Read bura-pabir Alkaliyayeri 6 Bible Online

Alkaliyayeri 6 - bura-pabir bible

Alkaliyayeri 6

¹Da aɗi da aɗi təng mjir Israila jaktə hara biku aka MTHLAKU. Antə tsa zhar ka mjir Midiyan hara kuthlikur ata kəra ɗa ar məva murfa.

²Mjir Midiyan ka duna ta mjir Israila, antə mjir Israila ku ɗuwardzi ala ɗa akwa kuayeri ka vəyayeri damwa na akwa garayeri.

³Kəlara sakatə mjir Israila ku thləkamta hwulfa antə mjir Midiyan ka mjir Amalek kəga mji na abwar raghəi ana si ka dlər ɗa.

⁴Da ana dlər ɗa ka ɓzamtə sur fakər ɗa har ka mwanta adzə Gaza abwar anəm. Da ana fatə shanga təmayeri, thlayeri, kwarayeri ka zhar mjir Israila kula susəma.

⁵Mjir Midiyan ana si kəga mwaɓiyayeri ka tentayeri arɗa. Da ana si kəga dləkəmauwayeri nggərəɓu apa ntsəkwa. Antə da ana ɓzamtə Tsəɗi.

⁶Mjir Midiyan ku pu mjir Israila akwa mi, antə mjir Israila ku tuwa abbər ka MTHLAKU dlar ɗa.

⁷Sakatə da ku tuwa abbər ka MTHLAKU dlar ɗa ata kəra mjir Midiyan,

⁸antə MTHLAKU ku thlenta ala ɗa naɓi. Naɓi ni si ka pəla, “MTHLAKU na Hyelər Israila pəla, ‘I ku fwaɓəla giri akwa mafakur akwa Masar,

⁹ka msərantə giri akwa tsiya mjir Masar ka shanga mji na pu giri akwa bwani. I ku kədləmta dawayeri ar giri ka hamta ala giri tsəɗiyir ɗa.

¹⁰I ku pəla ala giri abbər I an MTHLAKU na Hyelər giri. Antə giri aɗiya vəngkər səli aka haptayeri ar mjir Amor wa, wala tə giri akwa tsəɗiyir ɗa kulini.’ Amma giri aɗi ka psi thləm ali wa.”

¹¹Antə vir laga mdərthlentərhyel ku si ahar Ofra ka ndzəndzi akira nfur ok na ar Yowash, mdə na akwa nyarmbwar Abiyezer. Gideyon na ɓzər Yowash akwa dəka alkama akwa ɗuwari akwa vəi ntsar anap ta mjir Midiyan asə wutə ni.

¹²Antə mdərthlentərhyel ku wutədzi alari, ka pəla, “Katsalar mda, MTHLAKU akwa dlar giri!”

¹³Gideyon shinau alari abbər, “I ata yu su zanuwa, ma MTHLAKU an akwa dlar yeru jiri, kamnyar mi tə suayeri na ɗimi akwa wutə yeru ri? Tsuwa man wutə surndatayeri arni natə kəkayeri ar yeru ku pəla ala yeru su ata kər nə ri? Da ngkərɓəla ala yeru laku natə MTHLAKU ku fwaɓəla ɗa akwa Masar. Amma kulini MTHLAKU ku pumta yeru ka hamta yeru aka mjir Midiyan.”

¹⁴Antə MTHLAKU ka kərari pəla aka Gideyon, “Ga ata ndzi ɓəɓal kamnyar I akwa hamta ala gə duna ka gə msərantə mjir Israila akəla mjir Midiyan. I ka kəri an akwa thlentə nga.”

¹⁵Antə Gideyon pəla, “Amma MTHLAKU akwa laku madi tə I ata msərantə Israila ri? Nyarmbwar na an kula duna ta shang akwa Manasse, nggədza tsuwa I an raka ta shang akwa kutakəyir yeru.”

¹⁶MTHLAKU shinau alari, “Ga ata mzhari, kamnyar I ata dlar nga. Antə ga ata hadləmta ɗa shang kasəla apa ga akwa mpa ka mdə duku.”

¹⁷Gideyon pəla, “Ma ga ata dlar ra jiri, ncanta ali seɗa abbər jiri ga an MTHLAKU.

¹⁸Usa, ga aɗiya təra wa, I ata sənta ala gə susəma.” Antə MTHLAKU pəla, “To, mwari I akwa səka nga.”

¹⁹Antə Gideyon ku ləvəi ka tsi ɓzər kwi ka ti. Aghəla nda tsa kətsə mpur alkama ar kilogram kuma ka namtə buradi na kula yist kəgari. Sakatə kum ni ku hara, tsa pu kum ni akwa thlambəl ka yimər səkwar ni akwa tughum ka sənta aka mdərthlentərhyel akira nfur ok ka hamta alari.

²⁰Mdərthlentərhyel pəla alari, “Pwi kum ni ka buradi ni ata pela ngəni ka gə pungkər yimər səkwar ni ala ɗa.” Antə Gideyon ku hara apani.

