Read bura-pabir Alkaliyayeri 1 Bible Online

Alkaliyayeri 1 - bura-pabir bible

Alkaliyayeri 1

¹Aghəla mtər Joshuwa antə mjir Israila ku yuwa MTHLAKU abbər, “Nyarmbwa madi na akwa durər yeru na ata mwari ntangkəma ka ra dlər mjir Kanana ri?”

²MTHLAKU shinau abbər, “Nyarmbwar Yahuda, kamnyar I ku hamta ala ɗa nggyari su ata kəra tsəɗi ni.”

³Antə mjir Yahuda ku mwari adzə yangkura ɗa na mjir Simeyon ka pəla abbər, “Dlar giri yeru ka mburu ra dlərəmta mjir Kanana na akwa ndzəndzi akwa tsəɗi tə mdə ku hamta ala yeru ni. Aghəla nda yeru ata dlar giri ka mburu ra dlərəmta mji na akwa tsəɗi tə mdə ku na ala giri ni tsuwa.” Antə mjir Simeyon

⁴ka mjir Yahuda ata kəma duku ku mwari akwa dlər ni. Antə MTHLAKU ku hamta ala ɗa nggyari su ata kəra mjir Kanana ka mjir Perizzi, antə da ku ngkəi mji dəpu kuma ahar Bezek.

⁵Da wutə Adonibezek anda ka mpa ni.

⁶Tsa ku hwi amma da ku kədlə ni ka ngkəi ni ka thlamta kuleng ola tsiyari ka səlari.

⁷Adonibezek pəla, “I ku ɗar ndzi ka kuthlyayeri murfəkumari natə I thlamta kuleng ola ar tsiya ɗa ka səla ɗa. Da ku mtir susəma akira tebər səm susəmərna. Ashina Hyel ku ntəmta ala ɗa ɗimikur tə I hara ala ɗa.” Da ku mwantə ni ahar Urushalima, antə tsa ku mti anda.

⁸Mjir Yahuda ku dlər Urushalima ka səm ɗa. Da kurəmta shanga mji ka mbamta bərni ni.

⁹Aghəla nda antə mjir Yahuda ku ra mpa mjir Kanana na ka ndzəndzi akwa tsəɗi gar, ka kusar garayeri təbwa raghəi, ka tsəɗi na kula yimi abwar anəm.

¹⁰Da ku ra dlər mjir Kanana na ka ndzi ahar Hebron (tə mda ana kəga Kiriyath Arba), ka nggyari nyarmbwar Sheshai, Ahiman ka Talmai.

¹¹Sakatə mjir Yahuda ku zhar Hebron da mwari ka pwa ata kəra Debir. Sakanda mda ana kəga di ni Kiriyath Sefer.

¹²Antə Kaleb na pal akwa nca mji ol'ola ar Yahuda pəla, “I ata hamta ngkwarna Aksa ka da kəldzi ka mdə na ata ngkəi Kiriyath Sefer.”

¹³Antə Othniyel na ɓzər Kenaz, ɓzərma' Kaleb na raka, ku ngkəi di ni. Apani Kaleb ku hamta ngkwarni Aksa alari ka tsa kəla.

¹⁴Təkəma aghəla vir kəldzər ɗa antə Aksa baɗitə pəla aka salngkiɗa Othniyel abbər, “Yu baba'na ka tsa thlatsa ala gə vəi.” Sakatə Aksa ku səghəi kazhar kwara ni antə baba'ni Kaleb ku yu ni abbər, “Man tə ga akwa barari?”

¹⁵Tsa shinau abbər, “Ga ku dlar ra ka vəi akwa tsəɗi Negev, jaktə dlar ra bu ka ra na ali vəi na ka kucir kila.” Antə Kaleb ku na alari vəi kucir kila na amta ka na aghəi.

¹⁶Sakatə mjir Yahuda ku təra kazhar Yariko bərni nfur dipənau, antə mjir Keni na kəkar mjir mwalar Musa ku təra kəga da ka ləkwa mtakər Yahuda. Da mwari ka ndzəndzi akwa nca mjir Amalek akwa Negev, kudzəha ka Arad.

¹⁷Mjir Yahuda ku paktədzi kəga mjir Simeyon ka dlərəmta mjir Kanana na andzəndzi akwa bərni Zefath. Da kuri ka bərni ni ka vətə thləm alari abbər Horma.

