Read bura-pabir Aka Yahwana 10 Bible Online

Aka Yahwana 10 - bura-pabir bible

Aka Yahwana 10

¹Antə I wutə mdərthlentərhyel damwa na ka duna thlata amtazi akwa səghəi. Mdə hartə ni akwa dlamba, ka kigyau abwa kərari, ka kəmari apa pci, ka səlari apa zhimbwalayeri ar u'u.

²Tsa ka kakaɗə laga pərpərari raka kəlarkəlarari akwa tsiyari. Antə tsa vətə səl mazəmari ata manda, ka vətə səl matsəkarari ata di.

³Antə tsa kəga ka kuraku na ola apa tuwar tsəngi. Aghəla kəga ni, antə hyel dlər mnyari murfa ka duna ka kuraku.

⁴Sakatə dlərayeri na murfə ni ku kuri, antə I pəla I ata rəbutə su tə I nggatə ni. Amma təng I nggatə kuraku laga ndəra amtazi akwa pəla, “Kəsi su tə dlərayeri na murfə ni pəla ala ga, ga aɗiya rəbutə wa!”

⁵Antə mdərthlentərhyel natə I wuta athləthlata ata kəra manda ka ata di ni, haptə tsi mazəmari təbwar vəi na amtazi,

⁶ka kahyel akwa thləma Hyel na aɗi har ba saka madi, tsa na namtə vəi na amtazi ka shanga suayeri na akwa, duniya ka shanga suayeri na akwa, ka manda ka shanga suayeri na akwa. Antə mdərthlentərhyel ni pəla, “Shamta saka aɗi kəra wa!

⁷Amma akwa sakatə mdərthlentərhyel na murfəkur ni ata sə mbur təmbələrni, antə Hyel ata sə nghyaɓəla suayeri tə tsa ɗəmha akwa ɗuwari ni, apatə tsa ku pəla aka mafayeri arni na naɓi ni.”

⁸Antə kuraku natə I ku nggata amtazi ni jaktə gari ali ka pəla, “Mwari ka gə dlu kakaɗə na kəlarkəlarari akwa tsiya mdərthlentərhyel na athləthlata ata kəra manda ka ata di ni.”

⁹Antə I mwari adzə mdərthlentərhyel ni ka yu ni ka tsa ni kakaɗə ni. Antə tsa pəla ali, “Dluwa ka gə ɓɗəmnya. Tsa ata ndzi nənəm akwa mnya ga apa cirməma, amma tsa ata ndzi ɗəɗahu akwa kuta ga.”

¹⁰Antə I dlu kakaɗu na raka ni akwa tsiyari ka ɓɗəmnya. Antə tsa ku ndzi nənəm apa cirməma akwa mnyi, amma sakatə I ndasi ni, təng tsa ndzi ɗəɗahu akwa kuti.

¹¹Antə da jaktə pəla ali, “Dwali ka gə ngkər labarər Hyel ata kəra durayeri na hang, ka tsəɗiyayeri, ka mnyayeri, ka kuthlyayeri hang.”