Read bura-pabir Alkaliyayeri 10 Bible Online

Alkaliyayeri 10 - bura-pabir bible

Alkaliyayeri 10

¹Aghəla mtər Abimelek, Tola na ɓzər Puwa na ɓzər Dodo ku si ka tsa msərantə Israila. Tsa akwa nyarmbwar Issakar antə tsa ka ndzi ahar Shamir akwa tsəɗi gar ar Ifrayim.

²Tsa ku pwar mjir Israila ar məva sərkumari ka makər. Sakatə tsa ku mti mda harəmta ni ahar Shamir.

³Mdər pwara ar Israila na aghəla Tola an Yayir mdər Gileyad. Tsa ku pwar Israila ar məva sərkumari ka suɗa.

⁴Tsa ka maɗashili makkumari natə da ana fəl kwara makkumari. Da ka bərniyayeri makkumari akwa tsəɗi Gileyad natə ba ashina mda ana kəga ɗa kauyayeri ar Yayir.

⁵Yayir ku mti antə mdə ku harəmta ni ahar Kamon.

⁶Mjir Israila ku jaktə hara biku aka MTHLAKU. Da vəngkər səli aka Baal ka Astarte kəga haptayeri ar Siriya, ka Sidon, ka Mowab, ka Ammon, ka Filistiya. Da ku nggəlar MTHLAKU ka zhar ta vəngkər səli alari.

⁷Antə ɗəffa MTHLAKU ku ɓzi ata kəra mjir Israila, tə tsa ku zhar ka mjir Filistiya ka Ammon nggyari ɗa.

⁸Tsu akwa məva tə Yayir mta, antə mjir Filistiya ka Ammon ku baɗitə ɗar bwani aka mjir Israila. Antə mjir Israila na ka ndzi akwa tsəɗiyir mjir Amor raghəi ka Jodan akwa Gileyad ku ɗar bwani akira da ar məva kumnya ncisu.

⁹Antə har mjir Ammoni ku fəlɓəla Jodan ka ra mpa mjir Yahuda, ka Benjamin, ka Ifrayim. Antə su ngəni ku damitə mjir Israila.

¹⁰Antə mjir Israila ku tuwa aka MTHLAKU ka pəla, “Yeru ku hara biku ala gə kamnyar tə yeru ku zhar nga ka vəngkər səli aka Baal.”

¹¹Antə MTHLAKU shinau ala ɗa abbər, “I aɗi mbantə giri akwa tsiya mjir Masar, ka Amor, ka Ammon, ka mjir Filistiya wa ya?

¹²Mjir Sidon, ka Amalek, ka Mawon, ku nar bwani ala giri akwa saka na ku təramta. Antə sakatə giri ku tuwa ali, I aɗi msərantə giri akwa tsiya ɗa wa ya?

¹³Amma wala apani giri ku zhar ra ka vəngkər səli aka haptayeri, antə kulini I aɗi ata msərantə giri kəra wa.

¹⁴Mwar giri ra tuwa aka haptayeri tə giri ku carɓəla. Ndzi ka da msərantə giri kəlara sakatə giri ku ləkwa bwani.”

¹⁵Amma mjir Israila ku pəla aka MTHLAKU, “Yeru ku hara biku. Usa ka gə hara su tə gə hir ala yeru, amma kara msərantə yeru ashina.”

¹⁶Antə da pumta haptayeri ar mjir tsəɗi damwa ka vəngkər səli aka MTHLAKU. Antə ɗəffari ku ɓzi ata kəra bwaniyir mjir Israila.

¹⁷Ata saka na ndaga mjir Ammon ku ɗəmhədzər ləkwa mpa akwa Gileyad. Mjir Israila tsuwa ku si ata kəma duku ka fəli ahar Mizpa akwa Gileyad.

¹⁸Antə mji ol'olər Gileyad ku yu nvwa ɗa, “Wan ata pwar mburu akwa mpa kəga mjir Ammon ri? Kəlara mdə na ata mzhi pwar mburu akwa mpa ni ata ndzi olər mburu akwa Gileyad.”