Read bura-pabir Alkaliyayeri 5 Bible Online

Alkaliyayeri 5 - bura-pabir bible

Alkaliyayeri 5

¹Antə vir nda aghəla mpa ni Debora ka Barak na ɓzər Abinowam ku hara ha ngəni,

²Yeru akwa hu nga MTHLAKU! Sakatə sojayeri ar Israila ku hamta kərɗa kamnyar mpa, da hamta kərɗa ka hirər ɗəffa ɗa.

³Psi gir thləm, kuthlyayeri! Shahə hangkala giri, giri na mjir pwara I ata hara ha ka tsa su, aka MTHLAKU na Hyelər Israila.

⁴MTHLAKU, sakatə ga ku zhar Seyir, sakatə ga ku səɓəla akwa tsəɗi Edom, yimi ku pughəidzi amtazi, antə di ku kənggərantədzi, I, dlambayeri ku pughəi yimi.

⁵Garayeri ku kənggərantədzi akəma MTHLAKU ar Sinai, akəma MTHLAKU na Hyelər Israila.

⁶Akwa zaman ar Shamgar, ɓzər Anath, akwa zaman ar Yayel, mbwar ɗuwa ku thləthlata mjir lənggu ku nu hildi.

⁷Diyayeri ar Israila ku ndzi kula mji akwa, ku ndzi kula mji tar tə Debora ku si, ka ndzi məma aka Israila.

⁸Antə mpa ku thlata akwa tsəɗi ni sakatə mjir Israila ku carɓəla haptayeri. Mda aɗi wala duku na ka partau wala mwasu akwa nca mji dəpu nfwarkumari na akwa Israila wa,

⁹I akwa hu nga MTHLAKU, I akwa usar nga kamnyar mjir pwara ar Israila, kamnyar sojayeri na ku hamta kəra da

¹⁰Psi gir thləm, giri na ana fəl kwara ɓɗaku giri na andzəndzi ata sərɗayeri, ka giri natə tar ka giri mwa ka səl.

¹¹Ngga giri kuraka mjir tsa su na ata mnya jiɓayeri, akwa jika nggyari su tə MTHLAKU ku hara, nggyari su ar mjir Israila! Mjir MTHLAKU ku zhar bərniyayeri arɗa akwa səghəi akwa nyarfayeri ar ɗa

¹²Mburu'a təra, Debora, mbura təra! Mburu'a hara ha, ka mburu təra! Mwa kəma, Barak! Pukəma mafayeri ar nga ɓzər Abinowam.

¹³Antə mambila mji ku səghəi ka səm mji na ka duna. Mjir MTHLAKU ku si ka dlər sojayeri.

¹⁴Da thlata ahar Ifrayim na ar mjir Amalek waci, ka səghəi akwa mular, na ata nu ɗa an mjir Benjamin. Mji na ol'ola ar sojayeri ku səɓəla akwa Makir, Mjir mwa akəma ka zwalər duna ku səɓəla akwa Zebulun.

¹⁵Mjir ol'ola ar Issakar an kəga Debora, Issakar ku nu Barak. Da ku nu ni ka hwi akwa mular. Amma mjir Ruben ku ndzi ndəkndəkari. Da amzhi kwamta wala ka da si wa.

¹⁶Kamnyar mi tə da ku ndzi aghəli kəga təmayeri ri? Ka da nggatə kuraka mjir ɓəla akwa kəga ciɓayeri ya? Mjir Ruben ku ndzi ndəkndəkari, da amzhi kwamta wala ka da si wa.

¹⁷Mjir Gad ku ndzi abwar raghəi ka Jodan, antə mjir Dan ku ndzi adzə sharayeri ar yimi. Mjir Asher ku ndzi ata mnya manda Da ku fəi ata mnya yimi nda

¹⁸Amma mjir Zebulun psəmta mpika ɗa tsu apa mjir Naftali akwa vəi mpa.

¹⁹Antə kuthlyayeri ku si ka mpa Kuthlyayeri ar Kanana ku mpa Akwa Taanak, ata mnya yimər Megiddo amma da aɗi təra wala ka adzərfa wa,

²⁰Sasəlkayeri ku mpa amtazi, sakatə da akwa mwa amtazi da ku mpa ka Sisera.

²¹Pərtu ku famta ɗa akwa Thlyagha Kishon, tsa ana tsarəmta ka puɓəladzi Thlyagha Kishon! Ləkəma mpikəi, Ləkəma ka duna!

²²Takwayeri ku si ka galapu ka mpəla da akwa lamta di.

²³“Shiwumta Meroz”, ndə mdərthlentərhyel “Ka giri shuwumtadzi, giri na ka ndzi anda.” Da aɗi si ka dlar MTHLAKU apa sojayeri ka mpa kamnyar ni wa.

²⁴Mwala na ka barka an Yayel, Mwalar Heber na mdər Keni, tsa mwala na ka barka na ka ndzi akwa tent.

²⁵Sisera ku yuwa alari yimi, amma tsa na alari uwa. Tsa sənta alari mal kəra uwa akwa tasa na ola apa aka kuthli.

²⁶Tsa kətə makukwar tent akwa tsiyari duku ka kətə gudəma mdər kəthlər akwa tsiya damwa.

²⁷Sisera ku təri ata ɓunjari ka ndla adzə səla Yayel. Sisera ku ləghəi ata ɓunjari ka ndla adzə səla Yayel, ata vəi tə tsa ku ndla ata antə tsa ku mti.

²⁸Mama' Sisera ku haɓəla kəmari akwa windau ka kəga ka kuraku abwahila zhaɓər windau, “Man hara tə ba ashina wagənər takurni aɗi si wa ri? Kamnyar mi tə takwayeri arni aɗi mwa taktar wa ri?”

²⁹Gwarkayeri arni na ɗəɗu ku na alari amsa, antə tsa ləkəma ka zwarəngkər suayeri aka kərari,

³⁰“Sisera ka mjirni ndzi akwa fa bumtər ar mpa ni mwala pal, wala suɗa aka soja ka zhaɓayeri ar gəna aka Sisera, zhaɓi na ka nduɓwa ɓɗaku ka sur wulya aka kuthli mwala.”

³¹Antə ndzi ka shanga dawayeri ar nga mta apa Sisera MTHLAKU, amma ka pazhayeri ar nga mbəla apa səɓəlar pci na ka duna. Antə msərakur ku wutədzi akwa tsəɗi ni ar məva nfwarkumari.