Read bura-pabir Alkaliyayeri 3 Bible Online

Alkaliyayeri 3 - bura-pabir bible

Alkaliyayeri 3

¹MTHLAKU ku zhar durayeri laga akwa tsəɗi Kanana kamnyar ka tsa ngkərtə mjir Israila na aɗi ɗar wutə mpayeri na akwa Kanana wa.

²Tsa hara ngəni kamnyar ka tsa thlipə lakur mpa aka kəlara zaman ar mjir Israila na aɗi ɗar ləkwa dlər wa.

³Nayeri ni an durayeri na mbila akwa tsəɗi ni: Mjir Filistiya ka kuthlyayeri arɗa ntəfu, ka mjir Kanana, ka mjir Sidoniya, ka mjir Hivi na ka ndzi akwa Gar Lebanon, baɗita akwa Gar Baal Hermon ka mwari akwa lakur pəra Hamoth.

⁴Da an mji na ata ngkərtə mjir Israila ka mdə nggaɓəla wala mjir Israila ata ɓəlatə tsawayeri natə MTHLAKU ku hamta aka kəkayeri arɗa atar Musa.

⁵Apani mjir Israila ku ndzəndzi akwa nca mjir Kanana, ka mjir Hitti, ka Mjir Amor, ka Mjir Hivi, ka mjir Yebusi.

⁶Da ku kəldzi kəga da ka ləkwa vəngkər səli aka haptayeri arɗa.

⁷Mjir Israila ku hara biku aka MTHLAKU na Hyelər ɗa. Da fwari ata kərari ka vəngkər səli aka haptayeri ar Baal ka Ashera.

⁸Antə ɗəffa MTHLAKU ku mbwi ata kəra mjir Israila, tə tsa ku hamta ɗa akwa tsiya kuthlir Kushan Rishathlayim na ar Mesopotamiya. Antə Israila ku ndzi akira da ar məva ncisu.

⁹Amma sakatə mjir Israila ku tuwa abbər ka MTHLAKU dlar ɗa, antə tsa ku thlenta ala ɗa mda ka tsa msərantə ɗa. Ngəni an Othniyel, na ɓzər Kenaz, ɓzərma' Kaleb na raka.

¹⁰Mambələr MTHLAKU ku si ata kərari antə tsa ku ndzi mdər pwar Israila. Othniyel ku pwar mjir Israila akwa mpa ka Kuthli Kushan Rishathlayim antə MTHLAKU ku nar nggyari su ata kərari.

¹¹Apani tsəɗi ni ku ndzi akwa msərakur ar məva nfwarkumari, aghəla nda antə Othniyel na ɓzər Kenaz ku mti.

¹²Mjir Israila ku jaktə hara biku aka MTHLAKU ka damwa, antə MTHLAKU ku vu tə Kuthli Eglon na ar Mowab ku mpa ka mjir Israila ka səm ɗa.

¹³Eglon ku paktədzi ka mjir Ammon ka Amalek ka dlərəmta Israila ka ngkəi Yariko, bərni nfur dipənau.

¹⁴Mjir Israila ku ndzi akira Eglon ar məva kumnya ncisu.

¹⁵Apani mjir Israila ku tuwa aka MTHLAKU, antə tsa ku carɓəla mdə laga ka tsa msərantə ɗa. Ngəni an Ehud, ɓzər Gera akwa nyarmbwar Benjamin. Tsa matsəkar. Mjir Israila ku thlentə Ehud adzə Eglon, kuthlir Mowab ka cautayeri alari.

¹⁶Ehud ku namta aka kərari katsakar ka mnyari suɗa ka saɓəlkurari apa dzarsəl pal ka reta. Tsa mbwi ata kusari abwar mazəm akira ləptərni.

¹⁷Antə tsa mwantə cautayeri ni aka Eglon na kuthlir Mowab. Eglon an mdə na təksətəksari ka duna.

¹⁸Sakatə Ehud ku hamta alari cautayeri ni antə tsa pəla aka mji na kəl cautayeri ni ka da ngka avi.

¹⁹Amma sakatə Ehud ku mzhitə shanggam na kudzəhə ka Gilgal antə tsa shinardzi ka ngka adzə Eglon ka pəla, “Ka Barkar nga, I ka labar ashir ala ga.” Antə kuthli ku tsawa aka buɗayeri arni abbər, “Ləɓəla giri kazhar yeru!” Antə shanga ɗa ku ləɓəla.

²⁰Sakatə Kuthli Eglon ku mbil shini akwa mbwarni na mtathlaku amta ata kəra mbwa antə Ehud ku shahədzi adzə ni ka pəla, “I ka labar akəla Hyel ala ga.” Təkəma kuthli ni mbuhta.

²¹Antə Ehud ku ha tsi matsəkarari ka ntsuɓəla katsakar ata kiɗari na abwa mazəmari ka ntsəvəuwa kuta kuthli.

²²Katsakar ni ku ləkwa purəm səyam kəga kuliyari ka sha akwa kuta kuthli har tə malkum ku hartə ni akwa. Ehud ku zhar katsakar ni tsu akwa ka kari kutari aɓəla.

²³Ehud hagarta nyarmbwayeri ar mbwa na amta ni ka tsagau ɗa ka ləɓəla atar cam,

²⁴ka təra. Sakatə buɗayeri ar kuthli ni ku si ka wutə nyarmbwayeri ni tsautsauwari, da tamata abbər kuthli ra samta yimi.

²⁵Antə da sək ka səka abbər tsu nuhum ya, amma shang kuthli aɗi səɓəla wa, Aghəla nda antə da kətə tsəkuram ka kəlar nyarmbwa ni ka wutə mdərkəyir ɗa mtəmtari ata kutambwa.

²⁶Akwa sakatə buɗayeri ni ndzi akwa səka ka kuthli kəlar nyarmbwa ni Ehud ku hwi ka msərəmta. Tsa təramta adzə shanggam nda ka hwi mwari ahar Seyira.

²⁷Sakatə tsa ku mzhitə tsəɗi gar ar Ifrayim antə tsa mbur təmbəl ar kəga mjir Israila ka da səɓəla ləkwa dləra. Antə tsa ku pwar ɗa ka ləghəi akwa garayeri ni.

²⁸Tsa pəla ala ɗa, “Ka giri nu ra! MTHLAKU ku hamta ala giri nggyari su ata kəra dawayeri ar giri, na mjir Mowab.” Antə da ku nu Ehud ka ləghəi ka ngkəi vəi tə mjir Mowab ana fəlɓəla Jodan ata, ka ngkatə ta mji damwa afəlɓəla.

²⁹Vir nda, da ku kurəmta sojayeri ar Mowab na katsala dəpu kuma, wala duku aɗi na msər wa.

³⁰Antə mjir Israila ku nggyari Mowab vir nda, antə msərakur ku wutədzi akwa tsəɗi ni ar məva nciskumari.

³¹Mdər pwara na ata nu Ehud an Shamgar na ɓzər Anath. Tsa ku tsəgəi mjir Filistiya aru ngkwa ka zwal ar kədla thlar tsuhwa, ka mbantə mjir Israila.