Read bura-pabir Alkaliyayeri 21 Bible Online

Alkaliyayeri 21 - bura-pabir bible

Alkaliyayeri 21

¹Akəma ta mpar ɗa kəga mjir Benjamin mjir Israila ku tsaptədzi ahar Mizpa ka kətə alkawal abbər, “Yeru aɗi ata hir ka ngkwar yeru kəl mdər Benjamin wa.”

²Antə aghəla mpa ni mjir Israila ku mwari akwa vəi vəngkər səli ahar Bethlel ka ndzəndzi anda har tahaku. Da tuwa ka kuraku ka duna,

³ka hara adduwa abbər, “MTHLAKU na Hyelər Israila, kamnyar mi tə gə zhar tə su ngəni hara ri? Wul kulini nyarmbwar ɓzərma yeru Benjamin abaka sha akwa Israila!”

⁴Səɓəla ɗəpari ɗəɗəpa antə mji ku həntə bagaɗi ka hamta saɗakar jakə mwardzi ka saɗaka mbamba ata.

⁵Antə da pəla abbər, “Nyarmbwa madi akwa Israila an aɗi mwari akwa tsaptədzər mburu na ahar Mizpa ni wa ri? Mburu ku mbwi ndər anda abbər kəlara mdə na aɗi si akwa tsaptədzi ni wa, mda ata tsi ni.”

⁶Mjir Israila ku ndzi ka ɗəffə ɓzəɓza ar kətadzə kamnyar maɗama' ɗa na mjir Benjamin ku pəla, “Ashina mburu ku ni ka nyarmbwa pal akwa nca mburu, abaka tsa ku hartədzi.

⁷Man su tə mburu ata harari ka wutə mwanki aka mji na ku mbil nə ri? Mburu ku kurtə mbwi ndər abbər mburu aɗi ata hamta maɗankwi mburu ka da kəl wa.”

⁸Da yuwa abbər, “Nyarmbwa aɗi na aɗi mwari ahar Mizpa wa ya?” Da wuta abbər mda aɗi na thlata ahar Yabesh akwa Gileyad ka mwari akwa tsaptədzi ni wa.

⁹Kamnyar sakatə da kuri kəga thləma di na mwari, da aɗi nggatə mdə na pəla abbər tsa thlata ahar Yabesh wa.

¹⁰Antə da ku thlentə sojayeri arɗa na katsala dəpu kumnya suɗa ka da mwari ra tsəgəi shanga mjir Yabesh, mwanki kəga maɗankyar.

¹¹Da pəla, “Ka giri tsəgəi shanga mji shili ka mwanki na ku səndə sal.”

¹²Akwa nca mjir Yabesh da ku wutə maɗankwi na aɗi səndə sal wa dəpu aru nfwar, antə da ku səntə ɗa ahar Shilo akwa tsəɗi Kanana.

¹³Antə mji na tsaptədzi ni ku thlentə kuraku aka mjir Benjamin na akwa Pela Rimmon abbər ka da mbwi ɗəffa ɗa ka da zhar mpa ni.

¹⁴Apani mjir Benjamin ku ngka kazhar Pela Rimmon, antə mjir Israila ku na ala ɗa maɗankwi aru nfwar ar Yabesh natə mda aɗi tsi wa nda ka da kəla. Amma da ku kətəi.

¹⁵Mjir Israila ku ndzi ka ɗəffə ɓzəɓza ata kəra su tə da hara aka maɗama' ɗa na mjir Benjamin, kamnyar tur nggaɓəladzi ngəni na wutədzi akwa daɓwa ɗa ni!

¹⁶Antə mji ol'ola ar Israila pəla, “Shanga mwankir Benjamin ku mti, antə man tə mburu ata harari aka mji na mbila kula mwanki nə ri?

¹⁷Aɗi kalkal ka nyarmbwar mburu pal sha wa. Antə tar ka mburu paka laku natə mjir Benjamin na mbil ka mpika ata wutə maɗar.

¹⁸Mburu a mzhi zhar ka maɗankwi mburu kəl ɗa wa, təng tə mburu ku shuwumta kəlara mdə na ku zhar ngkwarni ka tsa kəl mdər Benjamin.”

¹⁹Antə mdə laga pəla, “Ai kulini tsaptədzi tə mda ana hara tədək məva aka MTHLAKU ahar Shilo ni abaka hara. Shilo an akwa daɓwa Lebona ka Bethlel na abwar anəm, ka abwar raghəi ka laku na akwa daɓwa Bethlel ka Shekem.”

²⁰Antə da pəla aka mjir Benjamin na aɗi wutə mwala wa abbər, “Mwar giri ka giri ɗuwardzi akwa fakər anap,

²¹ka giri səka. Ma sakatə maɗankwi Shilo ku səɓəla kamnyar ɓathla akwa sakar gyali ni, ka waskəi mbuhəɓəla akwa fakər anap ni, ka tsa ngkəi pal akwa nca ɗa ka ləghəi kəgari apa mwalankiɗa.

²²Ma baba' ɗa wala ɓzərma'ɗa ku ra wutə giri ka pəla ahara wa, yeru ata pəla ala ɗa, ‘Usa zhar giri ɗa ka da kəsi maɗankwi ni. Wuta, mburu aɗi mzhi wuta ala ɗa mwanki na amzhi da aghəla tə mburu shamta Yabesh Gileyad wa. Tsuwa su aɗi na ata wutə giri abbər giri ku ɓəli alkawal wa, kamnyar aɗi giri ka kəra giri an kətə maɗa' giri ka hamta wa.’ ”

²³Apani mjir Benjamin ku hara apatə mdə ku pəla ala ɗa. Sakatə maɗankwi ni ku səɓəla akwa ɓathla, waskəi ku carɓəla ɓzərngkwa akwa nca maɗankwi ni ka ngkəi ka təra kəgari apa mwalankiɗa. Antə da ku ngka akwa tsəɗiyir ɗa ka jaktə latə kauyayeri arɗa ka ndzəndzi akwa.

²⁴Aghəla tsaptədzi ni antə shanga mjir Israila ku titili tə waskəi ku ngka akwa nyarmbwarni ka kutakəyirni, ka suayeri na arni.

²⁵Akwa saka ngənda kuthli aɗi akwa Israila katagu wa. Antə mji ku hara su tə da hira.