Read bura-pabir 2 Bitrəs 2 Bible Online

2 Bitrəs 2 - bura-pabir bible

2 Bitrəs 2

¹Amma diya waci naɓiyayeri ar thlandər ku thlata akwa nca mjir Hyel. Tsu apani tsuwa maləmayeri ar thlandər ata sə thlata akwa nca giri, ka da nggwar səntə thlipayeri na ar hilantə giri. Har da ata sə nggəlar Mthlaku na pəli ɗa, ka da ndəkərəngkər asar aka kəra ɗa kula shamta saka.

²Tsuwa mji hang ata si nutə halər ɗa na ar nggukər karwakur ni, har ka mdə sə rutə lakur jirkur kamnyar surharar ɗa.

³Tsuwa kamnyar mbulamkurər ɗa, da ata sə thlandər ala giri kamnyar ka da hara gəna ata giri. Amma mdə ku kurtə thlamta ala ɗa shariya təng waci, tsuwa shariyar ɗa ni tsu avi akwa səkə ɗa.

⁴Kamnyar wala mjirthlentərhyel, Hyel aɗi zhar ɗa sakatə da hara biku wa, amma tsa pu ɗa akwa kəyir u'u, ka mbwamta ɗa akwa ku na zurang ar kuthlu na pələku, ka da sək vir shariya.

⁵Tsuwa wala akwa zaman na waci Hyel aɗi zhar mji na hara biku nə wa. Tsa shamta ɗa ka yimər avava, tar Nuhu shini na mdər psəmnya jirkur, ka mji laga murfa, antə Hyel msəranta akwa yimər avava tə mdə hara akwa duniyar mji na asəndə Hyel wa ni.

⁶Tsuwa Hyel ku shamta bərniyayeri ar Sodom ka Gomora, ka mbamta ɗa ka u'u tə da shin ka pənju. Tsa hilantə ɗa tə da ndzi su hilhila kamnyar ka da ndzi surthlipa aka mji na ata sə nggəlar ndzi mjir Hyel akəmazi.

⁷Tsuwa Hyel ku mbantə Lot, mdə laga na pwa. Lot ku damitədzi ka duna ata kəra suayeri na ɗimi ɗimi tə mjir Sodom akwa harari ni.

⁸Kamnyar apatə mdə na pwa ngəni ka ndzi akwa nca ɗa pci ka viri ni, ɗəffari akwa ɓzə ka duna surkə pci ata kəra nggyarɗəkur tə tsa akwa wutari ka nggatə tədəku ni.

⁹Atar jili su apani antə mburu nggaɓəla abbər jiri Mthlaku ata mzhi mbantə mjirni akwa shanga ngkərtədzi na wutə ɗa. Tsuwa tsa asəndə laku tə tsa ana zhar mji na ɗimi ka mpika akwa ɗi ɗa har ka vədza aka vir shariya.

¹⁰Bwar ola shariya ni ata sə ndzi ata kəra mjir nu nggukər dza na ɗimi ɗimi ni, ka tsuwa mjir rutə mjir kuthlikur. Jili maləmayeri ngəni na ana thlandər ni aɗi ana ngga səli wala raka wa! Da mji na ka kər olkur. Da aɗi ana thlivər su wa, har da ana mzhi nggəl mjirthlentərhyel kula thlivəra!

¹¹Amma wala tə mjirthlentərhyel ni ku təramta maləmayeri ni ka duna ka kuthlikur, da aɗi ana ngkər ɗimikur kəga nggənggəl su tə mji ndaga ana hara ni akəma Mthlaku wa.

¹²Amma mji nayeri ni ana hara su kula dzama apa mwaɓi, da ka su laga akwa dza ɗa na akwa ntsətə ɗa. Da ana hara su apa mwaɓiyayeri natə Hyel vəi kamnyar ka mdə ngkəi ka tsi daci. Da ana nggənggəl su ata kəra kəlara su tə da aɗi nggaɓəla wa, antə ɗimikurər ɗa ni ata sə kurəmta ɗa tsu apatə mda ana kurəmta mwaɓi mtaku.

¹³Tsuwa tsu apatə mji ku sa bwani akira ɗa, antə da ata sə sa bwani. Da ana namtə sa ka wikə təpci ni apa ngga msəra. Apani da ku ndzi apa sur səli ka sur cika akwa nca giri, təng tə da akwa səm ka sa, ka wika ata kəma duku ka giri, amma aghəla nda da ata hara su tə da hir ni.

¹⁴Tədəku da akwa dzama ata kəra mwanki, har da aɗi ana ghəra akwa hara biku wa. Da ana ndəkərtə hangkala mji na ka hamta jirər ɗa akwa kənggəra. Tsuwa da ku tsəli ka mbulamkur. Antə da ku ndzi mji na hilhilari.

¹⁵Da ku zhar nu laku na kalkalari, ka sha. Kamnyar da ku nu surharar Balaam na ɓzər Beyor, mdə na hir ka tsa wutə kwaba akwa lakur ɗimikur.

¹⁶Amma mdə ku mpa alari ata kəra bikərni, har kwara na ana gari wa, ku gari apa mda, ka ngkata alari cicukur tə tsa akwa bara harari ni.

¹⁷Mjir thlandər nayeri ni ndzi apa vəi kucirkila na ku shiwa, apa dlamba natə shambar yimi ana fimta. Kamnyar ɗa antə mdə ɗəmhə vəi ndzəndzi na akwa kuthlu akwa ku na zurang ni.

¹⁸Kamnyar da ana gaya, ka ngkər ndərayeri gapangapani ar cakukur. Ka jili nggukər dza ɗa na ar shambarkur ni, da ana jaktə ndəkərtə hangkala mji na haɗa msəra akwa halər shashakur ni.

¹⁹Da ana hara alkawal abbər mda ata wutə msərmsərkur, amma da ka kəra ɗa an mafar biku ka su na dlərpədlərpu. Kamnyar kəlara su na ku kətə hangkala mda, suari ata namtə mdə ni ka tsa ndzi mafarni.

²⁰Kamnyar ma aghəla tə mji ku msəra akwa hara suayeri na ɗimi ɗimi akwa duniya ni, atar səndər ɗa ata kəra Mthlakər mburu ka Mdər mbantər mburu Yesu Kristi, ka jaktə ngka akwa hara ɗa, har tə suayeri ni ku təra dunari, to tsikəra ndzəndziyir mdə ni ata sə ndzi ɗimi ta na akwa baɗitari.

²¹Kamnyar ata ndzi hərku ala ɗa ma da an aɗi səndə su na ɓɗaku hwatu wa, ta aghəla tə da ku sənda, antə da jaktə shinadzə bwahili aka tsawu na ɓɗakkarkara tə mdə hamta ala ɗa ni.

²²Ai su tə da hara ni ku kəɓa ka karapu na pəla, “Kila ku jaktə ngka ata kəra su tə tsa tapərəmta” ni, ka tsuwa na pəla, “Gadu tə mdə pəranta, ku jaktə ngka akwa takəla akwa maɓu” ni.