Read bura-pabir Alkaliyayeri 8 Bible Online

Alkaliyayeri 8 - bura-pabir bible

Alkaliyayeri 8

¹Mjir Ifrayim ku damitədzi ka yu Gideyon abbər, “Kamnyar mi tə ga aɗi kəga yeru sakatə giri ra dlər mjir Midiyan wa ri? Kamnyar mi tə gə hara ala yeru apani ri?”

²Amma Gideyon pəla, “Ɗəffa giri aɗiya ɓzə wa! Ai wala tə giri si ata kər ni giri ku hara su na təramta ra.

³Nggədza ma Hyel ku na giri dunar ngkəi sojayeri na ol'ola suɗa ar Midiyan, Oreb ka Ziyib. Man su tə I hara tə mda a gira ka ar giri ri?” Sakatə da nggatə gari ngəni antə ɗəffa ɗa ku pəpəi.

⁴Gideyon ka mjirni aru makər ku kədlə mjir Midiyan har ka mzhitə Thlyagha Jodan ka fəlɓəla. Da ku ghəri, amma wala apani da ku nu ɗa.

⁵Sakatə da ku mzhitə Sukkoth, Gideyon pəla aka mjir di ni, “Dlar giri sojayeri arna ka susəma bu. Da ku ghəri amma tar da nu Zeba ka Zalmona, kuthlyayeri ar Midiyan.”

⁶Amma mji ol'ola ar Sukkoth pəla, “Ai ga aɗi ngkəi Zeba ka Zalmona katagu wa. Ngkəi ɗa katagu, kambəla yeru nar susəma aka sojayeri ar nga.”

⁷Antə Gideyon pəla, “To, ma sakatə MTHLAKU ku ni nggyari su ata kəra Zeba ka Zalmona, I ata ngka kəi thləthluhta dza giri ka mtəhəra ka kətsar mtaku.”

⁸Aghəla tə tsa zhar Sukkoth, tsa mwari ahar Penuwel ka kiɗə ɗa tsu apatə tsa ku hara aka mjir Sukkoth, amma mjir Penuwel ku hamta alari amsa tsu apa ar mjir Sukkoth.

⁹Antə tsa pəla ala ɗa, “Ma sakatə I ku ngka lapiya, I ata huzamta mbwa na nal ngəni!”

¹⁰Akwa saka ngəni Zeba ka Zalmona kəga sojayeri arɗa akwa ndzi akwa Karkor. Hangkur sojayeri na mbila akwa kuta shanga sojayeri na thlata akwa raghəi an mji dəpu kumnya ntəfu daci. Mdə ku kurəmta sojayeri dəpu aru ka sərkumari.

¹¹Gideyon ku nu lambata na atar mnya mtaku, raghəi ka Noba ka Yogbeha ka ra pwa ata kəra sojayeri ar Midiyan kula səndər ɗa.

¹²Zeba ka Zalmona na kuthlyayeri ar Midiyan ku hwi, amma Gideyon ku kədla ɗa ka ngkəi ɗa. Antə mjir ɗa ku yakata.

¹³Aghəla mpa ni antə Gideyon na ɓzər Yowash ku ləkwa ngka avi. Sakatə tsa akwa ndləɓəlar Heres,

¹⁴tsa ngkəi kusta laga na thlata ahar Sukkoth. Gideyon yu alari thləma mji ol'ola ar Sukkoth, antə ɓzər ni ku rəbuta alari thləma mji murfəkumari ka murfa.

¹⁵Antə Gideyon ku ngka adzə mji ol'ola ar Sukkoth ka pəla, “Giri ku mnya dəɓa ali abbər, ‘Ai ga aɗi ngkəi Zeba ka Zalmona katagu wa. Ngkəi ɗa katagu, antə yeru ata nar susəma aka sojayeri ar nga.’ ”

¹⁶Antə Gideyon kətə purpur mtəhəra ka kətsar mtaku ni ka rəɓtə mji ol'olər Sukkoth kəgari.

¹⁷Tsuwa tsa huzamta mbwa na nal na ahar Penuwel ka kurəmta mji ol'olər di ni.

