Read bura-pabir Alkaliyayeri 9 Bible Online

Alkaliyayeri 9 - bura-pabir bible

Alkaliyayeri 9

¹Vir laga Abimelek na ɓzər Gideyon ku mwari ahar Shekem kamnyar kəɓa ka msəkayeri arni. Antə tsa pəla ala ɗa ka shanga yangkura mama'ni,

²“Ka giri yutə mjir Shekem abbər, ‘Giri ata bara ka shanga maɗa' Gideyon na murfəkumari ni ndzi kuthlir mburu ya? Nənga giri ata bara mdə duku ri?’ Ka giri ɗangta abbər Abimelek an mamshir mburu.”

³Antə yangkura mama'ni ku gari aka mjir Shekem ata kərari, antə mjir Shekem ku kwamta abbər da ata nu Abimelek kamnyar tsa yangkura ɗa.

⁴Antə da fwaɓəla liyar adzərfa murfəkumari akwa mbwar vəngkər səli aka Baal ar Alkawal ka hamta alari. Antə tsa hayata maɗa' shambar kəgari ka da nu ni.

⁵Abimelek ka sojayeri arni ku mwari akwa kəyir baba'ni ahar Ofra. Antə ata kəra pela laga duku tsa ku tsəgəi maɗama'ni murfəkumari. Amma Yothlam na gajir Gideyon ku ɗuwardzi ka msərəmta.

⁶Antə shanga mji ol'olər Shekem ka Bethmillo ku tsaptədzi adzə nfur ok ka bartə kəra Abimelek tə tsa ndzi kuthlir ɗa.

⁷Sakatə Yothlam ku nggatə su ngəni antə tsa lətə gar Gerizim ka haptə kurakari ka pəla ala ɗa, “Ka giri psi thləm ali giri na mjir Shekem antə nuhum Hyel ata sə psi thləm ala giri!

⁸Waci waci nfwayeri ku tsaptədzi ka da carɓəla kuthli aka kəra ɗa. Da pəla aka nfur Zaitun, ‘Ka gə ndzi kuthlir yeru.’ ”

⁹“Amma Nfur Zaitun pəla ala ɗa, ‘Mi, kəi zhar hara mal arna na ana ndzi msəra aka mdə ka haptayeri kəi ra hara kuthlikur ata kəra giri ya?’ ”

¹⁰“Antə nfwayeri ni ku pəla aka nfur kamnda, ‘Asəra ka gə ndzi kuthlir yeru.’ ”

¹¹“Amma nfur kamndə ni shinau abbər, ‘Mi, kəi zhar yarna na nənəm nənəm ka ɓɗakɓɗaku, kəi ra hara kuthlikur ata kəra giri ya?’ ”

¹²“Antə nfwayeri ni pəla aka nfur anap, ‘Asəra ka gə ndzi kuthlir yeru.’ ”

¹³“Amma nfur anap ni shinau abbər, ‘Mi, kəi zhar yimər anap arna na ana namtə ɗəffa haptayeri ka mji ka da ndzi ka kucali, kəi ra hara kuthlikur ata kəra giri ya?’ ”

¹⁴“Antə shanga nfwayeri ku pəla aka nfur mtəhəra, ‘Asəra ka gə ndzi kuthlir yeru.’ ”

¹⁵“Antə nfur mtəhəra pəla, ‘Ma giri ata bara kəi ndzi kuthlir giri jiri, ka giri si akwa shanggur arna. Ma apani wa antə u'u ata səɓəla akwa nfur mtəhəra ni ka tsa mbamta nfwayeri ar seda na akwa Lebanon.’ ”

¹⁶Yothlam ləkəma ka pəla, “Kulini giri ku hara su na kalkal ka jirkur akwa vəi Abimelek ka tsa ndzi kuthli ni ya? Giri ku hara su na ata nar səli ka olkur aka Gideyon ka mjir kutakəyirni ya? Giri ku hara su na kalkal tə ka mdə hara aka baba'na ya?

¹⁷Ka giri ɗangta abbər baba'na ku mpa kamnyar giri. Tsa ku psəmta mpikari kamnyar ka tsa msərantə giri ta mjir Midiyan.

¹⁸Amma ashina giri ku shinadzə bwahili aka kutakəyir baba'na. Giri ku tsəgəi maɗa'ni murfəkumari ata pela duku. Antə təng kamnyar tə Abimelek, ɓzər tə tsa ya adzə ngkwarkəmarni na yangkura giri, antə giri vəi ni kuthlir mjir Shekem?

