Read bura-pabir Alkaliyayeri 16 Bible Online

Alkaliyayeri 16 - bura-pabir bible

Alkaliyayeri 16

¹Vir laga Samsən ku ləhar Gaza akwa tsəɗiyir Filistiya ka wutə karwa laga ka ləmbwa ka pi ka tsa.

²Mjir Gaza ku nggata abbər Samsən anda, antə da kalaktə kəi ni akwa səka ni akwa nyarfur bərni ni ba aviri. Aviri ni da ndzi ɗiɗi, kamnyar da tamata abbər ma viri ku kuri da ata ngkəi ni ka da tsi ni.

³Amma Samsən thlata ata kərathlər viri ka mwari akwa nyarfur di. Tsa tamtə tapərar nyarfu ni ka ntsuɓəla akwa di. Antə tsa vəta ata pathlahari ka mwanta ata kəra gar na awul Hebron.

⁴Aghəla nda, Samsən ləkwa ləka mwala laga ka thləmari Delila na ka ndzi akwa mular ar Sorek.

⁵Kuthlyayeri na ntəfu ar Filistiya ku mwari adzə mwala ni ka pəla, “Ndəkərtə hangkala Samsən ka ɗəɗukur ka tsa pəlaɓəla ala gə su na hara tə tsa ndzi ka duna ni ka su na ata ɓəli ni. Antə yeru ata mbwi ni tə tsa amzhi hara su kəra wa, antə kəlara mda akwa nca yeru ata hamta ala ga adzərfa dəpu pal ka aru pal.”

⁶Sakatə Samsən jaktə ngka antə Delila pəla alari, “Usa pəla ali su na hara tə gə ndzi ka duna ni. Ma I ata bara mbwi nga man su tə kəi hara ri?”

⁷Samsən pəla, “Ma mda mbwi ra ka dzər miraku na aɗi ula wa pal pal murfa, I ata ndzi kula duna apa kəlara mda.”

⁸Antə kuthlyayeri ar Filistiya ku səntə dzər miraku na aɗi ula wa murfa aka Delila, antə tsa ku mbwi Samsən kəgari.

⁹Azha shang tsa ku kurtə pwi mji akwa mbwa damwa, antə tsa ku hara kuraku ka duna, “Samsən! Mjir Filistiya akwa si!” Amma tə Samsən nggatə su ngəni antə tsa nthləthləmta dzər ni apa zarar puwa akwa u'u. Apani da aɗi nggaɓəla ashira dunarni wa.

¹⁰Aghəla nda, Delila pəla aka Samsən, “Wuta ga ku pwaktə ra ka thlandər ali. Ga aɗi pəla ali jirkur wa. Usa pəla ali laku tə mda ata mzhi mbwi nga.”

¹¹Samsən shinau ka pəla, “Ma mda mbwi ra ka səwu bilən tə mda aɗi ɗar hara kəthlər kəgari wa. I ata ndzi kula duna apa kəlara mda.”

¹²Antə Delila ku kətə səwu bilən ka mbwi ni kəgari sakatə mjir Filistiya ku jaktə ɗuwardzi akwa mbwa nda. Delila jaktə hara kuraku ka duna akwa pəla, “Samsən! Mjir Filistiya akwa si!” Amma tsa ku nthlənthləmta səwu ni apa zarar puwa.

¹³Delila pəla aka Samsən abbər, “Ba kulini təng gə ndzi akwa zwalitə ra ka pwaktə ra. Pəla ali laku tə I ata mzhi mbwi nga akwa.” Samsən shinau ka pəla, “Ma ga ɗəmtə shishir kəri na ndwalndwalari murfə ni ka puwar nggira, ka tsau akwa garga tə mdə kukwi antə I ata ndzi kula duna apa kəlara mda.”

¹⁴Sakatə Samsən akwa heni antə Delila ku ɗəmtə shishir kəra Samsən ka puwar nggira, ka tsau akwa garga tə tsa kukwi. Antə tsa ku hara kuraku ka duna ka pəla, “Samsən! Mjir Filistiya akwa si!” Amma tsa mbuhta ka ntsuɓəla garga ni akwa di ka banggwa, ka ntsuɓəla shishir kərari akwa puwa ni.

¹⁵Antə Delila pəla aka Samsən, “Apa madi tə ga ata pəla abbər gə hir ra, amma ga aɗi mbərsa ka iya wa ri? Ga ku pwaktə ra ka makər, antə ba kulini ga aɗi pəla ali su na namtə nga ka duna ni wa.”

