Read bura-pabir 1 Bitrəs 2 Bible Online

1 Bitrəs 2 - bura-pabir bible

1 Bitrəs 2

¹Apani tar ka giri pumta shanga kəmanggarkur, ka ɗimikur, ka shimnyakur, ka səlka, ka shanga mnyar hilantə thləma mda.

²Tsu apatə ɓzərmaɓir ana ndzi ka məyir uwa antə ka giri ndzi ka məyir ndərər Hyel, kamnyar ka tsa kəlantə giri har ka giri wutə mbantədzi,

³apatə kulini giri ku kurtə ɗar msərakurər Mthlaku.

⁴Ka giri si adzə Yesu, tsa na pela na ka mpika ar kuɗəmar səla mbwar Hyel ni. Mji ku nggəlar ni, amma Hyel ku carɓəla ni ka na daraja na olari.

⁵Antə kulini giri an pelayeri na ka mpika natə Hyel akwa hən mbwarni na ar mambəl kəgari. Nggədza tsuwa giri ata hara kəthlər apa pristayeri na ɓɗakkarkara akwa mbwa ngəni ni, akwa hamta alari jili saɗaka mbamba na abwar mambəl apatə tsa ata barari, atar Yesu Kristi.

⁶Kamnyar kakaɗər Hyel ku pəla, “Nggədza I akwa nci pelar səla mbwa akwa Sihiyona, pela carcara na ka daraja ta shang, na ata ndzi pelar kuɗəma. Antə kəlara mdə na ku mbərsa ka tsa, aɗi ata ləkwa səli wala raka wa.”

⁷Jiri, ala giri na ku mbərsa ka tsa ni, giri ku nggaɓəla olkur tə Hyel na alari ni. Amma aka mji na ku nggəlar mbərsa ka tsa, da ata wutə laku ta, “Pela natə mjir hən mbwa nggəlar ni sə ndzi pelar kuɗəmar səla mbwa!”

⁸Tsuwa kakaɗər Hyel ku pəla akwa vəi damwa abbər, “Ngəni an pela na ata ndzi sur tsamta səla mji, pelar gagəma na ata hara ka mji ndla.” Tsuwa jiri mji ku tsamta səla ɗa kamnyar da ku nggəlar kələngkər aka ndərər Hyel. Tsuwa hwatu apani antə mdə ɗəmhə kamnyar ɗa.

⁹Amma ar giri, giri an dur natə Hyel ka kərari an carɓəla. Giri an pristayeri ar Kuthli na ola, tsuwa giri an mji na ɓɗakkarkara. Giri an mji laga zum tə Hyel hirhira. Tsa an carɓəla giri kamnyar ka giri ngkər kəthlərayeri ar ɓɗakkur tə tsa hara. An su na hara tə tsa kəgaɓəla giri akwa kuthlu ka səntə giri akwa parakəu na ata ndatə mdə ni. Tsu apatə kakaɗər Hyel pəla abbər,

¹⁰“Waci giri aɗi mji na ka daraja wa, amma kulini giri an mjir Hyel. Waci giri aɗi wutə kətadzər Hyel wa, amma kulini tsa ku kətadzə giri.”

¹¹Antə I ata kiɗə giri, mjir yeru, abbər təng tə giri mətəpi akwa duniya ni, tə giri aɗi ka kəi azi wa ni, ka giri hwi shanga nggukayeri na ar dza na akwa mpa akwa ɗəffa giri ni.

¹²Ka giri ləkəma ka harar giri na ɓɗakɓɗaku ni akwa nca ntəwulayeri ar giri na aɗi səndə Hyel wa. Antə wala ma da akwa nggəl giri abbər giri akwa ɓzamtə su, da ata wutə hala giri na ɓɗaku ni, ka da haptə səliyir Hyel akwa vir tə tsa ata hara shariya ni.

¹³Kamnyar Mthlaku, ka giri kələngkər aka kəlara kuthlikur tə mdə ku vəi. Ka giri kələngkər aka kuthli kamnyar tsa an ola ata kəra tsəɗi ni.

¹⁴Tsuwa ka giri kələngkər aka gwamnayeri, təng tə kuthli an putə ɗa kamnyar ka da ɗiɓəla mji na ku ɓzamtə su, tsuwa ka da hu mji na ku hara su kalkal ni.

¹⁵Kamnyar Hyel an ɗəmha abbər ka giri hara su na kalkalari akəma mji na kəgaɓu, kamnyar ka giri ntsari ndərayeri na gapangapani tə da ana pəla akwa tur səndə ni.

¹⁶Ka giri ndzi apa mji na msərmsərari, amma giri aɗiya namtə msərmsərkurər giri ni ka tsa ndzi lakur hara ɗimikur wa. Amma ka surharar giri ncanta abbər giri mafar Hyel.

¹⁷Ka giri nar olkur aka kəlara mda. Ka giri hir mjir nu Yesu nvwa giri. Ka giri thlivər ɗəffa Hyel. Ka giri nar olkur aka kuthli na ola.

¹⁸Giri na buɗayeri ka giri kələngkər aka mji na mthlakər giri, ka giri səlitə ɗa akwa shanga su. Ka giri hara su tə da pəla ala giri, aɗi abbər tar ma da ka hangkal akwa hara su na kalkalari ala giri wa, amma wala ma da an akwa hara kəmanggarkur ala giri.

¹⁹Ai tsa sur kucali, ma mda akwa ɗar bwani ata kəra tsa aɗi ɓzamtə su wa, ma har tsa ku nggaɓəla abbər Hyel an ɗəmha apani.

²⁰Amma ma mda akwa dlaɓu giri kamnyar su tə giri ɓzamta, wala giri an nggita, ai riɓa aɗi akwa wa. Amma ma giri hara su na ɓɗaku, antə giri jaktə ɗar bwani ata kər, tə giri ku mbwi ɗəffa giri, to ai Hyel ata nggatə msərakurər giri.

²¹Ai shang kamnyar jili bwani ngəni antə Mthlaku kəga giri ni. Kamnyar wala Kristi ma tsa ku ɗar bwani kamnyar giri, ka ndzi ala giri sur thlipa. Apani kalkal ka giri nu dəlpari.

²²Tsa aɗi ɗar hara biku wala raka wa, tsuwa tsa aɗi ɗar thlandər wa.

²³Sakatə mdə ku nggənggəl ni, tsa aɗi shinau ka nggəl wa. Wala sakatə tsa akwa ɗar bwani, tsa aɗi thlivərantə mda abbər tsa ata ntari wa. Təng tsa mbərsa ka Hyel, na ana hara shariya ka jirkur.

²⁴Kristi surni ku kətə bikər mburu akwa dzari, mdə kukwamta ni ata udzəm kadləkadla, kamnyar ka mburu ndəkəmtadzi ka biku, ka mburu ndzi mji na ka jirkur. Kamnyar atar bwaniyirni antə giri ku mbantədzi.

²⁵Giri ku ndzi tsu apa təmayeri na ku sha, amma kulini giri ku ngka adzə mdər ɓəla ka mdər tsəlpi mpika giri ni.