Read bura-pabir Aka Yahwana 13 Bible Online

Aka Yahwana 13 - bura-pabir bible

Aka Yahwana 13

¹Antə I wutə mwaɓi laga akwa səɓəla akwa manda ni. Mwaɓi ni ka kərari murfa ka təmbəlayeri kuma, ka dzakwar kuthlikur kuma ata kəra təmbəlayerari ni. Tsuwa ata kəra kəlara kərari pal ni mdə ku rəbutə thləmayeri na sur ruta aka Hyel.

²Tsuwa mwaɓi tə I wutə ni dludzi ka tənvwa, ka mpəlari apa mpəla mwaɓəlu, ka mnyari apa mnya tsəngi. Antə dragon ni ku hamta dunari, ka dəkəl kuthlikurərni, ka dunar kuthlikur na ola, aka mwaɓi ni.

³Tsuwa pal akwa nca kərayerari ni, apa mdə ku dəkəi na har ata mzhi tsi ni, amma ku sə kuri. Antə shanga duniya ku ndatədzi ata kəra mwaɓi ngəni.

⁴Antə mji ləkwa vəngkər səli aka dragon ni, kamnyar tə tsa ku hamta dunar kuthlikurərni aka mwaɓi ni. Tsuwa da vəngkər səli aka mwaɓi ni, akwa pəla, “Wan ka olkur apa mwaɓi nə ri? Wan ata mzhi mpa ka tsa ri?”

⁵Antə mdə nar laku aka mwaɓi ni ka tsa pəla suayeri na ar kər olkur ka ndərayeri na ar ruta aka Hyel, tsuwa mdə ku zharni ka tsa hara kuthlikur ar thliya nfwarkumari ka suɗa.

⁶Antə tsa kəlar mnyari ka baɗitə pəla ndərayeri na ar ruta aka Hyel, akwa hilantə thləmari, ka mnya ɗimi ata kəra ndzəndziyirni, ka shanga mji na amtazi.

⁷Tsuwa mdə ku nar laku ka tsa mpa mjir Hyel, ka tsa səm ɗa. Tsuwa mdə ku nar laku ka tsa hara kuthlikur ata kəra kəlara dur, ka tsəɗi, ka mnya, ka mji na aɗi.

⁸Antə shanga mji na akwa duniya ni ata sə vəngkər səli aka mwaɓi ni, tar mji natə mdə ku rəbutə thləma ɗa təng akəmata baɗitər duniya akwa kakaɗər mpika, kakaɗər Ɓzər Gam natə mdə tsi ni.

⁹Kəlara mdə na ka thləmər nggatə su, ka tsa nggata.

¹⁰Kəlara mdə tə mdə ku ɗəmha kamnyar mafakur tsa ata sə hara kəthlər ar mafakur. Kəlara mdə tə mdə ku ɗəmha kamnyar mtər katsakar katsakar an ata sə tsi ni. Ngəni an abbər ka mjir Hyel ndzi ka nggitər su ka hamta jiri.

¹¹Antə I wutə mwaɓi damwa akwa səɓəla akwa di. Tsa ka təmbəl suɗa apa təmbəla ɓzər gam, amma tsa akwa gari apa dragon ni.

¹²Tsa ku hara kəthlər ka shanga dunar kuthlikurər mwaɓi na ntangkəma nda ata ncari. Tsa ku dwalitə duniya ka shanga mji na akwa abbər ka da vəngkər səli aka mwaɓi na ntangkəma ni, natə mbəlkər ni ku kuri nda.

¹³Mwaɓi na suɗkur ni ku hara sur ndatə na ol'ola, apa hara tə u'u ku thlata amtazi ka səghəi akwa duniya ata nca shanga mji.

¹⁴Antə tsa ku pwaktə shanga mji na akwa duniya atar surndatayeri tə tsa hara ata vəya mwaɓi na ntangkəma ni. Mwaɓi ni vu mji ka da namtə dludzər mwaɓi na ntangkəma na dəkəidzi ar mta amma ku sə hara mpikə ni.

¹⁵Antə mdə kələngkər aka mwaɓi na suɗkur ni ka tsa fiu mpika akwa dludzər mwaɓi na ntangkəma ni, kamnyar ka dludzər mwaɓi ni mzhi gari, ka tsa vu ka mdə tsəgəi shanga mji na ku nggəlar vəngkər səli alari.

¹⁶Tsuwa mwaɓi na suɗkur ni ku vu abbər dwali ka mdə vətə seɗa ata tsi mazəm ar shanga mji wala ata mumurkəma ɗa, ol ka ntsaha, mjir gəna ka mjir bwani, mafa ka mdə msərmsəra.

¹⁷Tsuwa mda aɗi na ata mzhi mastə su wala ɗələmta su wa, tar ma tsa ka seɗa ngəni, watau thləma mwaɓi ni, wala lamba na ata vəya thləm ni.

¹⁸Vəi ngəni akwa tur ɗəɗukur. Ka mdə na ka nggaɓəlar su hamta karapur lambar mwaɓi ngəni ni, kamnyar ngəni lambar thləma mdə laga. Tsuwa lamba ni an aru ngkwa ka ngkwakumari ka ngkwa.