Read bura-pabir Alkaliyayeri 19 Bible Online

Alkaliyayeri 19 - bura-pabir bible

Alkaliyayeri 19

¹Akwa saka ndaga tə Israila aɗi ka kuthli katagu wa, mdər Lawi laga aɗi na ka ndzi akwa tsəɗi gar ar Ifrayim. Vir laga tsa səvi ka bangərni na ngkwar di Bethlelehem akwa Yahuda,

²Amma mwala ni akwa hara karwakur, antə tsa ku ngka avi adzə baba'ni ahar Bethlelehem ka hara thliya nfwar anda.

³Antə mdə ni ku kətə buɗar ni ka kwara suɗa ka nu ni, ka kiɗə kərari ka tsa ngka adzə ni. Mwala ni ku ləvəi ka tsa aviyar baba'ni. Sakatə baba' mwala ni wutə mdər Lawi ni ɗəffari ku ndzi msəra alari, antə tsa ku dlu ni ka kucali.

⁴Baba mwala ni ku ndzangkir kiɗə mdə ni ka tsa ɗar pi. Antə mdə ni ku hara vir makər, tsa akwa səm ka sa ka pi anda.

⁵Akwa vir na nfwarkur mdə ni thlatə ɗəm ka ɗəmhədzi kamnyar təra. Amma baba' mwala ni pəla aka mdər Lawi ni abbər, “Ndzi ka ra ɗar su katagu kambəla ga təra.”

⁶Antə japwa ɗa ndzəndzi ata kəma duku ka səm ka sa. Baba mwala ni pəla alari, “Jakta pi bu ka ra nggatə msəra.”

⁷Mdər Lawi ni thlata abbər tsa ata təra, amma baba' mwala ni ndzangkir alari ka tsa jaktə pi, antə tsa ku sə kələngkər ka pi.

⁸Akwa vir na ntəfkur mdə ni thlatə ɗəm ka ɗəmhədzi kamnyar təra. Amma baba' mwala ni pəla aka mdər Lawi ni abbər, “Ntsari səl kara ɗar su katagu. Gə tsu asə təra ma pci ku mbalidzi raka.” Antə da ku ndzəndzi ka səm su ata kəma duku.

⁹Sakatə mdə ni ka bangərni ka buɗarni ku thlatə kamnyar ka da təra, baba' mwala ni pəla, “Ai pci aɗi ol kəra wa, nuhum giri asə ləvəi aviri. Kuji ka giri pi ka ra nggatə msəra, ma ɗəpa mbing ka giri psi laku.”

¹⁰Amma mdə ni aɗi ata bara jaktə pi anda wa. Apani tsa putə sərɗu ata kwarayeri arni suɗa, antə tsa, ka bangərni, ka buɗarni ku təra ka nu təbwar Yebusi, di tə mda ana kəga kulini Urushalima.

¹¹Da mzhitə Yebusi ka mnya tahaku, antə buɗar mdə ni pəla aka mdərkəyirni, “Viri ata sə ngkəi mburu, antə kuji ka mburu pəra ka pi akwa diyir mjir Yebusi ni.”

¹²Amma mdərkəyirni pəla, “Awa, mburu aɗi ata pəra akwa di ngəni wa. Mjir Israila aɗi azi wa. Mburu ata ra pi ahar Gibeya.

¹³Haptə giri səla giri, kamnyar mburu ata wutə vəi pi ahar Gigeya wala ahar Rama.”

¹⁴Antə da ku təramta Yebusi ka ləkəma. Pci akwa təri da akwa mzhitə Gibeya, pal akwa nca kauyayeri na akwa tsəɗi Benjamin,

¹⁵antə da ku pəra ka da pi anda. Da mwari ka ndzi akwa bəbal kuta di, amma mda aɗi na pəla ka da ləvəi ka pəpəi aharngkiɗa wa.

