Read bura-pabir Alkaliyayeri 20 Bible Online

Alkaliyayeri 20 - bura-pabir bible

Alkaliyayeri 20

¹Shanga mjir Israila, baɗita akwa Dan ka vədza aka Beyersheba, ka paktə ka tsəɗi Gileyad, ku zhar kəyir ɗa ka tsaptədzi akwa mbwar vəngkər səli aka MTHLAKU na ahar Mizpa.

²Shanga mjir pwara na akwa nyarmbwayeri ar Israila ku si akwa tsaptədzər mjir Hyel ni, ka sojayeri ar səl dəpu aru nfwar hahari ka kari mpa.

³Akwa saka ngəni mjir Benjamin ku nggata abbər hwada mjir Israila ku tsaptədzi ahar Mizpa. Antə mjir Israila ku yu mdər Lawi ni abbər, “Pəla ala yeru laku tə su ngəni ɗimi ni hara akwa.”

⁴Mdər Lawi natə bangərni ku mtə ni pəla, “Iya ka bangərna ku mwari ahar Gibeya akwa tsəɗi Benjamin ka pi anda.

⁵Təng vir nda aviri mjir Gibeya si ka kalaktə mbwa tə I akwa ka da tsi ra. Amma ata vəyari da ngkəi bangərna ka pi ka tsa ar dwali har ka tsi ni.

⁶Ngəni an hal na ɗimi kamta tə mjir Israila ku hara. Antə I kətə mshiyirni ka thləthlauwa ka thlenta akwa shanga bwayeri na akwa Israila.

⁷Antə kulini shanga mburu na mjir Israila, man tə mburu ngkər ata kəra su ngəni ri?”

⁸Antə shanga mji ku ndzi ka mnya duku ka pəla, “Mda aɗi akwa nca mburu wala duku na ata ngka aviyarngkiɗa wa.

⁹Nggədza su tə mburu ata harari: mburu ata ndzəl su ka mburu carɓəla mji laga ka da ra dlər Gibeya.

¹⁰Mburu ata ndəkəi shanga mjir Israila ka bwa kuma, antə bwa na pal akwa kuta kuma ni ata hamta susəma aka sojayeri. Mambila mburu shanga ata mwari ra ntə ɗimikur tə mjir Gibeya hara akwa Israila ni.”

¹¹Antə mjir Israila ku tsaptədzi ka ɗəffu duku ka da dlər di ni.

¹²Antə nyarmbwayeri na akwa Israila ku thlentə mji akwa shanga kauyayeri na akwa Benjamin ka da pəla, “Man jili ɗimikur ngəni tə giri hara ri?

¹³Kulini haɓəla giri maɗa' shambar na akwa Gibeya ni ka yeru tsi ɗa, ka mdə tsi jili su ngəni akwa Israila.” Amma mjir Benjamin psəngkər thləm aka su tə mjir Israila pəla ni.

¹⁴Mji ku thlata akwa shanga kauyayeri na akwa tsəɗi Benjamin ka si ahar Gibeya ka da mpa mjir Israila na si ni.

¹⁵Mji na akwa tsəɗi Benjamin ku tsaptə sojayeri dəpu sərkumari ka ngkwa ka pungkər aka sojayeri ar Gibeya.

¹⁶Sojayeri ar Gibeya na aru murfə ni an mji carcara na matsəkar ka masəkukur ndzəh pela ka mavinding.

¹⁷Mjir Israila na sisi ni ku tsaptə sojayeri dəpu aru nfwar na masəkur mpa.

¹⁸Kwabə da baɗitə mpa ni, mjir Israila ku mwari ahar Bethlel ka yu Hyel abbər, “Nyarmbwa madi an ata baɗitə dlər mjir Benjamin ntangkəma ri?” Antə MTHLAKU pəla, “Nyarmbwar Yahuda.”

¹⁹Apani mjir Israila ku dli səɓəla ɗəpari ka fəli kudzəhə ka Gibeya.

²⁰Da zhar vəi fəliyir ɗa ka mwari ka pwi sojayeri arɗa akwa vəi mpa na awul bərni ni ka dlər ɗa.

²¹Sojayeri ar Benjamin ku səɓəla akwa bərni ni ka kurəmta sojayeri ar Israila dəpu sərkumari ka suɗa kwabər pci atəri.

²²Amma mjir Israila ku wutə duna ka jaktə pwi sojayeri arɗa tsu akwa vəi tə da thləthlata akwa sakanda.

²³Kamnyar da ku kurtə mwari akwa mbwar vəngkər səli ka tuwa aka MTHLAKU har tahaku. Da yu ni, “Ka yeru jaktə mwari ra dlər maɗama' yeru na mjir Benjamin ya?” Antə MTHLAKU pəla, “I, mwari giri.”

²⁴Antə da ku dlər mjir Benjamin, dlər na suɗkurari.

²⁵Mjir Benjamin ku jaktə səɓəla akwa Gibeya, antə akwa saka ngəni da ku tsəgəi sojayeri ar Israila na masəkur mpa dəpu kumnya ncisu.

²⁶Antə shanga sojayeri ar Israila ku ngka akwa vəi vəngkər səli na ahar Bethlel ka tuwa mjir ɗa. Da ndzəndzi ata di, akwa tuwa kula səm su har tahaku. Sakatə pci bəs ka di antə da hamta saɗakar jakə mwardzi ka saɗaka mbamba aka MTHLAKU.

