Read bura-pabir Alkaliyayeri 18 Bible Online

Alkaliyayeri 18 - bura-pabir bible

Alkaliyayeri 18

¹Su nayeri ni ku hara akwa sakatə Israila aɗi ɗar ndzi ka kuthli katagu wa. Akwa saka ngəni nyarmbwar Dan akwa bara vəi tə ka da ndzəndzi akwa na ar kəra ɗa. Mambila nyarmbwayeri na akwa Israila shang ku wutə tsəɗiyir kəra ɗa, amma nyarmbwar Dan aɗi wutə wa.

²Antə mjir Dan ku carɓəla katsalayeri ntəfu akwa nyarmbwar ɗa na ka ndzi ahar Zora ka Eshtawol, ka da ra wulɓəla tsəɗi tə da ata sə ndzi akwa. Sakatə da ku mzhitə tsəɗi gar ar Ifrayim, antə vir laga tahaku da fəli aviyar Mika.

³Sakatə da nggaɓəla abbər kyanggyara ɓzərdakwi ni apa kyanggyara mjir Lawi, da shahədzi ka yu ni abbər, “Man tə ga akwa harari azi ri? Wan səntə nga azi ri?”

⁴Antə tsa shinau ka pəla, “Mika an kətə ra kəi hara kəthlər prist alari, antə tsa ana ntə ra.”

⁵Da pəla alari, “Usa, yuɓəla ala yeru akəla Hyel nuhum yeru ata wutə saa akwa mwar yeru ni.”

⁶Prist pəla ala ɗa, “Giri aɗiya damitədzi wa. MTHLAKU ata ɓəlatə giri akwa mwar giri ni.”

⁷Antə mji ngəni ntəfu ni ku təra ka mwari ahar Layish ka wutə mji na anda akwa ndzəndzi msərmsərkur apa mjir Sidon. Da akwa ndzəndzi msərakur kula thlivəra. Tsuwa da mji na ka su kamnyar fakayeri arɗa ɓɗakɓɗaku antə da aɗi ka tur su wa. Da ndzəndzi ciju ka mjir Sidon antə su aɗi na paktə ɗa kəga mji damwa wa.

⁸Sakatə mji na ntəfu ni ngka ahar Zora ka Eshtawol, mjir ɗa ku yu ɗa, “Giri ku wuta ala mburu tsəɗi laga ya?”

⁹Antə da shinau abbər, “Asəra giri ka mburu ra dlər mjir Layish. Yeru ku wutə tsəɗi ni, antə tsa ɓɗaku. Giri aɗiya shamta saka wa, mburu atəra ra dlutsə ri!

¹⁰Ma sakatə giri ku mwari anda, giri ata wuta abbər mji ni akwa ndzəndzi akwa msərmsərkur. Tsa tsəɗi na ola ka shanga su tə mda ata turari akwa. Antə Hyel ku hamta ala mburu.”

¹¹Antə mji aru ngkwa akwa nyarmbwar Dan ku zhar Zora ka Eshtawol ɗəmhəɗəmhari kamnyar mpa.

¹²Da mwari ka ndzəndzi abwar ramta ka Kiriyath Yeyarim akwa Yahuda. An su na hara tə ba kulini mda ana kəga vəi ni abbər, “Mahanedan”, Vəi Fəliyir Dan

¹³Da thlata anda ka mwari ahar Mika akwa tsəɗi gar ar Ifrayim.

¹⁴Antə mji na ntəfu ni pəla aka mjir mwar ɗa abbər, “Gira sənda abbər haptu aɗi natə mdə namtə ka udzəm ka fəi dzari ka adzərfa akwa dukwa mbwayeri ni ya? Tsuwa haptayeri damwa aɗi ka sur ndzəl su pal. Man tə giri tamatə ka mburu hara ri?”

¹⁵Antə da ngka ka ləvəyar Mika, kəi tə ɓzərdakwi Lawi ni andzəndzi akwa, ka thlawar mdər Lawi ni.

