Read bura-pabir 1 Bitrəs 1 Bible Online

1 Bitrəs 1 - bura-pabir bible

1 Bitrəs 1

¹I na Bitrəs na aposəl ar Yesu Kristi an akwa rəbutə wasika ngəni ala giri na titiləmtadzi apa mətəpiyayeri ahar Pontiyus, ka Galatiya, ka Kappadokiya, ka Asiya, ka Bithliniya.

²Hyel na Tədda an carɓəla giri apatə tsa ɗəmha təng ɗəm, ka namtə giri tə giri ndzi kəcəkəcari abwar Mambələrni. Atar ngəni antə giri ata kələngkər aka Yesu Kristi ka namtədzi kəcəkəcari ndəlang atar mamshirni. Ka Hyel ləkəma akwa hara ala giri ɓɗakkur ka na giri msərakur hang.

³Ka shanga huwa ndzi aka Hyel na Təddar Mthlakər mburu Yesu Kristi! Kamnyar atar kətadzərni na ola, antə mburu wutə mpikə bilən. Antə kulini mburu ka sur vəkər na ka mpika atar thlatər Yesu Kristi akwa mtəmta.

⁴Antə apani mburu ata sə fa jili kifə laga na ahiɗa wa, ahilantədzi wa, tsuwa ba saka madi asha wa, natə Hyel ɗəmha amtazi aka mjirni.

⁵Tsuwa atar hamta jirər giri, Hyel akwa ɓəlatə giri ka dunar kuthlikurərni, har ka vədza aka sakatə giri ata sə dlu mbantədzi ngəni akwa kurər duniya ni.

⁶Ka giri hara kucali ata kəra ngəni, wala tə ata ndzi dwali ka giri ɗar bwaniyayeri zumzum mnyar saka laga na raka

⁷na kamnyar ngkərtə jirkur ar hamta jirər giri ni. Akwa u'u antə mda ana ngkərtə ɓɗakkur ar dinar, wala tə tsa aɗi su na ana fəi wa. Apani tsuwa tar ka mdə ngkərtə jirkurər hamta jirər giri natə darajarni ku təramta ar dinar ni. Kamnyar atar apani giri ata sə wutə huwa, ka səli, ka olkur, ma vir tə Yesu Kristi ku si.

⁸Wala tə giri aɗi ɗar wutə Yesu wa, giri ku hir ni. Wala tə kulini giri aɗi akwa wutə ni wa, tsu giri ku mbərsa ka tsa, har giri akwa kucali ka jili kucali laga natə mda amzhi ngkərɓəlari wa.

⁹Antə watsəɓər hamta jirər giri ni an abbər giri ata sə mbantədzi aka mpika giri.

¹⁰Ɓɗakkur ngəni tə Hyel hara ala giri ai, təng ɗəm antə naɓiyayeri wul su ata kər abbər ka da nggaɓəla karapwari, har da ku hara naɓikur ata kəra mbantədzi ngəni tə Hyel ɗəmhə kamnyar giri ni.

¹¹Da ku bara abbər ka da nggaɓəla sakatə su ngəni ata sə hara, ka tsuwa laku tə su ni ata sə hara akwa, sakatə Mambələr Kristi akwa gari akwa ɗəffa ɗa, tə da akwa psəmnya jili bwani na ata sə wutə Kristi ka səli na ata sə nuwari ni.

¹²Hyel ku ncaɓəla aka naɓiyayeri ni abbər sakatə da akwa hara naɓikur ni, aɗi kamnyar kərɗa antə tsa akwa gari ala ɗa nə wa, amma kamnyar giri. Tsuwa kulini Mambəl na Ɓɗakkarkara tə Hyel thlentə ni ku hara tə mdə ku ngkərɓəla ala giri shanga su na akwa labar na msəra ar Kristi tə mdə ngkəra ala giri ni. Ai suayeri ngəni, wala mjirthlentərhyel akwa bara ka da wula.

¹³Antə apani ka giri ɗəmhə hangkala giri kamnyar kəthlər. Ka giri ndzi nkahənkahari, ka giri vətə hangkala giri swaiswai ata kəra ɓɗakkur tə mda ata sə hara ala giri ma vir tə Yesu Kristi ku si.

¹⁴Kulini tə giri ku ndzi maɗankyar na ana kələngkər aka su ni, giri aɗiya hir ka suayeri tə giri ana mwaɓə waci ni jaktə kətə hangkala giri wa. Kamnyar sakanda ni ai giri aɗi akwa mzhi ndəkɓəla su wa.

¹⁵Amma təng tə Hyel na kəga giri ni ɓɗakkarkara ni, giri ma tar ka giri ndzi ɓɗakkarkara akwa shanga su tə giri ata harari.

¹⁶Kamnyar mdə ku rəbuta akwa kakaɗər Hyel abbər, “Ka giri ndzi ɓɗakkarkara kamnyar I an ɓɗakkarkara.”

¹⁷Akwa sakar adduwa giri ana kəga Hyel abbər tsa Təddar giri. To, tar ka giri hara sur giri ka thlivər ɗəffa Hyel har ka vədza aka vir tə giri ata kuri ndzəndziyir giri ar mətəpikur akwa duniya ni. Kamnyar tsa ata sə hara shariya aka shanga mji kula nca zumzumkur, ka hamta watsəɓa aka waskəi kalkal ka surhararni.

¹⁸Kamnyar giri asənda abbər mdə pəlipəli giri akwa surharar kəkayeri ar giri na kula ampani ni. Tsuwa mda aɗi pəli giri ni ka kwabar dinar wala adzərfa na ana hil wa.

¹⁹Mdə pəli giri ka mamshi na ka daraja, mamshir Kristi na ndzi apa Ɓzər Təma na kula manjivar wala diɗi adzə ni.

²⁰Tsa antə Hyel carɓəla təng tsu akəmata mda anamtə duniya, tsuwa kamnyar giri antə mdə sə ncaɓəla ni akwa kurər zaman ni.

²¹Atar ni antə giri mbərsa ka Hyel na thlentə ni akwa mtəmta, ka haptə səliyirni ni. Atar ngəni antə giri hamta jiri, har giri akwa vəkər ka tsa ni.

²²Kulini tə mdə ku kəcimta giri atar kələngkərər giri aka jirkur ni, har tə giri akwa hir nvwa giri ka jirkur ni, ka giri ləkəma ka hir nvwa giri akwa jirkur ka ɗəffa giri shang.

²³Kamnyar mdə ku jaktə yaɓəla giri bilən ka damwa. Tsuwa mpika giri na bilən kulini ni, aɗi jili ar mtə nda wa, amma mpikə na ata ndzi ba saka madi, təng tə mdə yaɓəla giri atar ndərər Hyel na ka mpikə ba saka madi ni.

²⁴Kamnyar kakaɗər Hyel ku gari ata kəra ngəni abbər, “Shanga mji ndzi apa kusar, tsuwa shanga səliyir ɗa ndzi apa pukdla na akwa mtaku. Kusar ana tətəɓwa, ka pukdlari təgəri.

²⁵Amma ndərər Mthlaku ata ndzi ba saka madi.” Tsuwa ngəni an ndər na msəra tə mda akwa ngkər ala giri ni.