²⁷Antə mjir Israila ku yuɓəla akəla MTHLAKU (Akwa saka nda Akwati Alkawal ar Hyel anda ahar Bethlel,

²⁸antə Finehas na ɓzər Eleyazar na kəkar Haruna an prist). Prist ni hara adduwa ka pəla, “Ka yeru jaktə mwari ka ra dlər maɗama' yeru na mjir Benjamin ya, nənga ka yeru zhari ri?” MTHLAKU pəla, “Mwari giri! Ɗəpə I ata hamta ala giri nggyari su ata kəra ɗa.”

²⁹Antə sojayeri ar Israila ku kalaktə Gibeya ka ɗuwardzi.

³⁰Akwa vir na makərkur antə da ləɓəla ka thləthlatə tsu akwa vəi tə da ana ndzi akwa hwatu awul Gibeya.

³¹Mjir Benjamin ku səɓəla kamnyar mpa antə mdə ku ndəkərəmta da kazhar kuta di. Apatə da tsəli kəgari, da baɗitə tsəgəi mjir Israila. Antə mjir Israila ku mwantə makkumari na ku mti akwa mtaku ka na ata laku na akwa daɓwa Bethlel ka Gibeya.

³²Mjir Benjamin pəla, “Yeru ku səm ɗa tsu apatə yeru ku hara sakanda.” Amma mjir Israila ku ɗəmhə ka da səvatə ɗa ka ndəkərəmta ɗa kazhar bərniyir ɗa.

³³Sakatə mjir Benjamin ku kədləmta sojayeri ar Israila ka mwantə ɗa akwa mtakər Baal Tamar, antə mjir Israila na ɗuwardzi ni ku puɓəladzi akwa vəi ɗuwardzər ɗa.

³⁴Antə mjir Israila na carcarari dəpu kum ni ku pwa ata kəra Gibeya ka mpa, antə mpa ni ku ndzi mwavər. Amma mjir Benjamin aɗi nggaɓəla abbər kulini su ni ata ngka ata kəra ɗa wa.

³⁵Apani MTHLAKU ku hamta nggyari su aka mjir Israila ata kəra sojayeri ar Benjamin. Antə vir nda mjir Israila ku tsəgəi mjir Benjamin dəpu sərkumari ka ntəfu ka aru pal.

³⁶Antə mjir Benjamin ku sənda abbər mdə ku nggyari ɗa. Sojayeri ar Israila ku hwi dzakdzakku kazhar sojayeri ar Benjamin kamnyar ka nvwa ɗa wutə lakur səɓəla ka mpa.

³⁷Antə mji na ɗuwardzi ni ku puɓəladzi taktar ka ndəkəmtadzi akwa kuta di ka tsəgəi shanga mji na akwa.

³⁸Mjir Israila na hwi ni ku mbwi seɗa laga kəga mji na ɗuwardzi ni: Ma sakatə giri ku wutə ɗer ku thlatə ka ləmta akwa kuta di,

³⁹ka mjir Israila na hwi ni ngka ka da pwa ata kəra mjir Benjamin ka mpa. Akəma ta ni mjir Benjamin ku tsi mjir Israila makkumari, antə da hara kuraku abbər, “Yauwa, mburu ku tsi ɗa tsu apatə mburu ku hara sakanda.”

⁴⁰Antə sakatə ɗer ku baɗitə ləmta akwa kuta di, mjir Benjamin ku shinardzi ka wuli bwahila ɗa, ka wuta abbər shanga di ni ku təra akwa ɗer aharhyel!

⁴¹Antə sakatə mjir Israila ku shinardzi, shanga mjir Benjamin ku yakata kamnyar da ku nggaɓəla abbər mdə ku kuri ka da.

⁴²Da ngka abwahili ka hwi ləbwar mtaku abbər nuhum da amsəra, amma mjir Israila ku kədlə ɗa ka tsəgəi ɗa. Har ma mji laga ku səɓəla akwa kauyayeri na kudzəha ka da, ka dlara akwa tsi mjir Benjamin ni.

⁴³Mjir Israila ku kalaktə mjir Benjamin ka kədlə ɗa kula sarar mpika ba abwar raghəi ka Gibeya ka ləkəma ka tsəgəi ɗa.

⁴⁴Vir nda Sojayeri ar Benjamin dəpu kumnya ncisu an mta, shanga ɗa katsalayeri.

⁴⁵Bwadukwa ɗa ku shinardzi ka hwi təbwar tsəɗiyir Pela Rimmon akwa mtaku. Mdə ku tsi mji dəpu ntəfu akwa nca ɗa ata laku. Mjir Israila ku ləkəma ka nu mji na mbila har Gidom, ka tsi mji dəpu suɗa.

⁴⁶Shang ata kəma duku mdə ku tsi mjir Benjamin dəpu sərkumari ka ntəfu vir nda, shang da sojayeri na katsala.

⁴⁷Mji aru ngkwa daci an msəra ka ləkwa tsəɗi Pela Rimmon, ka ndzi anda mnyar thliya nfwar.

⁴⁸Mjir Israila ku ngka ata kəra mjir Benjamin na mbila ka tsəgəi ɗa shang, shili ka mwanki kəga maɗankyar, shang kəga mwaɓiyayeri arɗa. Tsuwa da ku mbagamta shanga di tə da ku ləkwa.