Read bura-pabir Alkaliyayeri 11 Bible Online

Alkaliyayeri 11 - bura-pabir bible

Alkaliyayeri 11

¹Yefthla, na katsalar sojayeri akwa Gileyad an ɓzər mwala karwa. Babani Gileyad ka

²maɗashili damwa tə tsa ya ka mwalankiɗa, antə sakatə da ku kəla, da dwalita Yefthla ka tsa zhar kəyir ɗa. Da pəla alari, “Ga aɗi ata ɗar su wala duku akwa kifər baba' yeru wa, kamnyar ga ɓzər mwala damwa.”

³Antə Yefthla ku hwi kazhar maɗada'ni ka ra ndzəndzi akwa tsəɗi Tob. Antə anda tsa ku ndəkərta maɗa' shambar adzə ni.

⁴Akwa saka laga aghəla nda, mjir Ammon ku jaktə baɗitə mpa kəga mjir Israila ka damwa.

⁵Sakatə mjir Ammon ku pwa ata kəra ɗa antə mji ol'olər Gileyad ku mwari ahar Tob ka da ngka ka Yefthla.

⁶Da pəla alari, “Asəra ka gə pwar yeru ka mburu mpa mjir Ammon.”

⁷Amma Yefthla shinau ala ɗa, “Giri an nggəlar ra ka kədləɓəla ra kazhar kəyir baba'na. Kamnyar mi tə giri ata si adzə ra sakatə giri akwa bwani ri?”

⁸Da pəla aka Yefthla, “Kamnyar yeru akwa tur nga, ma ga ku pwar yeru akwa dlər mjir Ammon, yeru ata vəi nga ka gə ndzi olər shanga mjir Gileyad.”

⁹Yefthla shinau ala ɗa abbər, “Ma I mwari kəga giri, antə MTHLAKU hara tə I səm mjir Ammon, giri ata vəi ra kuthlir giri jiri ya?”

¹⁰Antə da amsa abbər, “Yeru ku kələngkər. MTHLAKU an seɗar mburu.”

¹¹Apani Yefthla ku mwari kəga mji ol'olər Gileyad antə da ku vəi ni kuthlir ɗa. Antə akwa tsaptədzər ɗa ahar Mizpa Yefthla ku zwarəngkər su tə tsa pəla aka mji ol'olər ɗa akwa mbwar vəngkər səli aka MTHLAKU.

¹²Təkəma aghəla tə mdə ku bartə kərari, antə Yefthla thlentə mji aka kuthlir Ammon ka da pəla, “Man su na paktə yeru kəga ga ri? Kamnyar mi tə gə dlər tsəɗiyir yeru ri?”

¹³Kuthlir Ammon shinau ala ɗa abbər, “Pəla giri aka Yefthla abbər sakatə mjir Israila ku səɓəla akwa Masar, da dlutsə tsəɗiyirna baɗita akwa Thlyagha Arnon ka mwari akwa Thlyagha Yabbok ka Thlyagha Jodan. Antə Kulini hamta giri tə vəi ɗəm ma giri ata bara lapiyakur.”

¹⁴Yefthla jaktə thlentə mji ni aka kuthlir Ammon,

¹⁵ka amsa ngəni, “Mjir Israila aɗi dlutsə tsəɗiyir mjir Mowab wala tsəɗi Ammon jiri wa.

¹⁶Su na hara an apani: sakatə mjir Israila ku zhar Masar, da nu mtaku ka si akwa Manda Duwathlu ka mzhitə Kadesh.

¹⁷Antə mjir Israila ku thlentə mji aka kuthlir Edom ka pəla, Ndzi ka yeru təramta akwa tsəɗiyir nga.” Amma kuthlir Edom aɗi hir ala ɗa wa. Da kiɗa akəla kuthlir Mowab, amma tsa aɗi hir tsu wa. Antə mjir Israila ndzəndzi akwa Kadesh.

¹⁸Aghəla nda da ku mwa akwa mtaku ka kalaktə tsəɗi Edom ka Mowab har ka si abwar raghəi ka Mowab, adzə Thlyagha Arnon. Da ku ɗar ndzi anda, amma da aɗi ɗar ləkwa tsəɗi Mowab wa.

¹⁹Antə mjir Israila ku thlentə mji aka Sihon, kuthlir Amor ahar Heshbon ka kiɗa abbər ka da təramta akwa tsəɗiyirni ka da mzhitə tsəɗiyir ɗa.

²⁰Amma Sihon aɗi kələngkər ka mjir Israila təramta wa. Tsa tsaptə sojayeri arni shang ata kəma duku ka fəli ahar Yahaz, ka mpa mjir Israila.

