Read bura-pabir Aka Yahwana 16 Bible Online

Aka Yahwana 16 - bura-pabir bible

Aka Yahwana 16

¹Antə I nggatə kuraku laga ola thlata akwa mbwar vəngkər səli ni, akwa pəla aka mjirthlentərhyel na murfə ni abbər, “Mwar giri, ka giri shinaɓəla tasayeri na ol'ol murfa ar ɗəffə bwarbwarkurər Hyel ni, ata kəra duniya!”

²Antə mdərthlentərhyel na ntangkəma ni mwari ka shinaɓəla su na akwa tasarni ni ata kəra duniya. Antə mbəlkayeri na mwavər na ata kəta ku səɓəla ata dza mji na ka seɗar mwaɓi ni, ka mji na vəngkər səli aka dludzər ni.

³Antə mdərthlentərhyel na suɗkur ni mwari shinaɓəla su na akwa tasarni ni ata kəra manda. Antə yimi ni ndzi apa mamshir mdə na mtəmtari, tə shanga su na ka mpika akwa yimi ni ku mtəgəmtadzi.

⁴Antə mdərthlentərhyel na makərkur ni mwari ka shinaɓəla su na akwa tasarni ni ata kəra thlyaghayeri ka kucirkilayeri, tə da ku shin ka mamshi.

⁵Antə I nggatə mdərthlentərhyel na ar yimi akwa pəla, “Ga ana hara shariyar ngə ka jirkur gə na Ɓɗakkarkara, gə na aɗi kulini, ka na aɗi waci!

⁶Kamnyar mji ku pumta mamshir mji mamshir mjir Hyel ka na ar naɓiyayeri, antə ga ku na ɗa mamshi ka da sa, kamnyar an watsəɓər surharar ɗa!”

⁷Antə I nggatə kuraku laga thlata adzə bagaɗi ni akwa pəla, “Jiri, Mthlaku, Hyel na ka Duna ta Shang! Ga ana hara shariyar nga kalkal ka jirkur!”

⁸Antə mdərthlentərhyel na nfwarkur ni mwari ka shinaɓəla su na akwa tasarni ni ata kəra pci, antə mdə ku zhar ni ka tsa mba mji ka bwarbwarkurərni na mwavər apa u'u ni.

⁹Antə mji ku mbamtadzi ka bwarbwarkur na mwavər ni, har tə da ləkwa mnya ɗimi ata kəra thləma Hyel na ka duna ata kəra bwaniyayeri ngəni ni. Amma da aɗi tubi ka nar səli wa.

¹⁰Antə mdərthlentərhyel na ntəfkur ni mwari ka shinaɓəla su na akwa tasarni ni ata kəra dəkəl kuthlikur ar mwaɓi ni. Antə kuthlu ku hartə shanga kuthlikurər mwaɓi ni, tə mji ku ɓɗə thlira ɗa kamnyar mwavərkurər bwani tə da akwa,

¹¹ka pəla ndərayeri ar ruta aka Hyel na amtazi, kamnyar mwavərkurər kəta kəga mbəlku. Amma ba kulini, da aɗi tubi ata kəra harar ɗa nə wa.

¹²Antə mdərthlentərhyel na ngkwakur ni mwari ka shinaɓəla su na akwa tasarni ni ata kəra Thlyagha Yufiretis. Antə thlyagha ni ku shiwi, kamnyar ka tsa nar laku aka kuthlyayeri na ku thlata abwar raghəi.

¹³Antə I wutə mambəlayeri na ɗimi ɗimi makər na dludzi ka hwamba. Pal akwa səɓəla akwa mnya dragon, pal akwa səɓəla akwa mnya mwaɓi, ka pal akwa səɓəla akwa mnya naɓi na ar thlandər ni.

¹⁴Da an shatanayeri makər na akwa hara surndatə ni. Tsuwa da an shatanayeri na ana mwari adzə shanga kuthlyayeri ar duniya, ka tsaptə ɗa ata kəma duku kamnyar mpa akwa vir na ola ar Hyel na ka Duna ta Shang ni.

¹⁵“Nggədza, I akwa si apa mdər həla! Msəra aka mdə na ɗəmhəɗəmhari akwa səka, na ka kariyirni ata dzari, ta tsa asə mwa dura, ka sə ndzi ka səli akwa nca mji!”

¹⁶Antə mambəlayeri ni ku tsaptə kuthlyayeri ata kəma duku akwa kəyir kuthli natə mda ana pəla ka mnya Ibrani abbər, Armageddon ni.[1]

¹⁷Antə mdərthlentərhyel na murfəkur ni mwari ka shinaɓəla su na akwa tasarni ni akwa shambar. Antə kuraku na ola ku thlata adzə dəkəl kuthlikur na akwa mbwar vəngkər səli ni, akwa pəla, “Ku kuri!”

¹⁸Antə wurkə laga ku hara, kəga kə kurakayeri, kəga dlərərhyel, tə duniya tsuwa ku kənggərantədzi ka duna, jili kənggərantədzi na aɗi ɗar hara təng tə mdə vəi mji akwa duniya wa. Tsa kənggərantədzi na ol jiri!

¹⁹Antə bərni na ol ni ku ndəkəmtadzi ka bwa makər, tə bərniyayeri na akwa shanga tsəɗiyayeri ku huzamtadzi. Antə Hyel ɗangtə Babila na ola, ka vu ni tə tsa sa akwa kwapər ɗəffə bwarbwarkur arni na mwavər ni.

²⁰Antə shanga ɗəɗəgəlayeri ku ləghəi akwa di, tsuwa shanga garayeri ku sha akwa di tə vəi ku ndzi patərathlu.

²¹Antə handzəkəlayeri na ol'ola, natə kəgəɓkurər kəlara pal ku mwanta apa kilogram ntəfkumari, ku pughəidzi ata kəra mji, har tə da nggəl Hyel kamnyar bwaniyir handzəkəla ni, kamnyar handzəkəla ni ku hara ɗimi kamta!