Read bura-pabir 2 Bitrəs 3 Bible Online

2 Bitrəs 3 - bura-pabir bible

2 Bitrəs 3

¹Mji tə I hirhira, ngəni an wasikarna na suɗkur tə I rəbuta ala giri ni. Akwa wasikayeri japu suɗə ni, I akwa ɗangta ala giri suayeri ngəni, kamnyar kəi dunautə giri akwa nu Hyel ka ɗəffa giri duku.

²I akwa bara ka giri ɗangtə suayeri tə naɓiyayeri na ɓɗakkarkara pəla waci, ka tsawayeri natə Mthlaku ka Mdər mbanta hamta atar aposəlayeri ar giri ni.

³Na ntangkəma tar ka giri nggaɓəla ngəni, abbər akwa kurər duniya mjir kyartəkur ata sə thlata ka kumshi giri, ka nu su na ata kəɓa ka nggukər dza ɗa.

⁴Da ata sə pəla, “Tsa aɗi pəla ala giri abbər tsa ata jaktə si wa ya? Ka kulini tsa ama ri? Kəkayeri ar mburu ku zhar duniya ni təng waci, amma shanga su akwa ləkəma tsu apa na akwa baɗitər duniya!”

⁵Mjir pəla su apani ni akwa nggəlar ndər na pəla abbər atar tsawur Hyel antə Hyel ku namtə vəi na amtazi təng waci ni. Tsuwa atar yimi antə tsa namtə duniya, antə duniya ni ku ndzi ata ɗəffa yimi.

⁶Tsuwa tsu atar yimi ni antə duniya ndaga ku shamtadzi, sakatə tsa ləghəi səyam ka sha akwa yimi ni.

⁷Tsuwa tsu atar ndərər Hyel, antə vəi na amtazi ka duniya na aɗi kulini ni, akwa sək ka mdə mbamta ɗa ka u'u. Hyel ku zhar ɗa har tar vir shariya aka mji na kula thlivər Hyel, ka tsa shamta ɗa.

⁸Amma ar giri, giri tə I hirhira, giri aɗiya fwari ata kəra su ngəni pal nə wa, abbər aka Mthlaku vir duku ndzi apa məva dəpu, tsuwa məva dəpu an apa vir pal ni.

⁹Tsuwa Mthlaku aɗi ana shamta saka akwa nghyaɓəla alkawalərni apatə mji laga akwa dzamari nə wa. Tsa akwa mbwi ɗəffari kamnyar giri, kamnyar tsa aɗi akwa bara ka mdə wala duku sə sha wa, amma ka waskəi sə tubi.

¹⁰Amma virər Mthlaku ata sə si akwa sakatə mda aɗi tamatə wa apa həla. Saka nda antə vəi na amtazi ata sha ka jili kuraku laga na ol ka duna. Antə shanga suayeri na amtazi ni ata juwamtadzi akwa u'u, tsuwa duniya ka shanga su na akwa ata mbamtadzi.

¹¹Təng tə ku ndzi shanga suayeri ngəni ata sə mbamtadzi apani ni, jili ndzi madi antə kalkal ka giri hara ri? Ai kalkal ka giri namtə ndzəndziyir giri ka tsa ndzi ɓɗakkarkara, ka giri hamta kəra giri aka Hyel akwa shanga su.

¹²Ka giri ndzi mji na akwa sək Virər Hyel ka kucali, akwa hara su na ata vu ka tsa si taktar, vir tə vəi suayeri na amtazi ata sə tamtə u'u ka mbamtadzi, ka shanga suayeri na amtazi ka na akwa duniya juwamtadzi akwa u'u ni.

¹³Amma mburu akwa sək vəi na amtazi na bilənari ka duniya na bilənari apatə Hyel ku hara ala mburu alkawalari, vəi tə shanga mji ata sə hara su tə Hyel akwa barari.

¹⁴Antə mji tə I hirhira, təng tə giri akwa sək vir nda, ka giri hangkər akwa namtə ndzəndziyir giri ka tsa ndzi kula sur nggəla kula manjivar akəma Hyel, ka giri ndzi msəra kəga nvwa giri.

¹⁵Ka giri ɗangta abbər su na hara tə Mthlakər mburu mbwi ɗəffari ni an kamnyar ka mji wutə mbantədzi. Tsuwa wala Bulus na ɓzərma' mburu natə mburu hirhir ni, ku rəbuta ala giri, ka ɗəɗukur tə Hyel na alari.

¹⁶Tədəku tsa akwa gari ata kəra suayeri ngəni akwa wasikayeri arni. Akwa wasikayeri ni, suayeri aɗi na mwavər ka mdə nggaɓəla, natə mji na kula səndər su ka mji na ka hamta jirər ɗa raka, ana ndwali karapur ɗa. Ai su ngəni ata ndəkərəngkər ala ɗa mta. Tsu apani antə da ana hara aka mambila kakaɗayeri.

¹⁷Antə mji tə I hirhira, təng tə giri ku nggaɓəla su ngəni ni, ka giri hara hangkal ta giri asə nutə surharar mji na zhar nu Hyel ni. Giri aɗiya hir ka thlipər shashakur ni ləkwa ɗəffa giri, har ka thlipə na jirari ni sə tərɓəla akwa tsiya giri wa.

¹⁸Amma ka giri ləkəma ka kəla akwa ɓɗakkur tə Hyel akwa hara ala giri ni, ka giri jakjaka akwa səndər su ata kəra Mthlakər mburu ka Mdər Mbantə mburu Yesu Kristi. Antə ka səli ndzi alari, kulini ka ba saka madi! Amin.