Read bura-pabir Aka Yahwana 1 Bible Online

Aka Yahwana 1 - bura-pabir bible

Aka Yahwana 1

¹Kakaɗə ngəni akwa gari ata kəra su tə Hyel ncaɓəla aka Yesu Kristi, kamnyar ka tsa ngkərɓəla aka mafayeri arni, ata kəra suayeri na ata hara kula shamta saka. Antə Kristi thlentə mdərthlentərni ka ndərayeri ngəni ka tsa pəla aka mafarni Yahwana.

²Antə Yahwana ku hara seɗar shanga suayeri tə tsa wutə ni ka ngkərɓəla. Ngəni an labar tə tsa hamta ata kəra ndərər Hyel ka jirkur ar suayeri tə Yesu ncaɓəla alari.

³Hyel ata vədzə barka aka kəlara mdə na ku karatəmta ndərayeri ar naɓikur ngəni aka mji, ka vədzə barka aka mji na akwa nggari, ka kəlara mdə na ku kəsi su tə mdə rəbuta akwa ni. Kamnyar sakatə suayeri ngəni ata sə hara ni ku hara kudzəha.

⁴I na Yahwana an akwa rəbuta ala giri wasika ngəni, giri na ikələziyayeri murfa akwa tsəɗi Asiya ni. I akwa hara adduwa abbər ka Hyel na aɗi kulini, ka na aɗi waci, ka na akwa sisi, ka tsuwa mambəlayeri murfa na akəma dəkəl kuthlikurərni ni, hara ala giri ɓɗakkur ka na giri msərakur.

⁵Tsuwa ka Yesu Kristi mdər seɗa na ka jirkur, na yarakəmar thlata akwa mtəmta, ka na ka kuthlikur ata kəra shanga kuthlyayeri na akwa duniya ni, hara ala giri ɓɗakkur ka tsa na ala giri msərakur. Ka shanga səli ndzi aka tsa na ku hir mburu, ka msərantə mburu akwa bikər mburu, atar pumta mamshirni.

⁶Tsa an namtə mburu ka mburu hara kuthlikur apa kuthlyayeri, ka hara kəthlər aka Hyel na Təddarni apa pristayeri. Ka səli ka kuthlikur ndzi Yesu Kristi har ba saka madi! Amin.

⁷Nggədza tsa akwa si akwa dlambayeri, tə kəlara mda ata sə wutə ni, har ka shanga mji na ntsəvə ni nda. Antə shanga durayeri na akwa duniya ni ata sə tuwa ni. Jiri, su ngəni ata sə hara. Amin.

⁸“I an ntangkəma ka tsikərari,” ndə Mthlaku na Hyel, na aɗi kulini, ka na aɗi waci, ka na akwa si, na ka Duna ta Shang.

⁹I na Yahwana ni, I an ɓzərma' giri, na akwa ɗar bwani ata kəma duku kəga giri, ka akwa kuthlikurər Hyel, ka akwa nggitə bwani natə Yesu kəga mburu akwa ni. Mdə kədləmta ra ka mwantə ra ata kəra ɗəɗəgəl ar Patmos kamnyar tə I akwa ngkər ndərər Hyel ka hara seɗa ata kəra Yesu.

¹⁰Akwa virər Mthlaku, sakatə I akwa vəngkər səli, antə Mambəl səghəi ata kəri. Antə I nggatə kuraku laga ola ndəra aghəli apa təmbəl.

¹¹Kurakə ni pəla, “Rəbuta su tə gə wutə ni akwa kakaɗu, ka gə thlenta aka ikələziyayeri murfa, na ahar Afisa, ka Simirna, ka Pirgamum, ka Thliyatəra, ka Sardis, ka Filadelfiya, ka Lawudikiya.”

¹²Antə I shinardzi kamnyar kəi wutə mdə na akwa gari ali ni, amma tə I shinardzi təng I wutə pitəlayeri murfa tə mdə nam ka dinar.

¹³Tsuwa ata ɗəffa pitəlayeri ni mdə laga aɗi na dludzi ka Ɓzər Mda. Tsa ka ləptu na saɓəl har ka ləghəi ata hil səlari, ka sur mbwadzi ar dinar ata kərathlari.

¹⁴Shishir kərari ka dzari shang pwak mwapu apa ulu mwapu, mwapu apa mpur puwa, ka ncari an apa kyanggyara u'u.

¹⁵Səlari akwa mbəlmbəla apa əmza natə mdə thləlɓəla akwa kəthla, ka nggiləmta, ka kurakari apa kərathla yimər tsərdlədlu.

¹⁶Tsa ka sasəlkayeri murfa akwa tsi mazəmari, ka katsakar na ka mnyari japu suɗa akwa səma səɓəla akwa mnyari. Tsuwa kəmari akwa mbəlmbəla apa mbələr kərathlər pci.

¹⁷Sakatə I wutə ni, antə I ndla adzə səlari apa I mtəmtari. Amma tsa vəngkər tsi mazəmari ali, akwa pəla, “Ga aɗiya thlivər wa! I an ntangkəma ka tsikərari.

¹⁸I an ka mpika ni! I ku mti, amma nggədza kulini I ka mpikə na har ba saka madi. Tsuwa I ka tsəkuramayeri ar mta ka ar duniyar mji mtəmta.

¹⁹Antə ka gə rəbutə su tə ga akwa wulari kulini ni, ka suayeri na ata hara akəmazi.

²⁰Nggədza karapur sasəlkayeri na murfə tə gə wuta akwa tsi mazəmi ni, ka zwalər pitəlayeri ar dinar na murfə ni. Sasəlkayeri na murfə ni an mjirthlentərhyel ar ikələziya na murfə ni, tsuwa pitəlayeri na murfə ni an ikələziyayeri na murfə ni.”