¹⁶Tsa ndzangkir alari ka damitə ni ka yu su ngəni tədək viri har tə ɗəffa Samsən ɓzi.

¹⁷Aghəla nda antə Samsən ku pəla alari jirkur, “Mdə ku hamta ra aka Hyel təng tə mdə ya ra, antə mda aɗi ɗar shimta kəri wa. Ma mdə ku shimta shishir kəri, I ata ndzi kula duna apa kəlara mda.”

¹⁸Sakatə Delila ku wuta abbər tsa ku pəla alari jirkur, tsa thlenta aka kuthlyayeri ar Filistiya ka pəla, “Ngka giri ka damwa, tsa ku pəla ali jirkur!” Antə da ku ngka ka səntə kwaba ni.

¹⁹Delila vu tə Samsən ku heni ata kiɗari, antə tsa kəga mda ka tsa sə shimta shishir kərari na ndwalndwalari murfə ni. Antə mwala ni baɗitə nar bwani kamnyar dunarni ku zhar ni.

²⁰Antə Delila ku kəga ka kuraku na ola, “Samsən, Mjir Filistiya akwa si!” Samsən mbuhta ka dzama abbər tsa ata nggyari ɗa ka msəra apatə tsa ana hara hwatu. Tsa aɗi sənda abbər MTHLAKU ku zhar ni wa.

²¹Apani mjir Filistiya ku ngkəi ni ka tuhurɓəla ncari. Da mwantə ni akwa mbwar pərsəna ahar Gaza, ka mbwi ni ka məsəsal ar əmza. Antə da ku vu ni ka tsa nggur bur kamnyar hadla mthli.

²²Amma aɗi fəi wa təng shishir kərari baɗitə ptsa ka damwa.

²³Kuthlyayeri ar Filistiya ku tsaptədzi ka da hara kucali ka hamta saɗaka aka haptər ɗa, Dagon. Da hara ha abbər, “Haptər yeru ku na ala yeru nggyari su ata kəra dawar yeru, Samsən.”

²⁴Sakatə da wutə ni antə da ku hu haptər ɗa akwa pəla, “Haptər yeru ku ngkəi dawar yeru ala yeru, mdə na tsi mjir yeru dlama dlama, ka hilanta ala yeru tsəɗiyir yeru ni!”

²⁵Sakatə da ku ndlə kalkal antə da pəla, “Kəɓəla giri ala yeru Samsən ka tsa hara ala yeru gyali.” Antə mdə ku kəɓəla ni akwa kəi pərsəna, ka vu tə tsa thləthlata akwa daɓwa zhimbwalayeri suɗa.

²⁶Samsən pəla aka ɓzəngkyar na ata ndəkər alari zwal ni, “Ndzi kəi tsəkwar zhimbwalayeri na kəsi mbwa ni. I ata bara perdzə kərna.”

²⁷Mbwa ni ku nghyi ka mji kacakaca, shili ka mwanki. Shanga kuthlyayeri ar Filistiya na ntəfu ni anda, antə mji ku mwantə dəpu makər amta ata kəra mbwa ni, na akwa wul Samsən akwa gyali ka kumshi ni.

²⁸Antə Samsən ku hara adduwa, “Ai MTHLAKU na ka Duna ta Shang, ka gə ɗangtə ra bu. Ka gə na ali duna wala ka duku Usa MTHLAKU, kamnyar kəi ntəmta su tə mjir Filistiya hara aka nci ni.”

²⁹Antə Samsən ku pudza tsiyari aka zhimbwalayeri na kəsi mbwa ni ata ɗəffu. Tsi mazəmari ata zhimbwal pal, tsi matsəkarari ata damwa abwanda antə tsa bukə ɗa ka duna.

³⁰Antə tsa hara adduwa ka pəla, “Ndzi kəi mta kəga mjir Filistiya!” Tsa bukə ɗa ka dunari shang, antə mbwa ni ku ndlangkərdzi aka kuthlyayeri na ntəfu ni kəga shanga mji na anda. Apani Samsən ku tsi mji akwa sakar mtərni hang ta sakatə tsa ka mpika.

³¹Aghəla nda, maɗama'ni kəga yangkurari ku si ka kətə mshiyirni. Da ku mwari ka harəmta ni akwa daɓwa Zora ka Eshtawol akwa kulər baba'ni Manowa. Tsa ku ndzi mdər pwara ar Israila ar məva sərkumari.