Read bura-pabir 1 Bitrəs 3 Bible Online

1 Bitrəs 3 - bura-pabir bible

1 Bitrəs 3

¹Tsu apani tsuwa, giri na mwanki, ka giri kələngkər aka shilər giri. Kamnyar wala ma mji shili laga aɗi na kula kələngkər aka ndərər Hyel, nuhum hala mwankir ɗa ni shini asə səvatə shilər ɗa, kula mdə gari gari ala ɗa,

²atar wul halər giri na kəcəkəcari ka laku tə giri ana kələngkər ala ɗa akwa ni.

³Giri aɗiya putə duna giri ata kəra dəɓar dza giri na aɓəlaɓəla daci, apa ɗəm kər, ka ha sur dəɓa na ar dinar, kəga ha kari na ɓɗakɓɗaku wa.

⁴Amma ka dəɓar giri ndzi təbwar ɗəffa giri na ana hal wa, apa kanaɗikur ka hangkalkur. Kamnyar suayeri ngəni ni ka daraja ka duna akəma Hyel.

⁵Kamnyar apani antə mwanki na waci na ana mbərsa ka Hyel dəɓatə kərɗa, atar kələngkər aka shanga su tə shilər ɗa pəla ala ɗa.

⁶Apani antə Saratu hara. Tsa ana kələngkər aka Ibrahim, har tsa ana kəga ni abbər mthlaku. Kulini giri an maɗa'ni ma giri akwa hara su na kalkal, tə giri aɗi akwa zhar ka su laga thlivərantə giri wa.

⁷Tsu apani tsuwa giri na mji shili, ka giri nar olkur aka mwankir giri. Ka giri səndə laku tə giri ata ndzəndzi kəga da akwa nggaɓəladzi. Nuhum tsa aɗiya ndzi ka duna apa gə wa, amma tsa an pazhir mwar nga akwa mpikə bilən tə Hyel hamta ala giri ni. Antə ka gə wulwul ni apatə ga amzha kamnyar ta su laga asə ngkatə giri hara adduwa ata kəma duku.

⁸Akwa tsikərari, ka shanga giri ndzi ka dzam duku, ka kətadzə mda, ka giri hir maɗama' giri, ka giri ndzi ka hangkal ka kanaɗikur aka nvwa giri.

⁹Giri aɗiya ntə ɗimikur ka ɗimikur wa, wala nggəla ka nggəl wa, amma ata vəya ndaga ka giri vədza barka ala ɗa. Shang kamnyar suayeri apani antə mdə kəga giri ni, kamnyar ka giri sə wutə barka.

¹⁰Kamnyar kakaɗər Hyel ku pəla, “Kəlara mdə na ata bara ka tsa nggatə msəra, na akwa bara ka tsa fəi akwa duniya, tar ka tsa hartə mnyari ta mnya ɗimi, ka tsa zhar thlandər tsuwa.

¹¹Ka tsa zhar hara ɗimikur ka tsa hara ɓɗakkur. Ka tsa bara ndzi lapiyakur ka mji ka tsa bara lakwari ka ɗəffari shang.

¹²Kamnyar Mthlaku ana wul kəra mji na pwa, tsuwa parang tsa ana psi thləm aka adduwar ɗa. Amma Mthlaku ana shinamta kəmari kazhar mjir hara ɗimikur.”

¹³Kamnyar ma giri akwa bara hara ɓɗakkur, wan ta hir dəkəi giri ri?

¹⁴Amma wala ma giri an ta ɗar bwani kamnyar hara ɓɗakkur, Hyel ata vədza ala giri barka. Antə giri aɗiya thlivər mjir hara ala giri kəmanggarkur wa, wala damitədzi ka da wa.

¹⁵Amma ka giri vəngkər səli aka Kristi abbər tsa an Mthlakər ɗəffa giri. Parang ka giri ndzi ɗəmhəɗəmhari kamnyar hamta amsar mbuli kər giri akwa kəlara sakatə mdə ku yu giri ata kəra Kristi tə giri akwa vəkər kari ni. Amma ka giri hara ka tərghəikər ka səlitədzi.

¹⁶Tsuwa ka giri hara shanga su ka ɗəffər jirkur kula dlərpəkur. Apani wala ma mji laga akwa nggəl giri, mji na akwa nggəl giri kamnyar halər giri na ɓɗakɓɗaku akwa Kristi ni, ata sə ləkwa səli.

¹⁷Kamnyar kuji ka mdə ɗar bwani kamnyar hara ɓɗakkur, ma Hyel an ɗəmha apani, ta ka mdə ɗar bwani kamnyar hara ɗimikur.

¹⁸Kamnyar wala Kristi ku mti, ka duku daci, kamnyar shanga mji. Tsa aɗi ɗar hara biku wa, tsa mtə kamnyar mjir biku, kamnyar ka tsa mwantə mburu avəi adzə Hyel. Apani mdə ku tsi ni atar dza, amma Hyel ku thlentə ni akwa mtəmta atar mambəla.

¹⁹Tsuwa atar mambəl antə tsa mwari ka ngkər labar Hyel aka mambəlayeri na akwa pərsəna.

²⁰Mambəlayeri ngəni an nggəlar kələngkər aka Hyel waci akwa sakar Nuhu ni. Wala tə tsa ku mbwi ɗəffari ka da akwa sakatə Nuhu akwa mar shar ni, da aɗi kələngkər alari wa. Antə yiɗauwa daci an msəra akwa yimi nda, apa mji ncisu daci.

²¹Tsuwa yimi ndaga an halamar baptizma natə mburu ana hara kulini kamnyar mbantə giri ni. Amma mbantədzi ngəni tə mburu wutə ni aɗi abbər yimi ni an kəcimta diɗər dza mburu wa. Mburu wutə mbantədzi ni kamnyar mburu ku kiɗə Hyel ka ɗəffa mburu shang atar Yesu amma tsa akwa ncanta abbər mburu ku shinardzi atar ni kulini ka ɗəffa mburu duku, ka tsuwa kamnyar thlatər Yesu Kristi akwa mtəmta.

²²Kulini Kristi ku ləmtazi ka ndzəndzi akwa vəi ndzəndziyir olkur abwa mazəma Hyel, ka shanga mjirthlentərhyel, ka mjir kuthlikur, ka kuthlikurayeri, shang akirari.