Read bura-pabir 2 Bitrəs 1 Bible Online

2 Bitrəs 1 - bura-pabir bible

2 Bitrəs 1

¹I na Siman Bitrəs na mafar Yesu Kristi ka tsuwa aposələrni an akwa rəbutə wasika ngəni ala giri na ku wutə jili hamta jiri tə yeru wuta atar Hyelər jirkur ka Mthlakər mburu Yesu Kristi.

²Ka Hyel ləkəma ka hara ala giri ɓɗakkur ka tsa jakjaka ala giri msərakur apatə giri akwa kəla ata kəra səndər Hyelər giri ka Yesu na Mthlakər mburu.

³Hyel akwa kuthlikurərni ku na ala mburu shanga su tə mburu akwa turari akwa ndzəndziyir mburu kamnyar ka mburu ndzi mjir nu Hyel. Mburu wutə ngəni atar səndə Kristi na kəga mburu abbər ka mburu sə akwa səliyirni ka darajarni.

⁴Atar suayeri ngəni antə tsa hara ala mburu alkawalayeri na ol'ola ka daraja ni, abbər atar ɗa mburu ata mzhi msərəmta dlərpəkur na akwa duniya na thlata akəla nggukə ni, ka mburu sə mzhi ndzi tsu apa tsa akwa hyelkurərni.

⁵Antə apani ka giri vu duna giri akwa jakə ɓɗakkurər hamta jirər giri ka hal na ɓɗaku, hal na ɓɗaku tsuwa ka səndər su na abwar Hyel,

⁶səndər su abwar Hyel tsuwa ka mbwiɗəffu, mbwiɗəffu tsuwa ka nggitər su, nggitər su tsuwa ka nu Hyel,

⁷nu Hyel tsuwa ka hirdzi na ar maɗaməmakur, hirdzi na ar maɗaməmakur tsuwa ka hirkur.

⁸Kamnyar ma giri ka jili halayeri ngəni na ku mzhi, to səndər giri ata kəra Mthlakər mburu Yesu Kristi ni ata hara ka giri ndzi ka duna ka ampani tsuwa.

⁹Kamnyar kəlara mdə na ku ni ka halayeri ngəni, tsa ata ndzi mdlyang, kamnyar ncari awutə su ciju wa, təng tə tsa ku fwari abbər mdə ku kəcimta alari bikayeri arni na waci ni.

¹⁰Antə maɗaməma, ka giri vu duna giri akwa hara kəthlər na ata ncanta abbər Hyel an kəga giri ka carɓəla giri jiri. Kamnyar ma giri ku hara apani, giri aɗi ata təri wala raka wa.

¹¹Tsuwa atar apani antə mda ata kəlar ala giri lakur ləkwa kuthlikur na ba saka madi ar Mthlakər mburu ka Mdər mbantər mburu Yesu Kristi.

¹²Antə I akwa bara ɗangta ala giri tədəku ata kəra suayeri ngəni ni, wala tə giri ku kurtə səndə ɗa ka hara zurang akwa ndərər jirkur tə giri dlu ni.

¹³Tsuwa I wuta abbər kalkal, təng tə I tsu aɗi ka mpikə ni, kəi dunautə giri atar ɗangtə ɗa ala giri,

¹⁴təng tə I ku sənda abbər aɗi ata fəi wa I ata zhar duniya, apatə Mthlakər mburu Yesu Kristi ku ncanta ali ni.

¹⁵I akwa bara kəi wuta abbər giri ata mzhi ɗangtə suayeri ngəni aghəla mtərna.

¹⁶Kamnyar sakatə yeru akwa ngkər ala giri laku tə Mthlakər mburu Yesu Kristi ncantə kuthlikurərni ni, ai yeru aɗi akwa pu ala giri makumdlayeri tə mdə ɗəmha ka ɗəɗukurərni wa. Awa, yeru ka nca yeru ku wutə ni akwa səliyirni.

¹⁷Kamnyar ai sakatə tsa dlu səli ka olkur akəla Hyel Tədda ni, yeru anda akwa wulari. Təng yeru nggatə kurakari akwa pəla ka kurakər səli ka kuthlikur abbər, “Ngəni an Ɓzərna natə I hirhira, natə I akwa nggatə msərakurərni ka duna” ni.

¹⁸Yeru nggatə kurakə ni thlata amtazi akwa səghəi, kamnyar yeru ata vəi duku ka tsa ata kəra gar na ɓɗakkarkar ni.

¹⁹Antə shanga suayeri ngəni ni akwa jaktə ncaɓəla abbər suayeri tə naɓiyayeri pəla ni an jiri. Antə ata hara ɓɗaku ka giri vədzə hangkala giri aka ndər ngəni, kamnyar ka tsa ndzi ala giri apa pitəla na akwa hamta parakəu akwa vəi kuthlu, har ka vir kura, sakatə Kristi na Dzardzar ni ata mbəlantə ɗəffa giri.

²⁰Amma ntangkəma tar ka giri səndə ngəni abbər, shanga gariyir naɓikur na akwa kakaɗər Hyel ni, aɗi su tə mda ata mzhi ngkərɓəlari atar ɗəɗukurər mdə shini wa.

²¹Kamnyar ndərər naɓikur aɗi ɗar si aka mda atar ɗəɗukurər mdə wa. Mambəl na Ɓɗakkarkara andər ləkwa ɗəffa mji, ka vu ɗa ka da pəla su tə da dlu akəla Hyel.