Read bura-pabir Alkaliyayeri 2 Bible Online

Alkaliyayeri 2 - bura-pabir bible

Alkaliyayeri 2

¹Mdərthlentərhyel laga ku thlata akwa Gilgal ka mwari akwa Bokim ka pəla aka mjir Israila, “I na MTHLAKU ku fwaɓəla giri akwa Masar ka səntə giri akwa tsəɗi tə I ku hara alkawalari aka kəkayeri ar giri. I pəla ala ɗa, ‘I aɗi ata ɓəli alkawal arna kəga giri wa.

²Giri aɗiya mbwi alkawal kəga mji na akwa ndzi akwa tsəɗi ngəni wa. Tar ka giri huzamta bagaɗi saɗaka arɗa.’ Kamnyar mi tə giri aɗi kələngkər ali ka hara su tə I pəla ala giri wa ri?

³Ma apani I aɗi ata kədləɓəla ɗa kazhar tsəɗi ni ala giri wa. Da ata ndzi dawar giri, antə da ata ngkau giri akwa vəngkər səli aka haptayeri arɗa.”

⁴Sakatə mdərthlentərhyel ku kuri gari ni aka mjir Israila, antə shanga mji ku baɗitə tuwa.

⁵Apani da ku kəga thləma vəi nda abbər Bokim, ka hamta saɗaka aka MTHLAKU.

⁶Aghəla tə Joshuwa ku salamtə mjir Israila, antə kəlara nyarmbwa ku mwari akwa bwar tsəɗi tə mdə ku nari ka ndzi mthlakari.

⁷Mjir Israila ku kəsi MTHLAKU na Hyelər ɗa ka jirkur akwa sakatə Joshuwa tsu ka mpika, ka akwa sakatə mji ol'olər ɗa na ku wutə surndatayeri tə MTHLAKU ku hara tə da tsu ka mpika.

⁸Joshuwa na ɓzər Nun, buɗar MTHLAKU ku mti sakatə tsa ka məvari aru ka kuma.

⁹Antə da ku harəmta ni akwa fakər kifa natə mdə nar alari abwar tsəɗi gar ar Ifrayim abwar yalar Gar Gaash.

¹⁰Aghəla sakatə mjir zaman ngənda ku mtəgəi antə zaman damwa ku səɓəla na aɗi səndə MTHLAKU wala ɗangtə suayeri na ol'ola tə tsa ku hara aka mjir Israila wa.

¹¹Antə mjir Israila ku hara su na ku ɓzamtə ɗəffa MTHLAKU ka vəngkər səli aka haptayeri ar Baal.

¹²Da zhar vəngkər səli aka MTHLAKU na Hyelər kəkayeri arɗa na fwaɓəla ɗa akwa Masar, ka ra vəngkər səli aka haptayeri ar mji na kalaktə ɗa. Apani da ku thlentə ɗəffa MTHLAKU.

¹³Da fwari ata kəra MTHLAKU, ka vəngkər səli aka haptayeri ar Baal ka Ashtaroth.

¹⁴Antə su ngəni ku mbwantə ɗəffa MTHLAKU ka duna ata kəra mjir Israila, antə tsa ku hamta ɗa akwa tsiya dawayeri arɗa ka da famnya sur ɗa. Tsa zhar ka shanga dawayeri na kalaktə ɗa nggyari ɗa. Apani mjir Israila aɗi nggitə ɗa wa.

¹⁵Kəlara sakatə da ləkwa mpa antə MTHLAKU ana sənta asar ata kəra ɗa, ka mji nggyari ɗa tsu apatə tsa ku pəla. Da ku ndzi akwa damitədzi ka duna.

¹⁶Antə ata saka ata saka MTHLAKU ana carɓəla mjir pwara aka Israila na ata msərantə ɗa ka da dlərəmta dawar ɗa.

¹⁷Akwa məvayeri na təramta mjir Israila ku kəsi MTHLAKU ka ɗəffu duku, amma kulini da ku ləkwa ndzi kula jirkur ka nggəlar ta psi thləm wala aka mjir pwara arɗa. Mjir Israila ku zhar vəngkər səli aka MTHLAKU, ata vəyari da ku vəngkər səli aka haptayeri.

¹⁸Kəlara sakatə dawayeri ku nar bwani aka mjir Israila, antə MTHLAKU ana kətadzə ɗa. Tsa ana carɓəla mdər pwara na ata mbantə ɗa akwa tsiya dawayeri arɗa. MTHLAKU ana dlar mjir Israila akwa shanga virayeri ar mdər pwara arni.

¹⁹Amma ma sakatə mdər pwar ni ku mti, antə da ana ngka akwa lakur ɗa na waci ka hara su na ɗimi ta na ar zaman na təramta. Da ana vəngkər səli ka hara mafakur aka haptayeri, ka nggəlar ta zhar lakur ɗimikur arɗa.

²⁰Antə ɗəffa MTHLAKU ku thlata ata kəra mjir Israila tə tsa pəla, “Kamnyar tə mji ngəni ku ɓəli alkawal tə I hara aka kəkayeri arɗa ka nggəlar ta kələngkər ali,

²¹I ma tsuwa, I aɗi ata kədləɓəla durayeri na mbila aghəla tə Joshuwa mtə wa.

²²I ata hara kəthlər ka da kamnyar kəi nggaɓəla jirkur ar mjir ɗa Israila, wala da ata kələngkər ali apatə kəkayeri arɗa ku hara.”

²³Apani antə MTHLAKU ku zhar durayeri ni ka da ndzəndzi tsu akwa tsəɗi ni. Tsa aɗi hamta nggyari su aka Joshuwa ata kəra ɗa wa, tsuwa tsa aɗi kədləɓəla ɗa təkəma aghəla mtər Joshuwa wa.