¹⁹Antə ma giri wuta abbər su tə giri hara ni ku ndzi kalkal aka Gideyon kəga kutakəyirni, ka giri nggatə msərakurərni, tsuwa ka tsa nggatə msərakur giri.

²⁰Amma ma aɗi apani wa, ndzi ka u'u səɓəla akwa dza Abimelek ka tsa mbamta mjir Shekem ka Bethmillo. Tsuwa ndzi ka u'u səɓəla akwa dza mjir Shekem ka Bethmillo ka tsa mbamta Abimelek.”

²¹Antə kamnyar tə tsa ata thlivər ɓzərma'ni Abimelek, Yothlam ku hwi kara ndzi ahar Beyer.

²²Abimelek ku hara kuthlikur ata kəra Israila ar məva makər.

²³Antə Hyel ku ntau dawakur akwa daɓwa Abimelek kəga mjir Shekem. Apani antə mjir Shekem ku thlentə hangkala Abimelek.

²⁴Su ngəni ku hara apani kamnyar ka ɗimikur ar tsəgəi maɗa' Gideyon murfəkumari tə Abimelek ka mjir Shekem ku hara ni ngka tsu ata kəra ɗa.

²⁵Mjir Shekem ku ɗuwardzi ata kəra gar ka da thla Abimelek, antə da ku dlutsə sur kəlara mdə na ku nu laku nda. Amma Abimelek ku nggatə su ata kər.

²⁶Vir laga Gaal na ɓzər Ebed kəga maɗama'ni ku si ahar Shekem antə mjir Shekem ku mbərsa ka tsa.

²⁷Antə akwa sakar anap shanga mjir Shekem ku mwari akwa fakər anap arɗa ka ɗəmtsa. Da ntsarɓəla yimari ka namtə sur sa ar kucali kəgari. Antə da mwari akwa mbwar haptər ɗa ka səm susəma ka sa su ka ləkwa nggənggəl Abimelek.

²⁸Gaal na ɓzər Ebed pəla, “Abimelek ni mə laga ri? Man paktə mburu ka tsa akwa Shekem ri? I na wuta apa ngəni ɓzər Gideyon ka mdər kəthlərərni Zebul! Ka ha kamnyar mi tə mburu ata ndzi akirari ri? Kuji mburu carɓəla kəkar Hamor na nthlə di ka tsa ndzi kuthlir mburu!

²⁹Ma abbər I an olər Shekem, tar ma I shamta Abimelek! Təng I ata pəla alari, ‘Ɗəmhə sojayeri ar nga ka ra səɓəla ka mburu kəɓa!’ ”

³⁰Amma sakatə Zebul, na olər di, ku nggatə su tə Gaal pəla ni, ɗəffari ku ɓzi.

³¹Antə tsa thlentə mda aka Abimelek akwa Aruma ka tsa pəla alari abbər, “Gaal na ɓzər Ebed kəga maɗama'ni ku si akwa Shekem ka mbwantə ɗəffa mjir di ni ata kəra ga.

³²Antə kulini, giri kəga mjir nga ka giri si aviri ka ɗuwardzi akwa fakəu ata hildi.

³³Ɗəpə ɗəɗəpa ka giri thlatə ka pwa ata kəra di ni kakər. Antə ma Gaal kəga mjirni ku səɓəla ka mpa giri, ka giri kuri da apatə giri amzha.”

³⁴Apani antə vir laga aviri Abimelek ka sojayeri arni ku səɓəla ka ɗuwardzi zara zara ata hildiyir Shekem.

³⁵Sakatə Abimelek ku wutə Gaal ku səɓəla ka thləthlata akwa nyarfur bərni, antə da ku səɓəla akwa vəi ɗuwardzər ɗa.

³⁶Sakatə Gaal wutə ɗa antə tsa pəla aka Zebul, “Wula! Ndaga mji akwa səghəi ata kəra gar ni!” Amma Zebul shinau abbər, “Awa, ngənda aɗi mji wa, shanggura gar ndzang an ndzi apa mji.”

³⁷Gaal jaktə pəla, “Ndaga ɗa diya, da akwa səghəi ata kusar gar ni, ka bwadukwa mji akwa si akwa laku na təbwar nfur ok ar mjir hakdzi.”

