Read bura-pabir Alkaliyayeri 17 Bible Online

Alkaliyayeri 17 - bura-pabir bible

Alkaliyayeri 17

¹Mdə laga aɗi ka thləmari Mika akwa tsəɗi gar ar Ifrayim

²Vir laga tsa pəla aka mama'ni, “Ga ata mzhi ɗangtə liyar adzərfar nga dəpu pal ka aru pal tə mdə həlta akəla ga ni ya? Ai I anda sakatə gə shuwumta kəlara mdə na kətə ni. To, ai mama I an kəta, nggədza kwaba ni.” Antə mama'ni pəla, “Ka MTHLAKU vədzə barka ala gə ɓzərna!”

³Sakatə Mika ku hamta kwaba ni aka mama'ni, mama'ni pəla, “I ata hamta kwaba ni aka MTHLAKU. Mda ata namtə haptu ka udzəm ka fəi dzari ka adzərfa. Antə kulini I ata jaktə na gə adzərfa ni.”

⁴Amma Mika ku jaktə hamta aka mama'ni. Antə mwala ni kətə liyar adzərfa aru suɗa ka hamta aka mdər ɓdlə adzərfa na ku namtə haptu kəgari. Da marəmta udzəm ni ka fəi dzari ka adzərfa, ka mwanta akwa mbwar Mika.

⁵Mika ka vəi haptu ar kərari, antə tsa namtə efod ar nggaɓəla su na akwa ɗəffa Hyel ka haptayeri ar kutakəi, ka vəi pal akwa nca maɗa'ni tə tsa ndzi prist.

⁶Akwa saka na ndaga kuthli aɗi akwa Israila wa, antə waskəi ana hara kəlara su tə tsa hira.

⁷Vir laga ɓzərdakwi laga na mdər Lawi na ka ndzi ahar Bethlelehem akwa tsəɗi Yahuda

⁸ku mwari akwa tsəɗi gar ar Ifrayim kamnyar bara vəi ndzəndzi na ɓɗakari. Antə akwa mwarni tsa ku sə pəra aviyar Mika.

⁹Mika ku yu ni, “Gə thlata ama ri?” Antə tsa shinau ka pəla, “I mdər Lawi ahar Bethlelehem akwa Yahuda. I akwa bara vəi tə I ata ndzəndzi ata.”

¹⁰Mika pəla alari, “Asəra ka mwa ndzəndzi, ka gə ndzi mdər ni sauri ka prist arna. I ata na ala ga adzərfa kuma akwa məva, ka kari hata, kəi hamta ala gə susəma.”

¹¹Ɓzər dakwi Lawi ni ku kələngkər ka tsa ndzəndzi ka Mika, antə tsa ku ndzi apa ɓzər kuta Mika.

¹²Apani Mika ku vəi ni prist antə tsa ku ndzəndzi aviyar Mika.

¹³Antə Mika pəla, “Kulini tə I ka mdər Lawi na prist arna, I ku sənda abbər MTHLAKU ata hir kəi wutə ləkəma.”