Read bura-pabir 1 Bitrəs 4 Bible Online

1 Bitrəs 4 - bura-pabir bible

1 Bitrəs 4

¹Təng tə Kristi ku ɗar bwani abwar dza ni, tar ka giri kətə halərni ni akwa ɗəffa giri tsuwa, kamnyar ka giri mzhi nggitə bwani tə giri akwa ni. Kamnyar kəlara mdə na ku ɗar bwani abwar dza, tsa ku ɓəlatə kərni ta hara biku ka ndəkəmtadzi kəgari.

²Antə akəmazi, tsa ata kuri shanga ndzəndziyirni na mbil akwa duniya ni, akwa hara su na ata kəskəra Hyel, amma aɗi akwa nu nggukər dza kəra wa.

³Giri ku kurtə shamta saka hang waci akwa hara suayeri tə mji na Krishan wa ana hara, apa hilhilkur, ka nggukayeri na ar dza, ka wika, ka shambarkur ar səsa su, ka mwari akwa vəi hilhilkur, ka vəngkər səli aka haptayeri.

⁴Kulini pazhayeri ar giri na waci ni akwa ndatədzi kamnyar tə giri aɗi ana mwari adzə ɗa akwa suayeri na ɗimi ɗimi ni kəra wa, har da akwa mnya ɗimi ata kəra giri.

⁵Amma da ata sə pəla mnya ɗa akəma Hyel, na ɗəmhəɗəmhari kamnyar hara shariya aka mji na ka mpika ka mji na mtəmta.

⁶Kamnyar an su na hara tə mda akwa ngkər labar na msəra ba aka mji na mtəmtari ni, kamnyar wala tə mdə ku thlamta ala ɗa shariya na abwar dza ar mta apa shanga mambila mji ni, da ata mzhi ndzi ka mpika atar mambəl apa Hyel.

⁷Kurər shanga su ku hara kudzəha. Antə tar ka giri ngkahədzi ka ɓəlatə kəra giri, kamnyar ka giri mzhi hara adduwa ka jirkur.

⁸Su na olta shang an ka giri ləkəma ka hir nvwa giri ka ɗəffa giri duku. kamnyar hirkur ana hartə bikayeri hang.

⁹Ka giri dingngga dlu nvwa giri na mətəpi akwa kəyir giri kula nggungguni.

¹⁰Hyel ku hamta cauta aka kəlara mda akwa nca mburu. Antə ka shanga mburu hara kəthlər ka cautə tə Hyel na mburu ni kamnyar dlar nvwa mburu, kamnyar ka mburu ndzi wakilayeri ar suayeri hang tə Hyel hara ala mburu ɓɗakkur ka na mburu ni.

¹¹Kəlara mdə natə Hyel ku na alari dunar ngkər labar Hyel, to, ka tsa ləkəma ka ngkər labar ni apa Hyel ka kərari an akwa gari atar ni. Kəlara mdə na ata hara kəthlər tsuwa ka tsa hara ka shanga duna tə Hyel na alari. Atar apani antə mburu ata mzhi haptə səliyir Hyel akwa shanga su atar Yesu Kristi. Tsa an ka səli ka olkur har ba saka madi. Amin.

¹²Mjir yeru, giri aɗiya ndatədzi ata kəra bwaniyayeri na mwavər mwavər na akwa wutə giri kamnyar ngkərtə giri nə wa. Giri aɗiya kəta apa su laga bilən an akwa wutə giri wa.

¹³Amma ka giri hara kucali təng tə giri akwa ɗar jili bwani tə Kristi ɗari ni. Kamnyar giri ata sə hara kucali ka nggatə msəra tsuwa ma sakatə tsa ku si akwa səliyirni.

¹⁴Wala ma mda an akwa nggənggəl giri kamnyar thləma Kristi, ai giri ka barka. Kamnyar ngəni akwa ncanta abbər mambəl na ka səli, na Mambələr Hyel ni adzə giri.

¹⁵Amma ka giri wuta abbər mda aɗi wala duku akwa nca giri na akwa ɗar bwani kamnyar bikər tsi mdə wa, wala həl wa, wala ɓzamtə su laga wa, wala mdər ti bwari wa.

¹⁶Amma ma mda akwa ɗar bwani kamnyar tə tsa mdər Krishan, to tsa aɗiya ngga səliyari wa, tar ma ka tsa hu Hyel kamnyar ɗar bwani akira thləm ngəni ni.

¹⁷Kamnyar saka ku hara tə mda ata baɗitə hara shariya. Tsuwa mda ata baɗitari ata kəra mjir Hyel. Antə ma ku ndzi abbər mda ata baɗitə shariya ni ata mburu, suari ata sə ndzi məmi aka mji na ku nggəlar labar na msəra ar Hyel nə ri?

¹⁸Apatə kakaɗər Hyel ku pəla, “Ma ka bwani antə mji na pwa ata msəra, kaha, ma mji na ana thlivər ɗəffa Hyel wa ni ka mjir biku ni, da ata sə kuri suari məmə ri?”

¹⁹Antə apani ma giri na akwa ɗar bwani apatə Hyel ɗəmhə ni, ka giri ləkəma ka hara su na kalkal ni, ka giri hamta mpika giri akwa tsiya Hyel na alaktə mburu, kamnyar tsa aɗi ata fwari ata kəra giri wa.