Read bura-pabir Alkaliyayeri 12 Bible Online

Alkaliyayeri 12 - bura-pabir bible

Alkaliyayeri 12

¹Mjir Ifrayim ku tsaptədzi ka fəlɓəla Thlyagha Jodan, ka mwari ahar Zafon. Da thlentə ndər aka Yefthla abbər, “Kamnyar mi tə gə ra mpa mjir Ammon kula ga yu dlara akəla yeru ri? Yeru ata mbamta mbwar nga ka ga akwa!”

²Yefthla shinau ala ɗa abbər, “Ai I ku yu giri ka giri dlar ra, təng sakatə beɗi baɗitə ləkwa daɓwa yeru kəga mjir Ammon. Amma giri aɗi hir səɓəla wa.

³Sakatə yeru wuta abbər giri aɗi akwa si wa, antə yeru psəmta mpika yeru ka dlər mjir Ammon. Antə MTHLAKU ku hara tə yeru ku nggyari ɗa. Antə kamnyar mi tə giri sə mpa ra ri?”

⁴Mji ol'olər Ifrayim pəla, “Giri na mjir Gileyad, giri aɗi suma wa, giri si kamnyar ɗuwardzi akwa Ifrayim daci. Təng giri akwa ndzi akwa tsəɗiyir mjir Ifrayim ka Manasse apa mətəpi!” Antə Yefthla kəgatə sojayeri ar Gileyad, antə da dlər Ifrayim ka səm ɗa.

⁵Sojayeri ar Gileyad ku pwi mjir gadi akwa vəyayeri tə sojayeri ar Ifrayim ata mzhi fəlɓəla Thlyagha Jodan ka msəra ka ngka akwa tsəɗiyir ɗa. Kəlara saka natə mjir Ifrayim ata bara fəlɓəla thlyagha ni, mjir gadi ni ata yu ɗa abbər, “Gə mdər Ifrayim ya?” Ma tsa pəla, “Awa, I aɗi mdər Ifrayim wa”,

⁶mjir gadi ni ata pəla alari ka tsa pəla, “Shibboleth”, kamnyar tə da ku sənda abbər kyanggyara mjir Ifrayim ana mzhi pəlaɓəla “Shibboleth” wa. Antə ma tsa pəla, “Sibboleth”, da ata ngkəi ni ka da tsi ni anda. Apani da ku tsəgəi mjir Ifrayim dəpu nfwarkumari ka suɗa akwa mpa nda.

⁷Yefthla ku pwar mjir Israila ar məva ngkwa. Antə tsa ku mti, tə mdə harəmta ni akwa diyirni ahar Gileyad.

⁸Aghəla Yefthla, Ibzan na akwa Bethlelehem ku pwar mjir Israila.

⁹Tsa ka maɗashili makkumari ka maɗankwi makkumari. Tsa hamta maɗankwi ni aka mji na akwa nyarmbwa damwa, ka səntə maɗankwi makkumari akwa nyarmbwa damwa aka maɗashilərni ka da kəla. Ibzan ku pwar Israila ar məva murfa,

¹⁰kambəla tsa mta. Antə mdə ku harəmta ni ahar Bethlelehem.

¹¹Aghəla Ibzan, Elon na ahar Zebulun, ku pwar Israila ar məva kuma,

¹²kambəla tsa mta. Antə mdə ku harəmta ni ahar Aiyalon akwa tsəɗiyir Zebulun.

¹³Aghəla mtər Elon, Abdon na ɓzər Hillel, ahar Pirathlon, ku pwar Israila.

¹⁴Tsa ka maɗashili nfwarkumari ka kəkayeri makkumari, na ku fəl kwara murfəkumari. Abdon ku pwar Israila ar məva ncisu,

¹⁵kambəla tsa mta. Antə mdə ku harəmta ni ahar Pirathlon akwa tsəɗiyir Ifrayim na akwa gar ar mjir Amalek.