¹⁶Akwa saka ngəni sojayeri ar Dan na aru ngkwa ni ku thləthlata akwa nyarfu ɗəmhəɗəmhari ka kari' mpa.

¹⁷Mjir wul ashir na ntəfu ni ku ləkwa mashiɗu ka kətə haptu tə mdə nam ka udzəm ka fəi dzari ka adzərfa, ka fatə haptayeri damwa ka sur ndzəlsu ar prist ni. Sakanda prist ni athləthlata aɓəla kəga sojayeri na aru ngkwa ni.

¹⁸Sakatə mji ni ləvəyar Mika ka fatə shanga su na ɓɗakɓɗaku akwa mashiɗu ni prist ku yu ɗa, “Man tə giri akwa harari ri?”

¹⁹Da pəla alari, “Ndzi ɗiɗi ka gə nu yeru, ka gə ndzi ala yeru prist ka mdər nar sauri aka Israila. Aɗi təramta ala gə kara ndzi prist ar shanga Israila ta ga andzi prist ar kutakəyir mdə duku wa ya?”

²⁰Kaai, gari ngəni ku namtə ɗəffa prist ni. Antə tsa ku fatə sur kuta mashiɗu ni ka nu ɗa.

²¹Da pu maɗa' ɗa, ka mwaɓiyayeri, ka shanga kariyir ɗa akəma ɗa ka pwa aghəla ɗa ka təra.

²²Sakatə da ku kurtə ka təra ciju antə Mika ku kəgaɓəla ntəwulayeri arni ka da səɓəla kamnyar mpa. Da ku nu mjir Dan ka kəli ɗa akwa laku.

²³Da ndəra ala ɗa ka kurakər mpa na ola aka mjir Dan. Antə mjir Dan shinardzi ka pəla aka Mika, “Man harari? Kamnyar mi tə ga akwa nu yeru ka dlamar mji ngəni ri?”

²⁴Mika shinau ka pəla, “Giri ku kətə prist arna kəga haptayeri natə I namtə ka təra kəga ri! Apa madi tə giri ata jaktə yu su na hara ri? Man mbila ali ri?”

²⁵Mjir Dan pəla, “Kuji gə dləɓ səri, kara nggangga yeru! Kamnyar bwadukwa yeru ka ɗəffa ɗa kudzəha. Antə ma ɗəffa ɗa ku ɓzi da ata tsi nga kəga mjir kutakəyir nga.”

²⁶Apani mjir Dan ku psi laku ka təra. Sakatə Mika wuta abbər tsa amzhi nggyari ɗa wa, tsa ngka avi.

²⁷Sakatə mjir Dan ku təra ka suayeri tə Mika ku namtə kəga prist arni, da ku mwari ahar Layish, di na ka msərmsərkur ka lapiyakur. Antə da ku dlər ɗa ka tsəgəi shanga mji, ka mbamta di ni.

²⁸Su ngəni hara akwa Mular ar Beth Rehob. Mji aɗi na səɓəla ka mbul ɗa wa, kamnyar da aɗi ka ntəwulər di na kudzəha wa. Daɓwa Layish ka Sidon an ciju. Apani mjir Dan ku jaktə həntə di ni ka ndzəndzi akwa.

²⁹Da pali thləma di ni tə tsa ndzi Dan, kəkar ɗa na ɓzər Yakub. Hwatu thləma di ni an Layish.

³⁰Mjir Dan ku nci haptayeri ni ka vəngkər Jonathlan na ɓzər Gershom, kəkar Musa ka tsa ndzi prist aka mjir Dan. Antə mjir kutakəyir Jonathlan ku ləkəma ka ndzi pristayeri aka nyarmbwar Dan har ka vədza aka sakatə mdə fatə mjir di ni ka mwantə ɗa akwa mafakur.

³¹Da ku zhar haptər Mika ni tsu anda akwa sakatə tentər vəngkər səli aka Hyel ku ndzi ahar Shilo.