²¹Amma MTHLAKU na Hyelər Israila ku hamta ala ɗa nggyari su ata kəra Sihon kəga sojayeri arni. Antə mjir Israila ku dlutsə shanga tsəɗiyir mjir Amor na ka ndzi akwa bwa ndaga,

²²thlata akwa Arnon abwar anəm ka vədza aka Yabbok abwar yala, ka thlata akwa mtaku na abwar raghəi ka vədza aka Jodan abwar ramta.

²³“Antə MTHLAKU na Hyelər Israila an kədləɓəla mjir Amor aka mjirni Israila. Antə kamnyar mi tə yeru ata hamtari ala gə ri?

²⁴Kəsi shanga su tə haptər nga Kemosh ku na ala ga, ka yeru kəsi shanga su tə MTHLAKU na Hyelər yeru ku na ala yeru.

²⁵Nənga gə tamata abbər ga ku təramta Balak na ɓzər Zippor i? Tsa ku ndzi kuthlir Mowab, amma tsa aɗi ɗar beɗi ka Israila wala bara mpar yeru wa.

²⁶Mjir Israila ku ndzəndzi məva aru makər kulini akwa Heshbon ka Arower ka kauyayeri na kalaktə ɗa, ka akwa shanga bərniyayeri na ata mnya Thlyagha Arnon. Kamnyar mi tə ga aɗi dlutsə ɗa sakanda wa ri?

²⁷I aɗi hara ɗimikur ala gə wa. Amma ga an akwa hara ɗimikur ali ka bara mparna. MTHLAKU an alkali ar mwa. Tsa an ata pəlaɓəla mdə na ka jirkur akwa daɓwa mjir Israila ka mjir Ammon.”

²⁸Amma kuthlir Ammon ku psəngkər thləm aka ndərər Yefthla.

²⁹Antə mambələr MTHLAKU ku si ata kəra Yefthla. Antə tsa ku təramta akwa tsəɗiyir Gileyad ka Manasse atar Mizpa na akwa Gileyad. Thlatərni ahar Mizpa antə tsa mwari ahar mjir Ammon.

³⁰Yefthla ku hara alkawal aka MTHLAKU abbər, “Ma gə na ali nggyari su ata kəra mjir Ammon,

³¹I ata hamta ala gə kəlara su na ku səɓəla ntangkəma akwa kəyirna kamnyar lalitə ra akwa ngkarna akwa mpa ka mjir Ammon. I ata hamta ni saɗaka mbamba.”

³²Apani Yefthla ku təra ka sojayeri arni ka ra dlər mjir Ammon, antə MTHLAKU ku na alari nggyari su.

³³Yefthla ka sojayeri arni ku kurəmta mjir bərniyayeri sərkumari na akwa daɓwa Arower ka Minnith, ka damwa har ka vədza aka Abel Keramin. Apani mjir Israila ku nggyari mjir Ammon.

³⁴Sakatə Yefthla ku ngka ahar Mizpa, antə ngkwar ni ku səɓəla ka ɓathla akwa tsa kəcaikəcai kamnyar thlakəma baba'ni. Tsa an kura ngkwarni duku ɗeng, tsa aɗi ka ɓzər damwa wa.

³⁵Sakatə tsa wutə ngkwarni ni, antə tsa thləthləhumta ləptərni kamnyar ɗəffə ɓzəɓza. Tsa haptə kuraku ka pəla, “Ai, ngkwarna! Ga ku kuri ka iya! Kamnyar mi tə tar ga an ata sənta ali ɗəffə ɓzəɓza ngəni ri? I ku hara alkawal na ka duna aka MTHLAKU natə I amzhi ɓəliyari wa!”

³⁶Ngkwa ni pəla, “Baba, ma ga ku hara alkawal aka MTHLAKU, hara ali su tə ga ku ɗəmha akwa alkawal ar ngə ni. Kamnyar tə MTHLAKU ku hamta dawayeri ar nga na mjir Ammon akwa tsiya ga.

³⁷Amma zhar ra bu kəi ra kadla akwa garayeri kəi ra tuwa kəga gwarkayeri arna mnyar thliya suɗa, kamnyar tə I ata mta kula səndə sal.”

³⁸Yefthla shinau alari, “Ga mzhi Mwari.” Antə tsa ku təra kəga gwarkayeri arni ka hara thliya suɗa akwa garayeri ni akwa tuwa kamnyar tə tsa ata mta kula sal kula ɓzər.

³⁹Aghəla thliya suɗa antə tsa ku ngka adzə baba'ni. Antə baba'ni ku hara su tə tsa kətə alkawalari aka MTHLAKU. Antə tsa ku mti kula səndə sal. Antə su ngəni ku ndzi sur hara

⁴⁰akwa Israila, abbər tədək məva maɗankwi ana ləɓəla ar vir nfwar kamnyar tuwa ngkwar Yefthla.