Read bura-pabir 1 Yahwana 4 Bible Online

1 Yahwana 4 - bura-pabir bible

1 Yahwana 4

¹Antə mjir yeru, giri aɗiya mbərsa ka kəlara mdə na pəla abbər tsa ka mambələr Hyel wa. Ngkərtə giri mambəlayeri ni shang, ka nggaɓəla wala da thlata akəla Hyel. Kamnyar naɓiyayeri ar thlandər ku hara hang akwa duniya kulini.

²Nggədza laku tə giri ata mzhi nggaɓəla mdə na ka Mambələr Hyel. Kəlara naɓi na ku kələngkər abbər Yesu Kristi ku si akwa dza apa shanga mji, tsuwa tsa thlata adzə Hyel, to tsa an naɓi na ka Mambələr Hyel.

³Amma kəlara naɓi na aɗi kələngkər abbər Yesu thlata adzə Hyel wa, to mdə ndaga ka mambələr dawar Kristi, natə mdə pəla ala giri abbər tsa akwa si ni, kulini ma tsa akwa duniya kasha.

⁴Amma ar giri, maɗankyarərna na raka raka, giri an ar Hyel, antə giri ku nggyari naɓiyayeri na ar thlandər ni. Kamnyar Mambələr Hyel na akwa dza giri ni ku təramta mambələr thlandər na akwa mjir duniya ni.

⁵Da an ar duniya, antə shanga su tə da akwa pəlari ni thlata akwa duniya, tsuwa duniya ni akwa psi thləm ala ɗa.

⁶Amma ar mburu, mburu ar Hyel. Tsuwa shanga mji na ku səndə Hyel, ana psi thləm ala mburu. Ma mji na aɗi akwa psi thləm ala mburu wa, to da aɗi səndə Hyel wa. Atar ngəni antə mburu ana nggaɓəla mji na ka Mambələr jirkur ka mji na ka ar thlandər.

⁷Antə mjir yeru, ka mburu hir nvwa mburu, kamnyar hirkur thlata akəla Hyel. Antə kəlara mdə na ana hir mda, tsa ɓzər Hyel, tsuwa tsa asəndə Hyel.

⁸Kəlara mdə na aɗi ana hir mdə wa, tsa aɗi səndə Hyel wa, kamnyar Hyel an hirkur.

⁹Ngəni an laku tə Hyel ncaɓəla ala mburu abbər tsa hir mburu ni, apatə tsa thlenta ala mburu Ɓzərni na duku shini akwa duniya, kamnyar ka mburu sə wutə mpika atar ni.

¹⁰Ngəni an hirkur na jirari ni, aɗi abbər mburu hir Hyel wa, amma tsa an hir mburu, har ka thlentə Ɓzərni apa saɗakar kələmta ala mburu bikər mburu.

¹¹Antə mjir yeru, təng tə Hyel ku hir mburu apani, kalkal ka mburu hir nvwa mburu tsuwa.

¹²Mda aɗi na ku ɗar wutə Hyel wa, amma ma mburu akwa hir nvwa mburu, ata ncanta abbər Hyel akwa ɗəffa mburu, tsuwa mburu ka jili hirkurərni ni akwa ɗəffa mburu.

¹³Atar ngəni antə mburu ata mzhi nggaɓəla abbər mburu akwa tsa, tsuwa tsa akwa mburu, kamnyar Mambələrni tə tsa na ala mburu ni.

¹⁴Antə mburu ku wuta, ka hara seɗari, abbər Tədda ni ku thlenta ala mburu Ɓzərni ka tsa ndzi Mdər Mbantər duniya.

¹⁵Kəlara mdə na ku kələngkər abbər Yesu Kristi ni Ɓzər Hyel, to Hyel akwa tsa, antə tsa akwa Hyel.

¹⁶Kamnyar mburu ka kəra mburu ku sənda abbər jiri Hyel hir mburu ka duna, tsuwa mburu ku mbərsa ka hirkurərni ni. Hyel an hirkur, antə kəlara mdə na ana hir mda, ku ncanta abbər tsa akwa Hyel, tsuwa Hyel akwa tsa.

¹⁷Atar ngəni antə mji ata nggaɓəla abbər mburu ka jili hirkurərni ni akwa ɗəffa mburu. Antə mburu ata sə ndzi ka kucali akwa vir shariya ni, kamnyar apatə Yesu aɗi ni, antə mburu aɗi akwa duniya ni.

¹⁸Thlivər aɗi akwa jili hirkur ngəni wa, kamnyar hirkur na jirari ana kədləɓəla thlivəra. Kamnyar ɗya andər hara ka mdə thlivər ni, apani kəlara mdə na ana thlivər su, tsa aɗi ka hirkur na jirari wa.

¹⁹Mburu ana hir mda, kamnyar Hyel an hir mburu ntangkəma.

²⁰Ma mdə laga pəla, “Ai, I hir Hyel,” amma tsa akwa nggəlar ɓzərma'ni, to mdə ngəni akwa thlandər. Kamnyar kəlara mdə na aɗi akwa hir ɓzərma'ni tə tsa akwa wutari wa, tsa aɗiya mzhi hir Hyel natə tsa aɗi ɗar wutə ni wa nə wa.

²¹Kamnyar ngəni an tsawu tə Kristi hamta ala mburu ni abbər, kəlara mdə na akwa hir Hyel, tar ka tsa hir ɓzərma'ni tsuwa.