Read bura-pabir Aka Yahwana 12 Bible Online

Aka Yahwana 12 - bura-pabir bible

Aka Yahwana 12

¹Antə I wutə sur ndatə laga ola akwa hara amtazi, mwala laga natə pci an zhaɓər mbwadzərni, ka thliya akira səlari, ka dzakwar kuthlikur na ka sasəlkayeri kumnya suɗa ata kərari.

²Tsa ka hur, antə tsa akwa tuwa kamnyar bwaniyir kutərya.

³Antə I jaktə wutə sur ndatə damwa amtazi. Dragon laga ola mamza ka kərari murfa, ka təmbəlayerari kuma, ka su laga apa dzakwar kuthlikur amma raka raka ata kəra shanga kərayerari ni.

⁴Tsuwa kurari ku tsarəmta bwa pal akwa makər ar sasəlkayeri na amtazi, ka pumta ɗa akwa duniya. Antə tsa thləthlata akəma mwala na ka hur abaka ya ni, kamnyar ka tsa ɓɗəmnya ɓzərni ni təkəma, ma tsa ku yaɓəla ni.

⁵Antə mwala ni ku yaɓəla ɓzər sal na ata sə hara kuthlikur ata kəra shanga tsəɗiyayeri ka zwal liya. Amma mdə ku dlutsə ɓzərni ni ka mwanta aka Hyel ka dəkəl kuthlikur ni.

⁶Antə mwala ni ku hwi ka ləkwa mtaku, akwa vəi tə Hyel ku ɗəmha alari, kamnyar ka mdə wulwul ni anda mnyar vir dəpu pal aru suɗa ka ngkwakumari.

⁷Antə mpa ku thlata amtazi, Mikayel ka mjirthlentərni an akwa mpa ka dragon ni. Antə dragon ni ka mjirthlentərni ku dlər ɗa tsuwa.

⁸Amma da ku mula aka dragon ni. Antə Hyel aɗi hir ka dragon ka mjirthlentərni jaktə ndzi amtazi wa.

⁹Antə Hyel ndzəghəi dragon ni akwa duniya, watau pwapu na waci, natə mda ana kəga ni Ɗimi wala Shatan ni, tsa na pwaktə shanga mjir duniya ni. Mdə ndzəghəi ni akwa duniya ata kəma duku kəga mjirthlentərni.

¹⁰Antə I nggatə kuraku na ola amtazi akwa pəla, “Kulini antə mbantədzi, ka duna, ka kuthlikur ar Hyelər mburu, ka kuthlikur na ar Kristi arni, ku si. Kamnyar kulini tə mdə ku ndzəhəmta mdər burkatə maɗama' mburu pci ka viri ni akəma Hyelər mburu.

¹¹Antə maɗama' mburu ku mula alari atar mamshir Ɓzər Gam ni ka atar seɗa tə da hara ni. Kamnyar da ku hir ka da hamta mpika ɗa da aɗi damitədzər mpika ɗa wa.

¹²Antə apani ka giri hara kucali, vəi na amtazi ka shanga su na akwa. Amma sha ku wutə ngə duniya ka manda, kamnyar tə shatan ni ku səghəi adzə giri ka ɗəffari ɓzəɓzari, kamnyar tsa ku sənda abbər sakarni mbil raka daci.”

¹³Sakatə dragon ni nggaɓəla abbər mdə ku ndzəhəu ni akwa duniya ni, antə tsa baɗitə nu mwala na yaɓəla ɓzər sal ni.

¹⁴Antə mdə ku hamta aka mwala ni ɓəɓəku suɗa ar duku na ola, kamnyar ka tsa mzhi fəl ka hwi ta dragon ni, ka mwari akwa mtaku, akwa vəi tə mda ata wulwul ni mnyar məva pal, ka məva suɗa, ka retar məva ni.

¹⁵Antə dragon ni ku puɓəla yimi hang akwa mnyari apa zərkəu laga aghəla mwala ni, kamnyar ka yimi ni kətə ni ka təra ka tsa.

¹⁶Amma di ku dlar mwala ni, kamnyar di ku kəlar mnyari ka samnya yimi na hang tə dragon puɓəla akwa mnyari ni.

¹⁷Antə ɗəffa dragon ni ku ɓzi ata kəra mwala ni, antə tsa təra kara dlər mambila maɗa'ni, ka shanga mji na ana ɓəla tsawur Hyel, ka hara seɗa ata kəra Yesu.

¹⁸Antə dragon ni ku thləthlata ata wuyakər mnya manda.