³⁸Antə Zebul pəla alari, “Ka ɓwadzər ngə ni ama ri? Ga an pəla abbər aɗi kalkal ka Abimelek hara kuthlikur ata kəra mburu wa. Ngənda an mji tə ga akwa rutari ni. Antə ləɓəla ka ra mpa ɗa.”

³⁹Apani Gaal ku pwar mjir Shekem ka mpa Abimelek.

⁴⁰Amma tar tə tsa hwi, antə Abimelek ku kədlə ni. Wala apani Abimelek ka mjirni ku nu ɗa ka tsəgəi mji hang akwa laku ba akwa nyarfur bərni ni.

⁴¹Abimelek ku ndzəndzi akwa Aruma, antə Zebul ku kədləɓəla Gaal kəga maɗama'ni kazhar Shekem, apani da aɗi mzhi ndzi anda kəra wa.

⁴²Səɓəla ɗəpari mjir Shekem ku ləkwa ɗəmhədzər ləɓəla akwa mtaku. Antə sakatə Abimelek ku nggatə su ata kər,

⁴³tsa fatə mjirni ka ndəkəuwa ɗa ka bwa makər ka ɗuwar ɗa akwa mtaku ka da thla laku. Sakatə Abimelek ku wutə mji akwa səɓəla akwa bərni ni antə tsa kəga mjirni ku səɓəla akwa vəi ɗuwardzi kamnyar ka tsa tsəgəi ɗa.

⁴⁴Sakatə Abimelek kəga mjirni ku mwa taktar ka da thlamta nyarfur bərni ni, mji na zara zara damwa ku pwa ata kəra mji na akwa mtaku ka tsəgəi ɗa shang.

⁴⁵Vir nda da ɓukci akwa mpa tar tə Abimelek ngkəi bərni ni. Tsa tsəgəi mji na akwa di ni, ka huzamta ni, ka titiləmta una akwa kuta di ni.

⁴⁶Sakatə shanga mji ol'ola ar Shekem ku nggatə su ngəni, da hwi ra bara vəi ɗuwardzi akwa vəi na ka duna akwa tent ar Baal ar Alkawal.

⁴⁷Sakatə Abimelek ku nggata abbər da ku tsaptədzi anda,

⁴⁸tsa ləmta akwa gar Zalmon kəga mjirni. Tsa kətə kəma ka nthləi tsiya nfwa ka vəta ata pathlahari. Tsa pəla aka mjirni ka da mwa taktar ka shanga mji hara tsu apani.

⁴⁹Apani shanga mji ku nthləi tsiya nfwa ka nu Abimelek ka ngka akwa Shekem. Da tsaptə tsiya nfu ni akwa vəi ɗuwardzi na ka duna ni ka hangkər ala ɗa u'u, ka tsəgəi mji shili ka mwanki dəpu pal.

⁵⁰Aghəla nda Abimelek ku mwari akwa Thlebez ka kalaktə bərni ni ka ngkəi.

⁵¹Amma mbwa laga aɗi na bəbal ka nal akwa di nda, antə shanga mji ol' ka ntsaha, shili ka mwanki ku hwi ra ɗuwardzi akwa. Da harəngkər nyarmbwa aka kəra ɗa ka ləmta ata kəra mbwa ni.

⁵²Sakatə Abimelek ku nu ɗa ka tsa pwa ata kəra ɗa ka mpa, tsa wutə nyarmbwa ni harharari. Antə tsa bara hatə u'u ata mbwa ni,

⁵³amma mwala laga ku psəghəi bur ata kərari ka jaɓumta kərari.

⁵⁴Antə təkəma Abimelek kəga ɓzərdakwi na akwa kəla alari kari mparni ka pəla alari, “Ntsuɓəla katsakar nga ka gə tsi ra.” I aɗi ata bara ka mdə pəla mda mwala an tsi ra wa. Antə ɓzərdakwi ni ku ntsəvəmta ni antə tsa ku mti.

⁵⁵Sakatə mjir Israila ku wuta abbər Abimelek ku mti, shanga ɗa ku ngka avi.

⁵⁶Ngəni an laku natə Hyel ku ɗi Abimelek kamnyar ɗimikur tə tsa ku hara ka tsəgəi maɗama'ni murfəkumari.

⁵⁷Tsuwa Hyel ku ɗi mjir Shekem kamnyar ɗimikurər ɗa. Antə thləmnya natə Yothlam na ɓzər Gideyon hara ni ku ngkəi ɗa.