Read bura-pabir Alkaliyayeri 4 Bible Online

Alkaliyayeri 4 - bura-pabir bible

Alkaliyayeri 4

¹Aghəla mtər Ehud antə mjir Israila ku jaktə hara biku aka MTHLAKU.

²Antə MTHLAKU ku vu tə Yabin na kuthlir Hazor akwa tsəɗi Kanana ku nggyari mjir Israila. Olər sojayeri arni an Sisera na ndzi akwa Harosheth Hagoyim.

³Yabin na ka wagənər taku ar liya aru əmdla ku ɗar bwani aka mjir Israila ar məva sərkumari. Antə mjir Israila ku tuwa aka MTHLAKU ka tsa dlar ɗa.

⁴Debora na mwalar Lappidoth an naɓi ka tsuwa mdər pwara ar Israila ata saka ndaga.

⁵Tsa ana ndzəndzi akira nfur dipənau laga akwa tsəɗi gar ar Ifrayim akwa daɓwa Rama ka Bethlel, antə mjir Israila ana mwari adzə ni kamnyar ka tsa thlamta ala ɗa beɗiyir ɗa.

⁶Vir laga Debora thlentə ka mdə kəga alari Barak na ɓzər Abinowam, na ka ndzi ahar Kedesh akwa tsəɗiyir Naftali. Sakatə tsa ku si antə Debora pəla alari, “Nggədza ndər tə MTHLAKU na Hyelər Israila ku pəla ala ga, ‘Baratə sojayeri dəpu kuma akwa nyarmbwar Naftali ka Zebulun, ka gə si ka da ata Gar Tabor.

⁷I ata ndəkərta hangkala Sisera na olər sojayeri ar Yabin ka tsa si kəga sojayeri arni ar wagənər taku ka ar səl, ka da mpa giri akwa Thlyagha Kishon. Antə I ata hara ka ra nggyari ɗa.’ ”

⁸Barak shinau ka pəla, “Ma ga ata mwari, mwa ata mwari, ma apani wa, I aɗi ata mwari wa.”

⁹Antə Debora pəla alari, “Kalkal, mwa ata mwari. Amma mda aɗi ata sə hu nga kamnyar nggyari su wa, kamnyar MTHLAKU ata hamta Sisera akwa tsiya mdə mwala.” Antə Debora ka Barak ku təra mwari ahar Kedesh,

¹⁰vəi tə Barak tsaptə mjir Naftali ka Zebulun akwa. Antə mji dəpu kuma ku nu ɗa. Debora tsuwa ku mwari.

¹¹Ata saka ngəni Heber na mdər Keni ku ndəkəmtadzi kazhar mjir Keni, kəkayeri ar Hobab, baba' mwalar Musa, ku latə tentərni akira nfur ok ar Zanannim kudzəhə ka Kedesh.

¹²Sakatə Sisera ku nggata abbər Barak na ɓzər Abinowam ku ləmta akwa Gar Tabor,

¹³antə tsa tsaptə mjir wagənər taku ar liya arni aru əmdla ka shanga sojayeri arni. Tsa thlentə ɗa kazhar Harosheth Hagoyim ka da mwari akwa Thlyagha Kishon.

¹⁴Antə Debora pəla aka Barak, “Mwari kulini! MTHLAKU ata dlar nga! Ashina MTHLAKU ata hara ka gə nggyari Sisera.” Antə Barak ku ləghəi akwa Gar Tabor ka sojayeri arni dəpu kuma.

¹⁵Sakatə Barak ka sojayeri arni ku pwa ata kəra ɗa, antə MTHLAKU ku pu thlivəra akwa dza Sisera, ka shanga sojayeri ar wagənər taku, ka shanga sojayeri arni. Antə Sisera ku fəlghəi kazhar wagənər takurni ka hwi ka səl.

¹⁶Mjir Barak ku nu wagən takwayeri ar Sisera kəga sojayeri arni akwa Harosheth Hagoyim. Antə da ku kurəmta shanga sojayeri ar Sisera, mda wala duku aɗi na mbil wa.

¹⁷Ata saka ngəni Sisera ku hwi ka ləkwa tentər Yayel, mwalar Heber na mdər Keni, kamnyar Kuthli Yabin na akwa Hazor msəra ka nyarmbwar Heber.

¹⁸Yayel ku ləɓəla ka thli kəma Sisera, ka pəla alari, “Səkwa zanuwa, səmbwa akwa tentər na. Ga aɗiya thlivər wa.” Sakatə da ku ləmbwa, antə Sisera ku pəpəi tə Yayel ku pungkər alari barkwa.

¹⁹Sisera pəla alari, “Usa na ali yimər sa bu, I ka thləli.” Antə Yayel ku kəlar zamzamiyar uwa ka na alari, ka jaktə hartə ni.

²⁰Antə tsa pəla aka mwala ni, “Thləthlata akwa nyarmbwar tent ni. Antə ma mdə ku si ka yu nga abbər, ‘Mda aɗi ambwazi ya?’ Ka gə pəla, ‘awa.’ ”

²¹Sisera ku ghəri antə heni ku kəli ni təkəma. Antə Yayel na mwalar Heber thlatə ka kətə gudəma ka makukwar tent ka mwari ata kərari ka hangkal ka kukwau makukwar tent ni akwa nggamari har ka ləghəi akwa di ka tsi ni.

²²Sakatə Barak ku si ata bara Sisera, Yayel ku mwari ka thli kəmari ka pəla, “Asəra kəi ncanta ala gə mda tə ga akwa barari ni!” Antə tsa ku nu ni tə da ku ləmbwa ka tsa, ka wutə Sisera mtəmtari apsəmta ata di ka makukwar tent akwa kərari.

²³Apani antə vir nda Hyel ku hamta nggyari su aka mjir Israila ata kəra Yabin na kuthlir Kanana.

²⁴Yabin ku ləkəma ka ndzi kula duna amma ar Israila tsa ku ləkəma ka ndzi ka duna tar tə tsa ku shamta ni.