Read bura-pabir Aka Yahwana 14 Bible Online

Aka Yahwana 14 - bura-pabir bible

Aka Yahwana 14

¹Antə I wula, təng nggədza Ɓzər Gam ni athləthlata ata Gar Sihiyona, ka mji dəpu aru pal ka nfwarkumari ka nfwar adzə ni, na ka thləmari ka thləma Təddarni rəbutə rəbutari ata mumurkəma ɗa.

²Antə I nggatə kuraku laga amtazi apa kuraka kərathla yimayeri, apa kuraka dlərərhyel na ka kuraku. Kuraku tə I nggatə ni an apa kuraka mjir tsa guləm an akwa tsari.

³Antə mji dəpu aru pal ka nfwarkumari ka nfwar ni thləthlata akəma dəkəl kuthlikur ni, ka akəma mwaɓiyayeri na nfwar ni, ka akəma mji na ol'ol ni, akwa hara ha bilən. Tsuwa mdə damwa aɗi na mzhi thliptə ha ngəni wa, tar tsu da tə mdə ku kurtə mbantə ɗa akwa duniya ni.

⁴Da an mji na aɗi ɗar diɓərantə kərɗa ka mwanki wa, kamnyar da kəcəkəcari apa ɓzər ngkwa na aɗi səndə sal wa. Ngəni an mji na akwa nu Ɓzər Gam ni akwa kəlara vəi tə tsa akwa mwari akwa. Da an mji tə mdə pəli akwa nca mji na ku mbili, ka ndzi apa yarakəmar sur faku tə mdə hamta aka Hyel ka Ɓzər Gam ni.

⁵Mda aɗi nggatə thlandər akwa mnya ɗa wa, kamnyar da aɗi ɗar ɓzamtə su wa.

⁶Antə I wutə mdərthlentərhyel damwa na akwa fəla ciju amta akwa daɓwa vəi na amtazi, ka labar na msəra na ba saka madi akəlari, kamnyar ngkər aka mji na akwa duniya, aka kəlara tsəɗi, ka dur, ka mnya, ka kəlara mji.

⁷Antə tsa haptə kuraku ka pəla, “Ka giri thlivər Hyel, ka nar səli, kamnyar sakar shariyar ni ku hara. Ka giri vəngkər səli aka mdə na namta amtazi ka duniya, manda ka kucirkilayeri.”

⁸Antə mdərthlentərhyel na suɗkur ku nutə na ntangkəma ni, akwa pəla, “Tsa ku ndla! Babila na ola ku ndla! Tsa an vu tə shanga mjir duniya sa yimər anapər nggukərni na ar karwakur ni!”

⁹Antə mdərthlentərhyel na makərkur ni ku nutə mjirthlentərhyel na suɗə ni, akwa pəla, “Kəlara mdə na ku vəngkər səli aka mwaɓi ni ka dludzərni ni, ka dlu seɗa ni ata mumurkəmari wala ata tsiyari ni,

¹⁰ata sa yimər anapər ɗəffə bwarbwarkur ar Hyel, natə mdə pu tsu ka mwavərkurərni ni akwa kwapər ɗəffə bwarbwarkurərni ni! Antə mda ata hara bwani alari ka u'u ka u'u mwapu akəma mjirthlentərhyel na ɓɗakkarkara, akəma Ɓzər Gam ni.

¹¹Antə ɗer ar u'u na akwa mba ɗa ni ku ləmta ba saka madi. Tsuwa mji na ku vəngkər səli aka mwaɓi ni, ka dludzərni ni, ka shanga mji na ka seɗar thləmari ni, aɗi ka ghərəmtaghər wala təpci wala aviri wa.”

¹²Ngəni akwa bara ka mjir Hyel ni ndzi ka nggitər su, mji na ana ɓəla tsawayeri ar Hyel, mji na ka jirkur akwa hamta jirər ɗa akwa Yesu.

¹³Antə I nggatə kuraku laga amtazi akwa pəla, “Rəbutə ngəni. Msəra aka mji na ata mta akwa kəthlər ar Mthlaku, kulini ka ba akəmazi!” Antə Mambəl ni pəla, “Arɗa msəra ala ɗa jiri! Kamnyar da ata ghərəmtaghəra akwa bwaniyir ɗa, kamnyar watsəɓər kəthlər tə da hara ɓɗaku ni akwa nu ɗa!”

¹⁴Antə I wula, antə I wutə dlamba laga mwapu, ka mdə laga andzəndzi ata dlamba ni apa Ɓzər Mda. Tsa ka dzakwar kuthlikur ar dinar ata kərari ka thlahu na ata səma akwa tsiyari.

¹⁵Antə mdərthlentərhyel damwa səɓəla akwa mbwar vəngkər səli ni. Tsa haptə kurakari akwa kəga mdə na andzəndzi ata kəra dlamba ni akwa pəla, “Ha thlahur nga, ka gə baɗitə thli sur faku, kamnyar sakar thla sur faku ni ku hara. Kamnyar sur faku na akwa duniya ni ku hara!”

¹⁶Antə mdə na andzəndzi ata kəra dlamba ni ndzəhəu thlahurni ni akwa duniya, antə mdə ku thləi duniya ni.

¹⁷Antə I wutə mdərthlentərhyel damwa səɓəla akwa mbwar vəngkər səli na amtazi ni, ka thlahu na ata səma tsuwa.

¹⁸Antə mdərthlentərhyel damwa thlata adzə bagaɗi ka səɓəla, tsa an mdərthlentərhyel na ka duna ata kəra u'u ni. Antə tsa kəga mdə na ka thlahu na ata səma ni ka kuraku akwa pəla, “Ha thlahur ngə ni ka gə thli yar anap ar duniya ni, kamnyar yarni ni ku ng'həi!”

¹⁹Antə mdərthlentərhyel ni ndzəhəu thlahurni akwa duniya ni, ka thli yar anap ni ata nfwari. Antə tsa pu akwa vəi ntsar yimər anapər ɗəffə bwarbwarkurər Hyel.

²⁰Vəi ntsar anap ni ata aɓəla hildi. Antə sakatə mda akwa ntsar yimər anap ni, mamshi ku səɓəla akwa vəi ntsar anap ni, ka hwi aɓəla ata di, har ka ra shin ka zərku. Saɓəlkurər zərku ni an kilomita aru makər, ka zurangkurari tsuwa ata mzhi shamta kəra taku.