¹⁶Sakatə da anda an tə mdə halhal laga thlata akwa fakəu akwa təramta, Hwatu tsa mdər tsəɗiyir gar ar Ifrayim, amma kulini tsa ka ndzi ahar Gibeya, diyir mjir Benjamin.

¹⁷Sakatə mdə halhala ni wutə mjir lənggu ngəni akwa bəbal ni antə tsa yu ɗa, “Giri thlata ama ri? Tsuwa giri ata ləma ri?”

¹⁸Mdər Lawi ni shinau ka pəla, “Hwatu yeru ndzi ahar Bethlelehem akwa Yahuda, kulini yeru akwa lakur ləha akwa di na ciju akwa tsəɗi gar ar Ifrayim. Amma mda aɗi na ndər ala yeru ka yeru pi aharngkiɗa wa.

¹⁹Yeru ka kusar aka kwarayeri ar yeru, ka buradi ka yimər anap ar yeru, su aɗi tə yeru ata tura ri wa tar mbwar pi.”

²⁰Mda halhal ni pəla, “Asəra giri ka mburu ləharngkiya! I ata wulwul giri, aɗi kalkal ka giri pi azi ata bəbal ni wa.”

²¹An tə mdə halhal ni ku ləvəi ka da ka na ala ɗa susəma ka aka kwarar ɗa. Mətəpiyayeri ni ku wutə yimi ka kəcimta səla ɗa ka səma ka sa.

²²Sakatə da akwa nggatə msərakur susəma, antə maɗa' shambar ar kuta di ni ku si ka kalaktə mbwa ni. Da akwa tsa nyarmbwa ka duna ka pəla aka mdə halhal ni abbər, “Səɓəla ka mji natə ga sənta aharngkiri ni! Yeru ata bara pi ka da!”

²³Amma mda halhal ni ləɓəla ka pəla ala ɗa, “Aiya maɗama' giri aɗiya hara su ngəni ɗimi ni wa, kamnyar mji ngəni da an mətəpiyirna. Usa giri aɗiya hara su ngəni ɗimi ni ala ɗa wa.

²⁴Nggədza giri bangərni ni ka ngkwarna na aɗi səndə sal wa. I ata səntə ɗa aɓəla ala giri ka giri hara su tə giri hir ala ɗa, amma usa giri aɗiya hara su ngəni aka mji ngəni wa.”

²⁵Amma maɗa' shambar ni aɗi ata ngga ni wa. Apani mdər Lawi ni ngkəi bangərni ni ka haɓəla ni ala ɗa. Antə da ku dwalita mwala ni ka pi ka tsa ka hara alari su na kalkal wa har tə vir kura, kambəla da psi ni.

²⁶Ɗəɗəpa antə mwala ni ku ngka avi, ka ndla anyarmbwar mdərkəyirni ka ndzi anda har tə pci ku hara ola.

²⁷Mdərkəyirni ni thlatə ɗəɗəpa ka ɗəmhədzər təra. Sakatə tsa kəlar nyarmbwa ni təng nggədza bangərni apəpəi ka kəmari ata di ka tsiyari ata bagaɗi nyarmbwa.

²⁸Antə tsa pəla alari, “Thlatə ka mwa təra.” Amma tsa aɗi ndəra wa. Apani tsa kətə mshiyirni ka vəta ata kwara ka ləha ka tsa.

²⁹Sakatə tsa ku mzhitə kəi, tsa ləmbwa ka kətə ingdla ka thləthlau dza bangərni ni ka bwa kumnya suɗa ka thlentə bwa pal pal aka shanga nyarmbwayeri na kumnya suɗa ar Israila.

³⁰Kəlara mdə na wutə su ngəni ku tuwa ka pəla, “Mə ri ngəni! Yeru aɗi ɗar wutə su ɗimi apani təng tə mjir Israila ku zhar Masar wa! Tar ka mburu hara su ata kəra su ngəni.”