Read bura-pabir Aka Yahwana 17 Bible Online

Aka Yahwana 17 - bura-pabir bible

Aka Yahwana 17

¹Antə pal akwa nca mjirthlentərhyel na murfa na ka tasayeri murfa akəla ɗa ni ku si adzə ra ka pəla, “Asəra, kəi ncanta ala gə jili shariya tə mda ata sə hara aka karwa na ol ni, na akwa hara kuthlikur ata kəra yimayeri hang ni.

²Kuthlyayeri ar duniya ku hara karwakur ka tsa, antə mjir duniya ku wika atar sa yimər anap ar karwakurərni ni ni.”

³Antə Mambəl si ata kəri, tə mdərthlentərhyel ni mwantə ra akwa mtaku. Antə I wutə mwala laga andzəndzi ata hila mwaɓi laga mamza. Tsuwa mwaɓi ni ka thləmayeri ar nggəl Hyel tə mə rəbuta ata dzari. Tsuwa mwaɓi ni ka kərayeri murfa ka təmbəlayeri kuma.

⁴Mwala ni hatə jili kari laga lipəla, ka na mamza, ka dəɓamtadzi ka sur dəɓa ar dinar, ka gənar pelayeri na ka daraja, ka shanga liyayeri ar dəɓa. Antə tsa kəsi kwapər dinar akwa tsiyari nghyinghyari ka suayeri ar cika kəga ɗimikur ar karwakurərni ni.

⁵Tsuwa mdə ku rəbutə thləm laga ata mumurkəmari, natə karapwari ɗuwarɗuwarari, abbər, “BABILA NA OLA, MAMA' SHANGA KARWAYERI, MAMA SHANGA SUR CIKA NA AKWA DUNIYA.”

⁶Antə I wutə mwala ni ku wika ka mamshir mjir Hyel, ka tsuwa mamshir mji tə mdə tsəgəi kamnyar seɗa na ɓɗaku tə da hara ata kəra Yesu. Sakatə I ku wutə ni, antə I ndatədzi ka duna.

⁷Antə mdərthlentərhyel ni pəla ali, “Kamnyar mi tə ga akwa ndatədzi ri? I ata pəla ala gə karapur ashir ar mwala ni, ka mwaɓi na ka kərari murfa ka təmbəlari kuma, tə tsa ata ni.

⁸Mwaɓi tə gə wutə ni, waci tsa ka mpika, amma kulini tsa aɗi ka mpikə kəra wa. Amma wala apani, tsa abaka səɓəla akwa ku na zurang kula vəi datari ni, ka tsa mwari akwa vəi tə mda ata tsi ni akwa. Antə mji na akwa duniya natə mda aɗi rəbutə thləma ɗa akwa kakaɗər mpika akəmata mda anamtə duniya nə wa, da ata sə ndatədzi kamnyar wutə mwaɓi ngəni ni. Kamnyar waci tsa ka mpika, amma kulini tsa aɗi ka mpikə wa, amma tsa ata jaktə ngka ni.

⁹“Ngəni ata tur nggaɓəla su ka ɗəɗukur. Kərayeri na murfə ni an garayeri na murfa tə mwala ni ndzəndzi ata kər ni. Tsuwa kərayeri ngəni ni an kuthlyayeri na murfə ni.

¹⁰Na ntəfwari akwa nca ɗa ku mtəgəi, palari tsu aɗi, na palari tsuwa aɗi si katagu wa. Tsuwa ma sakatə tsa ku si, tsa ata hara kuthlikur akwa saka laga raka daci.

¹¹Tsuwa mwaɓi na ka mpikə waci, amma kulini tsa aɗi ka mpikə kəra wa ni, tsa an kuthli na nciskur. Tsa tsu apa na murfə ni, tsuwa tsa ma tsa akwa mwari akwa vəi tə mda ata tsi ni ni.

¹²“Təmbəlayeri na kum tə gə wutə ni an kuthlyayeri na kuma na aɗi baɗitə hara kuthlikur katagu wa. Amma mda ata sə bartə kəra ɗa, ka da hara kuthlikur mnyar awur pal ata kəma duku ka mwaɓi ni.

¹³Da na ngəni kum ni, shanga ɗa ka jili dzam duku, antə shanga ɗa ata kələngkər ka da hamta dunar kuthlikur ka kuthlikurər ɗa aka mwaɓi ni.

¹⁴Da ata sə mpa kəga Ɓzər Gam ni. Amma Ɓzər Gam ni ata sə mula ala ɗa ka səm ɗa, kamnyar tsa an Mthlakər mthlakayeri, ka Kuthlir kuthlyayeri. Antə mjirni tə mdə kəga ɗa ka carɓəla ɗa na ka jirkur ni, ata ndzi ata kəma duku kəga tsa.”

¹⁵Antə mdərthlentərhyel ni pəla ali, “Yimi tə gə wuta akwa vəi tə karwa ni andzəndzi ata ni, an mji dlama dlama na akwa durayeri, ka mji zumzum, ka mnyayeri zumzum.

¹⁶Təmbəlayeri na kum tə gə wutə ni, da ka mwaɓi ni ata sə nggəlar karwa ni. Da ata sə dlutsə shanga su tə tsa kəgari ka da zhar ni dura, tsuwa da ata ɓɗəmnya kumər dzari, ka mbamta mbilari ka u'u.

¹⁷Kamnyar Hyel ku vu akwa ɗəffa ɗa abbər ka da hara su tə tsa akwa barari. Antə shanga ɗa ata kələngkər ka da hamta alari dunar kuthlikurər ɗa aka mwaɓi ni, har tar ma suayeri tə Hyel pəla ni ku nghyaɓəladzi.

¹⁸Tsuwa mwala ngəni tə gə wutə ni an bərni na ola na, na akwa hara kuthlikur ata kəra kuthlyayeri ar duniya.”