Read bura-pabir 1 Yahwana 3 Bible Online

1 Yahwana 3 - bura-pabir bible

1 Yahwana 3

¹Wul giri jili hirkur tə Tədda hir mburu akwa bu, har mda akwa pəla abbər mburu maɗa' Hyel! Tsuwa jiri mburu apani. Amma mjir duniya ni aɗi nggaɓəla abbər mburu maɗa' Hyel wa, kamnyar da aɗi səndə ni wa.

²Mjir yeru, mburu maɗa' Hyel kulini. Amma mburu aɗi kuri nggaɓəla laku tə mburu ata sə ndzəndzi akəmazi wa. Amma mburu ku sənda abbər ma sakatə Kristi ku jaktə si, mburu ata sə ndzi apa tsa, kamnyar mburu ata sə wutə ni kalkal apatə tsa aɗi hwatu.

³Antə kəlara mdə na akwa mwaɓər sə wutə Kristi, tar ka tsa namtə ndzəndziyirni kəcəkəcari, tsu apatə Kristi kəcəkəcari ni.

⁴Kəlara mdə na akwa hara biku, tsa ku ndzi mdər ɓəli tsawur Hyel, kamnyar biku an ɓəli tsawa.

⁵Giri ku sənda abbər Kristi si ni kamnyar ka tsa kələmta bikayeri, tsuwa biku aɗi akwa tsa wa.

⁶Kamnyar kəlara mdə na ata ndzi akwa Kristi, aɗi ata jaktə ləkəma akwa hara biku wa. Kəlara mdə na akwa ləkəma ka hara biku, tsa aɗi ɗar wutə Yesu wa, wala səndə ni wa.

⁷Maɗankyarərna na raka raka, giri aɗiya hir ka mdə pwaktəmta giri wa. Kəlara mdə na akwa hara su kalkal tsa ka jirkur, tsu apatə Kristi ka jirkur ni.

⁸Amma kəlara mdə na akwa ləkəma ka hara biku, tsa ar Shatan, kamnyar Shatan baɗitə hara biku təng tsu akwa baɗitari. Su na hara tə Yesu si akwa duniya ni, an kamnyar ka tsa huzamta kəthlərayeri na ar Shatan.

⁹Kəlara mdə na ku ndzi ɓzər Hyel, aɗi ana ləkəma akwa hara biku wa. Kamnyar halər Hyel akwa dzari, antə tsa amzhi ləkəma ka hara biku kəra wa, kamnyar Hyel ku kurtə ndzi Təddarni.

¹⁰Nggədza laku tə mda ata mzhi nggaɓəla mji na maɗa' Hyel ka mji na maɗa' Shatan. Kəlara mdə na aɗi akwa hara su kalkal wa, tsa aɗi ar Hyel wa. Tsuwa kəlara mdə na aɗi akwa hir ɓzərma'ni wa, tsa aɗi ar Hyel wa.

¹¹Ngəni an labar tə giri nggatə tsu akwa baɗitari ni, abbər ka mburu hir nvwa mburu ni.

¹²Mburu aɗiya ndzi apa Kayinu wa, kamnyar arni tsa buɗar Shatan, antə tsa tsi ɓzərma'ni ni. Amma kamnyar mi tə tsa tsi ɓzərma'ni nə ri? Kamnyar surhararni an ɗimi, tsuwa surharar ɓzərma'ni ni ɓɗaku.

¹³Maɗama'na, ma duniya ni akwa nggəlar giri, giri aɗiya ndatədzi wa.

¹⁴Ar mburu, mburu ku kurtə təramta mta ka mwari akwa mpika, təng tə mburu akwa hir nvwa mburu ni. Kamnyar kəlara mdə na aɗi akwa hir mdə wa, tsa mtəmtari.

¹⁵Kəlara mdə na akwa nggəlar ɓzərma'ni, tsa an mdər tsi mda. Tsuwa giri ku sənda abbər mdər tsi mda aɗi na ata ləkwa mpikə na akur wa nə wa.

¹⁶Nggədza laku tə mburu nggaɓəla hirkur na jirari ni akwa, atar laku tə Kristi hamta mpikari kamnyar mburu ni. Antə kalkal ka mburu hamta mpika mburu kamnyar maɗama' mburu tsuwa!

¹⁷Amma ma mdər gəna ku wutə ɓzərma'ni akwa tur su, antə tsa nggəlar ta dlar ni, apa madi tə tsa ata pəla abbər tsa ka hirkur Hyel nə ri?

¹⁸Maɗankyarərna na raka raka, giri aɗiya hir mda ata mnya giri daci wa, amma ka giri ncantə hirkur giri akwa harar giri ka akwa jirkur.

¹⁹Atar ngəni antə mburu ata sənda abbər mburu ka jirkur, tsuwa mburu ata mzhi thləthlata akəma Hyel ka kucali.

²⁰Wala ma mburu akwa nggari apa mburu ku ɓzamtə su, Hyel asəndə shanga su na akwa ɗəffa mburu, antə tsa asəndə shanga su.

²¹Apani mjir yeru, ma mburu akwa nggari apa mburu aɗi ɓzamtə su wa, mburu ata mzhi si akəma Hyel ka kucali.

²²Tsuwa mburu ata mzhi wutə shanga su tə mburu ku yuwa akəlari, kamnyar mburu akwa ɓəla tsawayeri arni, tsuwa mburu akwa hara su tə tsa akwa barari.

²³Tsuwa ngəni an tsawurni ni, abbər ka mburu hamta jiri aka Ɓzərni Yesu Kristi, tsuwa ka mburu hir nvwa mburu kalkal apatə tsa ku tsawa ala mburu.

²⁴Shanga mji na akwa ɓəla tsawur Hyel, akwa ndzi akwa tsa, tsuwa tsa akwa da. Atar ngəni antə mburu nggaɓəla abbər Hyel akwa mburu, atar Mambəl tə tsa hamta ala mburu ni.