Read bura-pabir Alkaliyayeri 15 Bible Online

Alkaliyayeri 15 - bura-pabir bible

Alkaliyayeri 15

¹Aghəla nda, akwa sakar thla alkama antə Samsən kətə ɓzər kwi ka mwanta aka mwalankiɗa. Tsa pəla aka baba' mwalankiɗa abbər, “Ndzi kəi ləmbwa adzə mwalankiya.” Amma tsa aɗi hir ka tsa ləmbwa wa.

²Tsa pəla aka Samsən, “I kəta abbər ga ku nggəlar ni antə I ku hamta ni aka pazhi na ola ar nga. Amma ngkwarma'ni aɗi na ɓɗakta tsa. Ga ata mzhi kəl ni ata vəyari.”

³Antə Samsən pəla, “To, kulini kəlara su tə I hara aka mjir Filistiya aɗi ata ndzi bikərna wa!”

⁴Tsa mwari ka ngkəi pwaghayeri aru makər ka paktə ɗa suɗsuɗa, ka mbwahə kura ɗa ka dasa na ləɓləɓari ka mal.

⁵Samsən mwantə pwaghayeri ni akwa fakər alkama ar mjir Filistiya na abaka thla. Antə tsa njita u'u ata dasayeri ni ka psi pwaghayeri ni. Apani tsa ku mbamta sur fakər ɗa shang natə mdə ku thli kəga na tsu ata hyel. Tsuwa tsa ku mbamta fakayeri ar anap ka zaitun arɗa.

⁶Mjir Filistiya yuwa abbər, “Wan hara su ngəni ri?” Antə mdə pəla ala ɗa abbər, “Samsən an hara kamnyar baba' mwalankiɗa ku kətə mwalankiɗa ka hamta aka pazhir Samsən.” Antə mjir Filistiya ku mwari ka mbamta mwala ni ka baba'ni.

⁷Antə Samsən pəla ala ɗa, “Apani antə giri hara ya? To, giri ata wutə ra ai, tar mi ntəmta!”

⁸Apani Samsən ku pwa ata kəra ɗa ka mpa ka tsəgəi ɗa hang. Antə tsa ku təra ka ra ɗuwardzi akwa daɓwa gagəma akwa gar Etam.

⁹Aɗi fəi wa təng mjir Filistiya mwari ka pwi sojayeri arɗa akwa Yahuda ka dlər di Lehi.

¹⁰Mjir Yahuda yu ɗa, “Kamnyar mi tə giri akwa dlər yeru ri?” Antə da pəla, “Yeru si ka yeru ngkəi Samsən ka yeru hara alari tsu apatə tsa ku hara ala yeru.”

¹¹Antə mjir Yahuda dəpu makər ku ləkwa daɓwa gagəma na ntaudzi ahar Etam, ka pəla aka Samsən, “Ga aɗi sənda abbər mburu akwa tsiya mjir Filistiya wa ya? Man tə gə hara ala mburu apani ri?” Antə Samsən shinau abbər, “I ntə su tə da hara ali diya daci.”

¹²Mjir Yahuda pəla alari “Yeru ku si ka yeru mbwi nga ka yeru hamta nga ala ɗa.” Samsən pəla, “Pəla giri ali abbər giri ka kəra giri aɗi ata tsəkwar ra wa.”

¹³Da pəla, “Təng yeru ata mbwi nga ka yeru hamta nga ala ɗa, yeru aɗi ata tsəkwar ngə wa.” Antə da ku mbwi ni ka səwu na bilən suɗa ka səɓəla ka tsa akwa gar ni.

¹⁴Sakatə tsa ku si ahar Lehi antə mjir Filistiya ku hwi mwari adzə ni ka harangkər alari kuraku. Təkəma mambələr MTHLAKU ku dunautə ni, antə tsa ku nthləmta səwu natə da ku pərta ni kəgari ni kasəla apa zarar puwa.

¹⁵Tsa ha ncari ka wutə ɗethlər mnyaraghəya kwara na haɗa mta. Antə tsa ku kətə ka tsəgəi mji dəpu kəgari.

¹⁶Aghəla mpa ni antə Samsən ku thla ha abbər, “Ka ɗethlər mnyaraghəya kwara I ku tsi mji shili dəpu. Ka ɗethlər mnyaraghəya kwara I ku tsaptə ka tsaptə ɗa.”

¹⁷Aghəla nda antə tsa ku psəmta ɗethlu ni. Mda ana kəga vəi tə su ngəni hara ata abbər Ramath Lehi.

¹⁸Samsən ku nggatə thləli antə tsa hara adduwa aka MTHLAKU abbər, “Ga an dlar ra tə I ku nggyari dlamar sojayeri ngəni. Kulini dlar ra usa ta thləli ni atsi ra, ka dur gapani ni sə təra ka mshiyirna.”

¹⁹Antə MTHLAKU ku kəlar gula laga akwa di anda ahar Lehi, antə yimi ku səɓəla akwa, antə Samsən ku sa ka wutə duna. Antə tsa ku vətə thləm aka kucirkila ngəni abbər, “Kucirkilar Mdə Na Tuwa.” Antə kucirkila ngəni tsu anda ahar Lehi.

²⁰Samsən ku pwar mjir Israila mnyar məva sərkumari akwa sakatə mjir Filistiya an ka kuthlikur ata kəra ɗa.