Read bura-pabir Alkaliyayeri 13 Bible Online

Alkaliyayeri 13 - bura-pabir bible

Alkaliyayeri 13

¹Mjir Israila ku jaktə hara biku aka MTHLAKU, antə tsa zhar tə mjir Filistiya hara kuthlikur ata kəra ɗa ar məva nfwarkumari.

²Ata saka nda mdə laga aɗi ka thləmari Manowa akwa nyarmbwar Dan na ka ndzi ahar Zora. Mwalankiɗa aɗi ɗar kəl hur wa, antə da aɗi ka ɓzər wa.

³Amma təng vir laga mdərthlentərhyel wutədzi aka mwala ni ka pəla, “Gə mwala ciri, amma ga ata sə kətə hur ka yaɓəla ɓzər sal.

⁴Antə ka gə hara hangkal, ga aɗiya sa yimər anap wala yimər anap na mwavər wa, wala səm su tə Hyel ku ngkatə səmari aka mdə wa.

⁵Ma sakatə ga ku yaɓəla ɓzər ngə ni, mda aɗiya shimta kərari wa, kamnyar baɗitə ka vir tə mdə yaɓəla ni har ka ləkəma tsa ata ndzi aka Hyel. Antə ɓzər ni ata baɗitə hara kəthlər ar msərantə mjir Israila akwa tsiya mjir Filistiya.”

⁶Mwala ni mwari ka pəla aka salngkiɗa, “Mdər Hyel laga ku si adzə ra. Tsa dludzi ka mdərthlentərhyel, kəmari ata hara thlivəra aka mda. I aɗi yu ni vəi tə tsa thlata ata wa, tsuwa tsa aɗi pəla ali thləmari wa.

⁷Amma tsa pəla abbər I ata sə kətə hur ka yaɓəla ɓzər sal. Tsa pəla I aɗiya sa yimər anap wala yimər anap na mwavər wa, wala səm su tə Hyel ku ngkatə mda səmari wa. Kamnyar mda ata sə hamta ɓzər ni aka Hyel har kurər mpikari.”

⁸Antə Manowa hara adduwa aka MTHLAKU ka pəla, “Usa MTHLAKU, zhar ka mdər Hyel ni jaktə ngka adzə yeru, ka tsa pəla ala yeru su tə ka yeru hara aka ɓzər ngəni ma sakatə mdə ku yaɓəla ni.”

⁹Hyel ku nggatə kiɗər Manowa, antə mdərthlentərhyel ku jaktə si adzə mwala ni akwa faku. Amma ata saka nda mdərkəyirni Manowa aɗi adzə ni wa,

¹⁰antə tsa hwi ka mwari ra pəla alari, “Mdə na si adzə ra vir nda ni ku jaktə si.”

¹¹Təkəma Manowa nutə mwalankiɗa ka si adzə mdə ni ka yu ni abbər, “Ga an mdə na gari aka mwalankiya ni ya?” Antə mdərthlentərhyel ni pəla, “I, Iya.”

¹²Antə Manowa pəla, “Ka ma sakatə su tə gə pəla ni ku hara jiri, man su tə ka ɓzər ni sə hara ri? Tsuwa man jili kəthlər tə tsa ata sə harari ri?”

¹³Mdərthlentərhyel ni shinau alari abbər, “Ka gə wuta abbər mwalankiri ku ɓəlatə shanga su tə I pəla alari.

¹⁴Tsa aɗiya səm kəlara su tə mdə nam ka yar nfur anap wa, wala sa yimər anap na mwavər wa, wala səm su tə Hyel ku ngkatə səmari aka mdə wa. Ka tsa ɓəlatə shanga su tə I ku pəla alari.”

¹⁵Antə Manowa pəla aka mdərthlentərhyel ni, “Yeru ata kəsəmta nga diya ka yeru namta ala gə ɓzər kwi kara ɗari.”

¹⁶“Suma aɗi wa, I ata ngkasəli”, ndə Mdərthlentərhyel, “Wala tə I aɗi ata səm susəmər giri wa. Amma ma ga ata hir hamta kwi ni saɗaka mbamba aka MTHLAKU, ata hara ɓɗaku.” Manowa aɗi sənda abbər tsa akwa gari ka mdərthlentərhyel wa.

¹⁷Manowa pəla, “Ka thləma ga mə kwang? Kamnyar yeru ata sə hir ɗangtə nga ma sakatə ɓzər ni ku yaɓəladzi.”

¹⁸“Ai aɗi tar kara səndə thləmi wa”, ndə mdərthlentərhyel ni, “Tsuwa wala ga an sənda, ga aɗi ata nggaɓəlari wa.”

¹⁹Antə Manowa ku kətə ɓzər kwi ni ka mpwa ka mwanta ata kəra pela na ola, ka hamta saɗaka mbamba kəgari aka MTHLAKU, tsa na ana hara surndata.

²⁰Antə sakatə kyanggyara u'u ni akwa mba ka ləmta dwaɗu ahar hyel, təng Manowa ka mwalankiɗa wutə mdərthlentərhyel ni akwa ləmta ahar hyel akwa kyanggyara u'u ni. Antə tsa ka mwalankiɗa ku ndla ka kəma ɗa ata di. Da aɗi jaktə wutə mdərthlentərhyel ni kəra wa.

²¹Mdərthlentərhyel ni aɗi jaktə ngka adzə Manowa ka mwalankiɗa kəra wa. Apani Manowa ku nggaɓəla abbər mdərthlentərhyel an si ni.

²²Antə tsa pəla aka mwalankiɗa, “Mwa ata mta kamnyar mwa ku wutə Hyel!”

²³Amma mwalankiɗa pəla, “Ma MTHLAKU an akwa bara kəl mpika mwa, sakani tsa aɗi ata dlu saɗakar mwa wa. Sakani ma tsa aɗi ata ncanta ala mwa suayeri ngəni wa, wala pəla ala mwa abbər mwa ata wutə ɓzər wa.”

²⁴Aghəla nda, mwala ni ku ya ɓzər sal, antə da ku vətə thləm alari Samsən. Antə ɓzəngkyar ni ku kəli ka barkar MTHLAKU ata kərari.

²⁵Antə mambələr MTHLAKU ku pwar ni ka mwantə ni akwa vəi fəliyir Dan akwa daɓwa Zora ka Eshtawol ka dunautə ni.