci, ma su na akwa ɗəffa giri ni an “Awa”, ta giri asə hara biku ka ləkwa shariyar Hyel.

¹³Mda aɗi akwa nca giri na akwa ɗar bwani ya? Ka tsa hara adduwa. Mda aɗi na ka kucali ya? Ka tsa hara har huwa.

¹⁴Mda aɗi na nggawa akwa nca giri ya? Ka tsa kəga mji na ol'ola ar ikələziya, kamnyar ka da hara adduwa ata kərari, ka kəkərtə ni ka mal akwa thləma Mthlaku.

¹⁵Jili adduwa ngəni tə mdə hara ka hamta jiri ni ata mbantə mdə na nggawa, antə Mthlaku ata thlentə ni lapiya. Tsuwa wala ma tsa an ku hara bikayeri laga, mda ata tifəmta alari.

¹⁶Kamnyar ngəni ka giri pəlaɓəla bikayeri ar giri aka nvwa giri, ka hara adduwa ata kəra nvwa giri, kamnyar ka giri wutə mbantədzi. Adduwar mdə na ka jirkur ana kəthlər ka duna swaiswai.

¹⁷Iliya an mdə tsu apa mburu. Sakatə tsa hara adduwa ka jirkur abbər yimi aɗiya tər wa ni, mdə ku hara məva makər ka thliya ngkwa kula yimi təra.

¹⁸Aghəla nda antə tsa jaktə hara adduwa ka damwa, antə vəi na amtazi ku jaktə hamta yimi, tə su ptsəptsa ku ptsi, ka ya munya.

¹⁹Maɗaməma, ma mdə laga akwa nca giri ku pəra kazhar lakur jirkur, antə mdə laga jaktə ngka ka tsa,

²⁰ka tsa sənda abbər kəlara mdə na ku ngka ka mdər biku akwa laku, tsa ku mbantə mpika mdər biku ni, tsuwa ngəni ata hara ka mdə tifəmta bikayeri hang.