¹⁸Tsuwa mjir Yahuda ku ngkəi Gaza, ka Ashkelon, ka Ekron, kəga kauyayeri na kalaktə ɗa.

¹⁹MTHLAKU ku dlar mjir Yahuda antə da ku dlutsə tsəɗi gar ni. Amma da amzhi kədləɓəla mji na akwa mular ni wa, kamnyar da ka wagənər taku ar liya.

²⁰Mjir Yahuda ku hamta bərni Hebron aka Kaleb tsu apa tə Musa ku pəla. Antə Kaleb ku kədləɓəla na nyarmbwayeri makər ar Anak.

²¹Amma nyarmbwar Benjamin aɗi kədləɓəla mjir Yebusi na ka ndzəndzi akwa Urushalima wa. Apani mjir Yebusi ku ləkəma ka ndzəndzi anda kəga mjir Benjamin təng waci.

²²Mji na akwa nyarmbwar Ifrayim ka Manasse ku dlər bərni Bethlel, antə MTHLAKU ku dlar ɗa.

²³Sakatə da thlentə mji ka da ra wulɓəla ashira tsəɗi Bethlel natə mda ana kəga abbər Luz,

²⁴antə da kəɓa ka mdə laga akwa səɓəla akwa bərni ni. Da pəla alari, “Ncanta ala yeru lakur ləkwa bərni ni antə yeru aɗi ata tsəkwar ngə wa.”

²⁵Mdə ni ku ncanta ala ɗa, antə mjir Ifrayim ka Manasse ku kurəmta shanga mji na akwa bərni ni, təng mdə ni ka kutakəyirni.

²⁶Mdə ni ku mwari akwa tsəɗi Hitti ka latə bərni anda ka vətə thləm alari Luz natə ba kulini an thləmari.

²⁷Mjir Manasse aɗi mzhi kədləɓəla mji na andzəndzi akwa Beth Shan, ka Taanak, ka Dor, ka Ibleyam, ka Megiddo, ka kauyayeri na kalaktə ɗa wa, kamnyar mjir Kanana ku ləkəma ka ndzi anda.

²⁸Sakatə mjir Israila ku wutə duna, antə da pu mjir Kanana akwa hara ala ɗa kəthlər ar dwalikur, amma da aɗi kədləɓəla ɗa cipu wa.

²⁹Mjir Ifrayim aɗi mzhi kədləɓəla mjir Kanana na ka ndzi akwa Gezer wa, antə mjir Kanana ku ləkəma ka ndzi kəga da.

³⁰Mjir Zebulun aɗi mzhi kədləɓəla mji na ka ndzi akwa bərni Kitron ka Nahalol wa, antə mjir Kanana ku ləkəma ka ndzi kəga da. Amma da ku pu mjir Kanana ni akwa hara ala ɗa kəthlər ar dwalikur.

³¹Mjir Asher aɗi mzhi kədləɓəla mji na ka ndzi akwa bərniyayeri ar Akko, ka Sidon, ka Ahlab, ka Akzib, ka Helba, ka Afek, ka Rehob wa.

³²Antə mjir Asher ku ndzəndzi akwa nca mjir Kanana təng tə da aɗi mzhi kədləɓəla ɗa wa.

³³Mjir Naftali aɗi mzhi kədləɓəla mji na akwa ndzi akwa bərniyayeri ar Beth Shemesh ka Bethlanath wa, amma da ku pu mjir Kanana akwa hara kəthlər ar dwalikur. Apani antə mjir Naftali ku ndzi akwa nca mjir Kanana.

³⁴Mjir Amor ku ndzi ka duna antə da ku ngkatə ta mjir Dan a səghəi akwa bəbal. Apani mjir Dan ku ra ndzi akwa tsəɗi gar.

³⁵Tsuwa mjir Amor ku ndzangkir ka ndzəndzi akwa Ayalon, ka Shaalbim, ka Gar Heres. Amma mjir Ifrayim ka Manasse ku ləkəma ka ndzi ka duna ka pu mjir Amor akwa hara ala ɗa kəthlər ar dwalikur.

³⁶Kəla tsəɗiyir mjir Amor baɗita akwa Lakur Hiɗi ka vədza aka Sela ka ləmta.