²¹Antə mdərthlentərhyel ku ndərar tsiyari ka tsəkwar kum ka buradi ni ka zwal na akwa tsiyari. U'u ku səɓəla akwa pela ni ka mbamta kum ni ka buradi ni. Antə mdərthlentərhyel ni ku sha.

²²Apani antə Gideyon ku nggaɓəla abbər mdərthlentərhyel an si adzə ni ni. Antə tsa hara kuraku ka pəla, “Sha ku wutə ra, MTHLAKU na ka Duna ta Shang, I ku wutə mdərthlentər nga nca ka nca!”

²³Amma MTHLAKU pəla alari, “Peri hangakala ga! Ga aɗi ata mtə wa.”

²⁴Antə Gideyon həntə bagaɗi vəngkər səli aka MTHLAKU anda, ka vəta alari thləm abbər, “MTHLAKU An Msərakur.” Ba kulini bagaɗi nda tsu aɗi akwa Ofra na ar nyarmbwar Abiyezer.

²⁵Tsu vir nda aviri antə MTHLAKU pəla aka Gideyon, “Kətə gyal ar baba' nga na ɓɗak laga, na ka məvari murfa. Ka gə huzamta bagaɗi vəngkər səli aka Baalər baba' ngə ni kəgari, ka gə tadərəmta haptu mwala, Ashera na athlimbəlari ni.”

²⁶Aghəla nda ka gə həntə bagaɗi na ɓɗaku ka pela ata kəra ɗəɗəgəl ngəni. Nthlənthlu udzəmər haptu ni kara mbahə u'u kəgari, kambəla gə tsi gyal ni ka mbamta swakti apa saɗaka mbamba.

²⁷Apani Gideyon ku fatə buɗayeri arni kuma ka hara su tə MTHLAKU ku pəla alari. Amma kamnyar tə tsa akwa thlivər mjir kutakəyirni kəga mjir kuta di, tsa zhar harari təpci ka hara aviri.

²⁸Səɓəla ɗəpari sakatə mjir kuta di ku thlatə təng da wutə mdə ku huzamta bagaɗi ar Baal ka nthləmta haptu mwala, ka mbamta gyal ata kəra bagaɗi tə mdə lata anda.

²⁹Antə da yu nvwa ɗa abbər, “Wan hara su ngəni ri?” Da ləkwa yu mji, ka sə nggaɓəla abbər Gideyon na ɓzər Yowash an hara.

³⁰Antə da pəla aka Yowash, “Gideyon na ɓzər nga ku huzamta bagaɗi Baal ka nthləmta dludzər Ashera na athlimbəlari. Antə səɓəla ka tsa ka yeru tsi ni.”

³¹Amma Yowash shinau ala ɗa abbər, “Giri si mbul kəra Baal ya? Nənga giri si ntə dawa alari ri? Ma giri si kamnyar ni, mda ata tsi giri ɗəɗəpa. Ma Baal an hyel, ka tsuwa ma bagaɗi ni an arni, zhar ni ka tsa ntə dawa ka kərari.”

³²Tsu vir nda antə mji baɗitə kəga thləma Gideyon abbər Yerubbaal, kamnyar tə Yowash pəla, “Zhar ka Baal ntə dawa ni ka kərari”, ata kəra mdə na huzamta bagaɗi arni ni.

³³Antə mjir Midiyan, Amalek ka durayeri na abwar raghəi ku tsaptədzi ka fəlɓəla Thlyagha Jodan ka ndzəndzi akwa Mular Yezireyel.

³⁴Mambələr MTHLAKU ku kəthlər ka Gideyon. Antə Gideyon ku mbur təmbəl ka kəga mji shili na akwa nyarmbwar Abiyezer ka da nu ni.

³⁵Tsuwa tsa ku thlentə mji akwa japwa tsəɗiyir Manasse, akwa Asher, ka Zebulun, ka Naftali ka kəga ɗa ka da nu ni. Antə shanga ɗa ku si ka paktədzi kəga mjirni.

³⁶Antə Gideyon ku pəla aka Hyel, “Ma ga ata hara kəthlər ka iya kamnyar msərantə Israila apatə ga ku pəla

³⁷to, I ata pwi ulu ata lali tahaku ni. Antə ɗəɗəpa ma kəlangkəu ku təri ata ulu ni amma di ul'ulari, I ata sənda abbər ga ata hara kəthlər ka iya kamnyar msərantə Israila.”

³⁸Antə an su na hara. Səɓəla ɗəpari Gideyon thlatə ka ntsarɓəla yimər kəlangkəu akwa ulu ni na ata nghyantə tasa na ola.

³⁹Amma Gideyon pəla aka Hyel, “Ɗəffa ga aɗiya ɓza adzə ra wa. Ndzi kəi jaktə yutə su pal ka damwa. Zhar kəi jaktə ngkərtə su ka ulu ni. Akwa saka ngəni ka ulu ni shini an ndzi ul'ulari, amma ka shanga vəi ləɓa ka kəlangkəu.”

⁴⁰Antə vir nda aviri Hyel ku hara apani. Səɓəla ɗəpari ulu ni ku ndzi ul'ulari, amma di ku ləɓi ka kəlangkəu.