Read bura-pabir 1 Bitrəs 5 Bible Online

1 Bitrəs 5 - bura-pabir bible

1 Bitrəs 5

¹Kulini tsuwa I akwa kiɗə giri, giri na ol'olər ikələziya ni. I mdə ola nvwa giri akwa ikələziya, tsuwa I ku wutə shanga bwaniyayeri tə Kristi ɗari ni, tsuwa I ma I ata sə wutə nəɓwarna akwa səliyirni ma vir tə tsa ku si.

²Apani I akwa kiɗə giri abbər ka giri wulwul ciɓər Hyel na akwa tsiya giri ni. Giri aɗiya hara kəthlər ni apa ku ndzi dwali ala giri wa, amma ka giri hara ka hirər ɗəffa giri apatə Hyel ata barari. Tsuwa giri aɗiya hara kəthlər ni kamnyar bara kwaba wa, amma ka giri hara ka ɗəffa giri akwa.

³Giri aɗiya nca kuthlikur ata kəra mji na akwa tsiya giri nə wa, amma ka giri pwar ɗa ka ndzi surthlipa ala ɗa atar harar giri na ɓɗakɓɗaku.

⁴Antə ma vir tə Kristi na Mdər Ɓəla na Ol ni ku si, giri ata dlu dzakwar kuthlikur na ka səli na aɓzə wa.

⁵Tsuwa giri na tsu maɗadakwi, ka giri kələngkər aka mji na ol'ola. Ka shanga giri tərghəi kəra giri aka nvwa giri, ka giri dlar nvwa giri. Kamnyar kakaɗər Hyel ku pəla, “Hyel ku nggəlar mji na ka kər olkur, amma tsa ana hara ɓɗakkur aka mji na ka tərghəi kər.”

⁶Antə ka giri tərghəi kəra giri akəma Hyel na ka duna ta shang, antə akwa saka na kalkalari tsa ata haptə səliyir giri akwa.

⁷Ka giri pwi shanga damitədzər giri akəmari, kamnyar tsa ana damitədzi ka giri.

⁸Ka giri ndzi nkahənkahari ka ɗəmhəɗəmhari tədəku! Kamnyar Shatan na dawar giri ni akwa kadla akwa həla giri apa tsəngi na akwa nggyinggya, kamnyar bara mdə tə ka tsa ɓɗəmnya.

⁹Giri aɗiya psi alari laku wa. Ka giri ndzi ɓəɓal akwa hamta jirər giri, kamnyar giri ku sənda abbər wala maɗama' giri na bamama akwa duniya ni akwa ɗar jili bwaniyayeri apani.

¹⁰Amma aghəla bwaniyayeri tə giri akwa ɗarari mnyar saka laga raka ni, Hyelər shanga ɓɗakkur na kəga giri abbər ka giri sə ndzi akwa səliyirni atar Kristi ni, tsa ka kərari surni ata jaktə namtə giri kalkal apatə giri aɗi hwatu. Tsa ata na giri nggilang, ka tsa dunautə giri.

¹¹Antə ka kuthlikur ndzi alari har ba saka madi! Amin.

¹²I ku rəbutə wasika ngəni raka ni ka dlarər Sila, natə akwa wutərna, tsa ku mzhi ka mdə pəla tsa ɓzərma' mburu na ka jirkur. I akwa bara kəi dunautə giri, ka ngkərɓəla ala giri jirkur ar laku tə Hyel ana hara ɓɗakkur aka mda akwa. Tsuwa ka giri ndzi ɓəɓal akwa.

¹³Maɗama' mburu akwa Yesu na ahar Babila akwa thlawar giri, natə Hyel an carɓəla ɗa tsu apa giri ni akwa thlawar giri. Wala ɓzərna Markus tsuwa akwa thlawar giri.

¹⁴Ka giri thlawar nvwa giri ka paktə tsi ar hirkur. Ka msərakur ndzi adzə shanga giri na akwa Kristi.