Read bura-pabir 1 Yahwana 2 Bible Online

1 Yahwana 2 - bura-pabir bible

1 Yahwana 2

¹Maɗankyarərna na raka raka. I akwa rəbuta ala giri ngəni kamnyar ta giri asə hara biku. Amma ma har mdə laga ku hara biku, mburu ka mdər dlar mburu adzə Tədda, watau Yesu Kristi na ka jirkur ni.

²Tsa na Kristi surni an saɗakar kələmta bikər mburu ni, tsuwa aɗi kamnyar bikər mburu daci wa, amma kamnyar bikər shanga mjir duniya tsuwa.

³Antə ma mburu akwa ɓəla tsawur Hyel, ata ncanta aka mji ata bəbal abbər mburu ku səndə ni jiri.

⁴Kəlara mdə na akwa pəla abbər tsa asəndə Hyel, amma tsa aɗi akwa kələngkər aka tsawurni wa, mdari ku ndzi mdər thlandər, tsa aɗi ka jirkur wa.

⁵Amma shanga mji na akwa kələngkər aka ndərər Hyel, ana ncanta abbər da hir Hyel jirjiri. Atar ngəni antə mburu ata mzhi nggaɓəla abbər mburu akwa mwardzi ka Hyel.

⁶Kəlara mdə na akwa pəla abbər tsa mdər Hyel, tar ka tsa namtə ndzəndziyirni apatə Yesu Kristi ku hara.

⁷Mjir yeru, I aɗi akwa rəbuta ala giri tsawu laga bilən wa, amma an tsu tsawu na waci tə giri dlu tsu akwa baɗitari nda. Tsuwa tsawu na waci ni an ndər tə giri nggatə təng ɗəm ni.

⁸Amma wala apani, I akwa rəbuta ala giri tsawu na bilən. Tsawu natə Kristi akwa ɓəlari ka jirkur, tsuwa wala giri ma giri akwa ɓəlari ka jirkur. Kamnyar kuthlu akwa sha, antə parakə na jirari ku baɗitə mbila.

⁹Ma mdə na pəla abbər tsa akwa parakəu, amma tsa akwa nggəlar ɓzərma'ni, to tsa tsu akwa kuthlu ba kulini.

¹⁰Kəlara mdə na akwa hir ɓzərma'ni, ku ncanta abbər tsa akwa parakəu, tsuwa tsa aɗi ata ndzi sur tsamta səl aka ɓzərma'ni wa.

¹¹Amma kəlara mdə na akwa nggəlar ɓzərma'ni, ku ncanta abbər tsa tsu akwa kuthlu, tsuwa tsa akwa mwa akwa kuthlu, tsa aɗi səndə vəi tə tsa akwa mwari ata wa, kamnyar kuthlu ni ku namtə ni mdlyang.

¹²Maɗankyarərna na raka raka, I akwa rəbuta ala giri ni kamnyar mdə ku tifəmta ala giri bikər giri, akwa thləma Kristi.

¹³I akwa rəbuta ala giri, giri na mjir ya kamnyar giri ku səndə tsa na aɗi təng akwa baɗitari ni. I akwa rəbuta ala giri, giri na maɗadakwi kamnyar giri ku nggyari mdə na ɗimi ni. I akwa rəbuta ala giri, giri na maɗankyar kamnyar giri ku səndə Tədda.

¹⁴I akwa rəbuta ala giri, giri na mjir ya, kamnyar giri ku səndə tsa na aɗi təng akwa baɗitari ni. I ata rəbuta ala giri, giri na maɗadakwi, kamnyar giri ka duna, tsuwa giri ku kəsi ndərər Hyel akwa ɗəffa giri, tsuwa giri ku nggyari mdə na ɗimi ni.

¹⁵Giri aɗiya hir duniya nə wa, wala suayeri na akwa duniya nə wa. Kamnyar kəlara mdə na akwa hir duniya ni, to tsa aɗi akwa hir Tədda wa.

¹⁶Kamnyar shanga su na akwa duniya ni, apa bara kuri nggukər dza mburu, ka suayeri tə nca mburu ana nggukta, ka gayar su tə mburu kəgari ni, aɗi thlata akəla Tədda wa, amma thlata akwa duniya.

¹⁷Duniya ka shanga suayeri na akwa ata sə kura, amma mdə na ana hara su tə Hyel hira ata sə ndzi ba saka madi.

¹⁸Maɗankyarərna, ngəni mburu akwa sakar kurər duniya! Antə tsu apatə giri ku nggata abbər dawar Kristi akwa si ni, kulini dawayeri na ar Kristi ku kurtə si. An su na hara tə mburu sənda abbər sakar kurər duniya ku si ni.

¹⁹Mji ngəni ləɓəla kazhar ikələziyar mburu, amma shang da aɗi mjir mburu na jirari wa. Kamnyar ma abbər da an mjir mburu na jirari, sakani da ata ləkəma tsu kəga mburu. Amma da ləɓəla akwa nca mburu ni, kamnyar ka jirkur ni ndzi ata bəbal abbər shanga ɗa aɗi mjir mburu na jirari wa.

²⁰Amma ar giri, tsa na Ɓɗakkarkar ni ku na giri mambələrni, antə shanga giri ku səndə jirkur ni.

²¹I akwa rəbuta ala giri ni, aɗi kamnyar abbər giri aɗi səndə jirkur wa wa, amma kamnyar tə giri ku səndə jirkur, ka səndə tsuwa abbər thlandər aɗi akwa jirkur wa.

²²Tsuwa wa an mdər thlandər nə ri? Ai tsa an mdə na nggəlar kələngkər abbər Yesu an Kristi ni. Mdə na ku nggəlar dlu Tədda ka Ɓzər ni, tsa an dawar Kristi ni.

²³Kamnyar kəlara mdə na ku nggəlar Ɓzər ni, tsa ku nggəlar Tədda tsuwa. Tsuwa kəlara mdə na ku kələngkər aka Ɓzər tsa ku kələngkər aka Tədda ni tsuwa.

²⁴Ka giri kəsi su tə giri nggata akwa baɗitari ni. Ma giri ku kəsi su tə giri nggata akwa baɗitari ni, giri ata ndzi akwa Ɓzər ni ka Tədda ni.

²⁵Tsuwa ngəni an su tə Ɓzər ni hara ala mburu alkawalari ni, watau mpikə na akur wa ni.

²⁶I akwa rəbuta ala giri ngəni kəi tsaktə giri ata kəra mji na akwa bara pwaktə giri.

²⁷Amma ar giri, mambəl tə tsa hamta ala giri ni ku ndzəndzi akwa ɗəffa giri. Antə giri aɗi akwa tur ka mdə laga thlipa ala giri su wa. Kamnyar Mambələrni tə tsa hamta ala giri ni akwa thlipa ala giri shanga su, tsuwa su tə tsa akwa thlipari ni an jiri, aɗi thlandər wa. Antə ka giri ləkəma ka ndzi akwa Yesu, tsu apatə mdə ku thlipa ala giri ni.

²⁸Antə kulini, maɗankyarərna na raka raka, ka giri ndzi akwa Kristi, kamnyar ma vir tə tsa ku sə si, ka giri sə mzhi mwari adzə ni kula thlivəra, giri aɗi ata tur hwi ni kamnyar səli tə giri ata ləkwari wa.

²⁹Giri ku sənda abbər Kristi ka jirkur, tsuwa giri ata mzhi mbərsa abbər kəlara mdə na akwa hara su kalkal, tsa ɓzər Hyel tsuwa.