Read bura-pabir 3 Yahwana 1 Bible Online

3 Yahwana 1 - bura-pabir bible

3 Yahwana 1

¹I na mdə ola akwa ikələziya an akwa rəbuta ala gə wasika ngəni, gə na Gayus, natə I hirhira ka jirkur.

²I akwa hara adduwa ala gə mdərna, abbər ka shanga su mwa lapiya ala ga, tsuwa ka dza gə ndzi lapiya, tsu apatə gə lapiya abwar mambəl ni.

³Kamnyar I ku hara kucali hang ka duna sakatə bwadukwa maɗama' mburu akwa Kristi si ka ngkər ala yeru ata kəra jirkur tə gə kəgari, abbər jiri ga akwa hara shanga sur nga ka jirkur.

⁴Su aɗi na amzhi namtə ɗəffi ka kucali ka təramta ngəni wa, abbər maɗa'na akwa nu jirkur ni.

⁵Mdərna, ga akwa hara kəthlər ar Hyel ka jirkur akwa laku tə ga akwa dlar maɗama' mburu na akwa kadlər ngkər labar ni, apa mji na mətəpi ni ma wa.

⁶Mji tə gə dlar ɗa ni ku si ka jikata aka ikələziya ata kəra jili hirkur tə gə ncanta ala ɗa ni. Ka gə ləkəma ka dlar jili mji apani akwa mwar ɗa, akwa laku na ata kəskəra Hyel.

⁷Kamnyar mji ngəni akwa mwamwa ni kamnyar ngkər labar ata kəra Yesu, tsuwa da aɗi dlu dlara akəla mji na aɗi mjir nu wa wa.

⁸Antə kalkal ka mburu dlar mji nayeri ni, kamnyar ka mburu ndzi mjir kəthlər kəga nvwa ɗa akwa jirkur.

⁹I ku rəbutə wasika laga na raka aka ikələziya ata kəra su ngəni. Amma Diyotrifis aɗi akwa ngga ndərər yeru wa, kamnyar arni olkur antə tsa akwa barari.

¹⁰Antə ma I ku si, I ata jikata ala giri suayeri tə tsa akwa harari, laku tə tsa akwa mnya ɗimi ata kəra yeru ni. Aɗi an kura ɗimikur tə tsa ana hara wa, amma har tsa akwa nggəlar dlu maɗama' mburu akwa kəyirni, ka ngkatə mji na akwa bara dlar ɗa ta da adlar ɗa. Ma mji na ku dlar ɗa, tsa ana kədləɓəla ɗa akwa ikələziya!

¹¹Mdərna, ga aɗiya thlipə surharar mji na ɗimi ɗimi nə wa, amma ka gə thlipə surharar mji na ɓɗakɓɗaku. Kamnyar mdə na akwa hara ɓɗakkur, ku ncanta abbər tsa ɓzər Hyel. Amma mdə na akwa hara ɗimikur, ku ncanta abbər tsa aɗi səndə Hyel wa.

¹²Ar Demetiriyus, shanga mji akwa ngkər ni ka ɓɗakkur, har jirkur ka kərari surni akwa hamta seɗa na ɓɗaku ata kərari. Wala yeru ma, yeru ku seɗatə ni, tsuwa ga ku sənda abbər I ana pəla jirkur.

¹³I ka su hang tə I akwa bara kəi rəbuta ala ga, amma I aɗi akwa bara kəi rəbutə rəbutə wa.

¹⁴I akwa bara kəi si adzə nga kula shamta saka, ka mwa gari nca ka nca.

¹⁵Ka msərakur ndzi adzə nga. Shanga pazhayeri na azi akwa thlawar nga. Tsuwa ka gə thlawar ali shanga pazhayeri ar mburu na anda, waskəi akwa nca ɗa.