Read bura-pabir Aka Yahwana 11 Bible Online

Aka Yahwana 11 - bura-pabir bible

Aka Yahwana 11

¹Antə mdə ku hamta ali udzəmər ngkər su laga apa zwal, ka pəla ali, “Mwari kara ngkərtə mbwar vəngkər səli aka Hyel ni, ka bagaɗi ni, ka gə jikatə mji na akwa vəngkər səli akwa mbwa ni.

²Amma ga aɗiya ngkərtə kuta bəbalər mbwar vəngkər səli nə wa, ka gə zhar ni, kamnyar mdə ku hamta ni aka mjir dur gapani. Antə da ata ntsəntsartə bərni na ɓɗakkarkara ni mnyar thliya nfwarkumari ka suɗa.

³Tsuwa I ata thlentə mjir seɗa arna suɗa, na ata hadzə dasa, ka ngkər ndərər Hyel ar vir dəpu pal aru suɗa ka ngkwakumari.”

⁴Mjir seɗa na suɗə ni an nfwayeri ar zaitun suɗa, ka zwalər vətə pitəla suɗa, na thləthlata akəma Mthlakər duniya ni.

⁵Kəlara mdə na ku pəla tsa ata dəkəi ɗa, u'u ata səɓəla akwa mnya ɗa ka mbamta dawar ɗa ni. Antə kəlara mdə na ata bara hara ala ɗa bwani, mda ata tsi ni.

⁶Da ka dunar hartə vəi na amtazi, kamnyar ta yimi asə təra akwa sakatə da akwa ngkər labarər Hyel ni. Tsuwa da ka duna ata kəra yimayeri, kamnyar shinantə ɗa ka da ndzi mamshi, ka tsuwa ka da pungkər shilku ata kəra shanga mjir duniya, akwa kəlara sakatə da hira.

⁷Ma sakatə da ku kuri ngkər labar arɗa, mwaɓi laga ata səɓəla akwa ku na zurang kula vəi data ni, ka tsa mpa ka da. Tsuwa mwaɓi ni ata mula ala ɗa ka tsəgəi ɗa.

⁸Antə mda ata pumta mshiyir ɗa akwa lakur bərni na ola, natə mdə kukwamta Mthlakər ɗa akwa. Mda ana tsa karapu aka bərni ngəni tar kəga thləmari abbər Sodom wala Masar.

⁹Antə shanga mji, ka nyarmbwayeri, ka mnyayeri, ka tsəɗiyayeri, shang ata sə wul mshiyir ɗa mnyar vir makər ka reta, ka da ngkatə ta mda aharəmta ɗa.

¹⁰Antə mjir duniya ata sə hara kucali kamnyar mtər mji ngəni suɗə ni. Da ata sə hara kucali, ka pal thlentə cautayeri aka nvwa ɗa, kamnyar mtər naɓiyayeri na suɗə na səntə bwani ata kəra mjir duniya ni.

¹¹Amma aghəla vir makər ka reta ni, Hyel fiu shambar ar mpika akwa dza ɗa, antə da ku thlata ata səla ɗa. Antə shanga mji na ku wutə ɗa ku thlivər ka duna.

¹²Antə naɓiyayeri na suɗə ni ku nggatə kuraku na ola amtazi akwa pəla, “Asər giri amta azi!” Tsu ata nca dawar ɗa antə da ləmtazi akwa dlamba.

¹³Tsuwa təkəma təng duniya ni kənggərantədzi ka duna, har tə bwa pal akwa kuma ar bərni ləghəi akwa di, tə mji dəpu murfa ku kurəmtadzi. Antə mji na mbili ka mpika ku thlivər ka duna, ka haptə səliyir Hyel na amtazi.

¹⁴Bwani na suɗkur ni ku təramta, amma bwani na makərkur tsu akwa si kula shamta saka.

¹⁵Antə mdərthlentərhyel na murfəkur ku mbur təmbələrni. Antə kurakayeri laga ku thlata amtazi akwa pəla, “Kulini kuthlikur ar duniya ni ku ngka akwa tsiya Mthlakər mburu, ka akwa Kristi arni, tsuwa tsa ata hara kuthlikur ni har ba saka madi!”

¹⁶Antə mji na ka olkur sərkumari ka nfwar na andzəndzi ata kəra dəkəl kuthlikur akəma Hyel ni, zuzuri ka kəma ɗa ata di ka vəngkər səli aka Hyel,

¹⁷akwa pəla, “Yeru akwa usar nga, Mthlaku Hyel na ka Duna ta Shang, na aɗi kulini ka na aɗi waci! Kamnyar ga ku kətə dunar kuthlikur ar nga na ol ni ka baɗitə hara kuthlikur!

¹⁸Antə ɗəffa mji na aɗi səndə Hyel wa ku ɓzi, amma kulini sakar ɗəffə ɓzəɓza ar nga ku si. Saka ku hara tə ga ata hara shariya aka mji na ku mti, sakatə ga ata hamta watsəɓa aka naɓiyayeri na mafar nga, ata kəma duku ka mjir nga ka shanga mji na ana thlivər ɗəffa ga, ol ka ntsaha japu! Saka ku hara tə mda ata kurəmta mji mji na hilantə duniya ni!”

¹⁹Antə mbwar Hyel na amtazi ni ku kəlardzi, tə mda akwa mzhi wutə Akwatiyir Alkawal na akwa ni. Antə wurkə laga ku hara, ka kurakayeri laga, ka dlərərhyel, tə di ku kənggərantədzi, antə handzəkəla ku pughəidzi hang.