Read bura-pabir Alkaliyayeri 7 Bible Online

Alkaliyayeri 7 - bura-pabir bible

Alkaliyayeri 7

¹Vir laga Gideyon kəga mjirni ku thlatə ɗəɗəpə mbing ka ɗuwa ka fəli adzə Kucirkilar Harod.

²MTHLAKU pəla aka Gideyon, “Sojayeri ar ngə ni hang dzau. Ma I zhar tə shanga giri mpa kəga mjir Midiyan, mjir giri ata sə hu kərɗa ka pəla da səm ka dunar ɗəva kamnyar hangkurər ɗa.

³Antə psəmnya ka ra pəla, ‘Kəlara mdə na akwa thlivəra ka yakata ka tsa ngka avi.’ ” Mambila mburu ata ndzəndzi tsu azi akwa Gar Gileyad. Antə mji dəpu sərkumari ka suɗa ku ngka avi kazhar mji dəpu kuma ata gar ni.

⁴Amma MTHLAKU pəla aka Gideyon, “Har ba kulini mji tsu hang kamta. Fatə ɗa ka giri ləghəi akwa thlyagha antə I ata ndəkɓəla ɗa ala ga. Ma mdə natə I pəla kara kəta, kara kəta. Ma mdə natə I pəla kara vəi, kara vəi.”

⁵Sakatə Gideyon ku ləghəi ka mji ni akwa mnya thlyagha, antə MTHLAKU pəla alari, “Pwi mji na ata sa yimi ka kyanggyara apa kila abwa duku, ka mji na ata zuzuri ata ɓunja da kambəla da sa yimi abwa damwa.”

⁶Hangkur mji na sa yimi akwa tsiya ɗa apa kila ni an mji aru makər. Shanga mji na mbila ku zuzuri ata ɓunja da ka sa yimi.

⁷MTHLAKU ku pəla aka Gideyon, “Ka mji aru makər ngəni antə I ata msərantə nga ka na ala gə nggyari su ata kəra mjir Midiyan. Salamtə mji na mbil ni ka waskəi ngka avi aharngkiɗa.”

⁸Antə Gideyon ku haptə kuraku ka pəla, “Giri na aru makər ni ka giri ndzəndzi azi. Shanga mji na mbila ka giri zhar shanga kari susəmər giri ka təmbəlayeri ar giri azi, ka giri ngka avi.” Vəi fəliyir mjir Midiyan an aghəya ɗa akwa mular.

⁹Tsu tahaku nda antə MTHLAKU tsawa aka Gideyon, “Thlatə ka giri ləghəi ra dlər mjir Midiyan. I ata vu ka giri səm ɗa.

¹⁰Amma ma ga akwa thlivəra dlər ɗa, ka giri nggwar ləghəi ka buɗar nga Pura akwa vəi fəliyir ɗa,

¹¹ka giri nggatə su tə da ata pəlari. Atar su tə giri nggata antə giri ata wutə dunar mpa ɗa.” Apani antə Gideyon ka buɗarni Pura ku ləghəi adzə vəi fəliyir dawar ɗa.

¹²Vəi fəli ni ol ka duna. Sojayeri ar Midiyan, ka Amalek ka durayeri na təbwa raghəi ku nghyantə mular ni apa bəri ntsəkwa. Da ka dləkəmauwayeri hang apa wuyakər mnya manda.

¹³Sakatə Gideyon ku mzhita antə tsa nggatə mdə laga akwa ngkər suniyirni aka nvwani. Mdə ni pəla, “I suni abbər buradi laga ar barli akwa takəla akwa si akwa vəi fəliyir sojayeri ar mburu ka tsa tent. Antə tent ni ku ndla.”

¹⁴Pazhirni pəla, “Karapur suniyir ngə ni an apani, Hyel ata vu ka Gideyon na olər sojayeri ar Israila kəga mjirni ka da nggyari shanga sojayeri ar Midiyan.”

¹⁵Sakatə Gideyon ku nggata ata kəra suniyir mdə ni ka karapwari, tsa zuzuri ka vəngkər səli aka MTHLAKU. Antə tsa ngka adzə mjir Israila ka pəla, “Mburu atəra! MTHLAKU ata hara ka mburu nggyari mjir Midiyan!”

¹⁶Tsa ndəkəi mjirni na aru makər ni ka bwa makər ka hamta aka waskəi təmbəl ka tughum ka zafu akwa.

¹⁷Gideyon pəla ala ɗa, “Ka giri wul ra. Ma sakatə I ku hara kudzəhə ka vəi ndzəndziyir sojayeri arɗa, ka giri hara su tə I hara.

¹⁸Ma sakatə I kəga mji na adzə ra ku mbur təmbəl, ka giri mbur ar giri ka kalaktə vəi ndzəndziyir ɗa ka kuraku na ola abbər, ‘Kamnyar MTHLAKU ka kamnyar Gideyon!’ ”

¹⁹Gideyon ka mjirni aru pal ku si kudzəhə ka vəi ndzəndziyir dawayeri ni sakatə kərathlər viri abaka hara, aghəla sakatə mjir gadi arɗa ku pali nvwa ɗa. Təkəma antə da mbur təmbəl ka jaɓumta tughumayeri arɗa.

²⁰Antə mji na akwa bwayeri na suɗə ni tsuwa ku hara tsu apani. Da kəsi zafər ɗa akwa tsi matsəkara da ka təmbəl akwa tsi mazəma da. Antə da haptu kuraku, ka pəla, “Katsakar kamnyar MTHLAKU ka kamnyar Gideyon.”

²¹Kəlara mdə ku thləthlata akwa vəi tə tsa ata, ka kalaktə dawayeri arɗa ata ɗəffu. Antə shanga dawayeri ni ku ləlu ka hwi.

²²Sakatə mjir Gideyon akwa mbur təmbəl, MTHLAKU ku vu tə dawar ɗa ku nthlənthlətə kərɗa ka katsakar. Antə mji na aɗi mtə wa ku hwi ka mwari abwar Zarethlan ka mzhitə Beth Shitta har ka mzhitə Abel Mehola na adzə Tabbath.

²³Antə mdə ku kəgaɓəla mjir Naftali, ka Asher, ka japwa Manasse ka da kədla mjir Midiyan.

²⁴Gideyon tsuwa ku thlentə mji akwa shanga tsəɗi gar ar Ifrayim ka pəla, “Səghəi giri ka giri dlar yeru akwa dlər mjir Midiyan. Ka giri thlamta kəma ɗa akwa Thlyagha Jodan ka shanga zərkayeri ba akwa Bethbara.” Antə mjir Ifrayim ku hara kalkal apatə Gideyon ku pəla ala ɗa.

²⁵Da kədlə sojayeri ar Midiyan ka ngkəi sojayeri arɗa na ol'ola suɗa, Oreb ka Ziyib. Aghəla nda antə mjir Ifrayim səntə kəra Oreb ka Ziyib aka Gideyon aɓəla bwanda Jodan.