¹⁸Gideyon ku yu Zeba ka Zalmona, “Pəla ali su ata kəra mji tə giri tsi ahar Tabor ni.” Antə da shinau abbər, “Da tsu apa giri, shanga ɗa dludzər maɗa' kuthli.”

¹⁹Gideyon pəla, “Ai da maɗama'na, mama' yeru duku. I ku kahyel abbər ma giri an aɗi tsi ɗa wa. I aɗi ata tsi giri wa.”

²⁰Antə tsa pəla aka Yethler, ɓzəra olari, “Tsəgəi ɗa!” Amma ɓzər ni aɗi ntsuɓəla katsakar ni wa. Tsa ndzi tihtihha kamnyar tsa tsu ɓzəngkyar.

²¹Antə Zeba ka Zalmona pəla aka Gideyon, “Tsi yeru gə sur nga. Tar ka sal an hara sur salkur.” Antə Gideyon ku tsi ɗa ka fatə sur dəɓa na akwa wulya dləkəmauwayeri arɗa.

²²Aghəla nda antə mjir Israila pəla aka Gideyon, “Ka gə ndzi kuthlir yeru, ga ka nyarmbwar nga, kamnyar ga ku msərantə yeru ta mjir Midiyan.”

²³Amma Gideyon shinau ala ɗa abbər, “I aɗi ata ndzi kuthlir giri wa, tsuwa ɓzərna aɗi ata hara kuthlikur ata giri wa. MTHLAKU an ata ndzi kuthlir giri.”

²⁴Ndzi kəi kiɗə su pal akəla giri. Tsaptə giri ali shanga surthləm natə giri ku fata akəla dawayeri ar giri ni. Mjir Midiyan ndzi apa abwariyayeri, antə da ana ha surthləm ar dinar.

²⁵Antə sojayeri ar Israila shinau abbər, “Yeru ata hamta ala gə ka kucali.” Antə da pshari zhaɓi, tə waskəi ku putə surthləm tə tsa tsapta akwa fa bumtərni.

²⁶Kəgəɓkura Surthləm ar dinar tə Gideyon dluwa akəla ɗa ku hara kilogram sərkumari. Ngəni an jakərsu ata kəra surdəɓayeri ar wulya, ka ləptər kuthlyayeri na akwa Midiyan, ka sur dəɓa wulya dləkəmauwayeri arɗa.

²⁷Gideyon ku namtə haptu ka dinar ni ka vəi akwa diyir ni, Ofra. Shanga mjir Israila ku zhar Hyel ka ra vəngkər səli aka haptu ni. Antə su ngəni ku sə ndzi dərku aka Gideyon kəga kutakəyirni tə da ləkwa vəngkər səli alari.

²⁸Ngəni an laku natə mjir Israila ku nggyari mjir Midiyan. Apani mjir Midiyan aɗi jaktə bara mpar ɗa kəra wa. Antə tsəɗi ni ku ndzi akwa msərakur ar məva nfwarkumari har tə Gideyon mta.

²⁹Aghəla nda antə Gideyon na ɓzər Yowash ku ngka avi aharngkiɗa ka ndzəndzi anda.

³⁰Gideyon ka mwanki hang antə tsa wutə maɗashili murfəkumari.

³¹Tsuwa tsa ka bangərni akwa Shekem, na ku yaɓəla alari ɓzər sal antə tsa vəta alari thləm abbər Abimelek.

³²Gideyon na ɓzər Yowash ku mti sakatə tsa ku hali antə mdə ku harəmta ni akwa kulər baba'ni ahar Ofra, na an diyir nyarmbwar Abiyezer.

³³Aghəla mtər Gideyon mjir Israila ku jaktə ndzi kula jirkur aka Hyel ka vəngkər səli aka Baal. Da vəi Baal ar Alkawal ka tsa ndzi hyelər ɗa.

³⁴Da fwari ata kəra MTHLAKU na Hyelər ɗa, na msərantə ɗa akwa tsiya shanga dawayeri na kalaktə ɗa.

³⁵Tsuwa ata kəra shanga su na ɓɗakɓɗaku tə Gideyon hara aka Israila, da aɗi wul mdəkur kutakəyir Gideyon wa.