Read bura-pabir Aka Yahwana 18 Bible Online

Aka Yahwana 18 - bura-pabir bible

Aka Yahwana 18

¹Aghəla ngəni I wutə mdərthlentərhyel damwa na thlata amtazi akwa səghəi. Tsa ka kuthlikur na ola, tsuwa səliyirni ku mbəlantə shanga duniya.

²Antə tsa haptə kurakari ka pəla, “Tsa ku ndla! Babila na ola ku ndla! Tsa ku ndzi vəi ndzəndziyir shatanayeri, vəi ɗuwardzər mambəlayeri na ɗimi ɗimi, ka shanga ɗikayeri na adiya ka sur cika.

³Kamnyar shanga mji ku sa yimər anapərni anapər nggukərni na ɗimi ni. Kuthlyayeri ar duniya ku hara karwakur ka tsa, mjir fəli na akwa duniya ku hara gəna atar nggukər ɗimikurərni ni.”

⁴Antə I nggatə kuraku damwa amtazi akwa pəla, “Asəɓəla giri kazhar ni, mjirna! Ta giri asə ləkwa hara jili bikərni, ka bwaniyayeri arni ni sə tsəkwar giri.

⁵Kamnyar bikərni ku hara hang, har ka mzhita amtazi. Tsuwa Hyel ku ɗangtə ɗimikurayeri arni.

⁶Ka giri hara alari tsu apatə tsa hara ala giri, shanga su tə tsa hara ala giri ka giri ntəmta alari har ka bwa suɗa. Sur sa tə tsa hwathtə ka na giri ni, ka giri hwathta alari na təra ndaga ka bwa suɗa.

⁷Apatə tsa ku haptə kərari ka nggatə msərakur ndzəndziyirni antə giri ata ngkərtə alari bwani ka ɗəffə ɓzəɓza hang apa nda. Təng tə tsa ana pəla akwa ɗəffari, ‘I kuthli mwala na andzəndzi ata dəkəl kuthlikurərna! I aɗi mwala kughung wa, antə sur paktə yeru ka ɗəffə ɓzəɓza aɗi wa!’

⁸Kamnyar ngəni, akwa kuta vir pal duku, antə mda ata tsa ni ka bwaniyayeri ka shilku na ɗimi, ka ɗəffə ɓzəɓza, ka mi. Tsuwa mda ata sə mbamta ni ka u'u, kamnyar Mthlaku na Hyel na ata hara shariya alari ni an Hyel na ka duna.”

⁹Antə kuthlyayeri ar duniya na ku hara karwakur ka tsa, ka nggatə msərakur nggukər dza na ɗimi ka tsa, ata sə tuwa ka jaɓ tuwa ata kərari, ma sakatə da ku wutə ɗer ar u'u na akwa mbamta ni ni.

¹⁰Da ata sə thləthlatə ciju kamnyar da akwa thlivər ɗar bwani ata kəma duku ka tsa. Antə da ata haptə kuraku ka pəla, “Sha ku wutə nga! Sha ku wutə nga, Babila! Gə na bərni na ola ar Babila! Akwa kuta awur pal daci, antə mdə thlamta ala gə shariya!”

¹¹Tsuwa mjir fəli na akwa duniya ni ata tuwa ka ɗəffə ɓzəɓza kamnyar ni, kamnyar mdər masə kariyir ɗa aɗi kəra wa.

¹²Mdər jaktə masə ala ɗa su apa dinar, ka adzərfa, ka gənayeri ar pela, ka shanga sur dəɓa ar liya na ata mbəlmbəla, ka kariyeri ar lilin, ka zhaɓi lipəla, ka zhaɓər gəna, ka zhaɓi na mamza, ka shanga kariyeri tə mdə nam ka udzəm na ana shiwur msəra, ka shanga kariyeri tə mdə nam thlira ciwar, ka shanga suayeri tə mdə nam udzəmayeri natə masər ɗa mwavər mwavər, ka suayeri tə mdə nam ka əmza, ka liya mənggəl, ka jili pelar gagəma na ɓɗaku

¹³ka cinnamon, ka kari yaji, ka tulari ar u'u, ka sur shiwura na msəra, ka yimər anap, ka mal, ka mpu laga na ɓɗaku, ka alkama, ka thla, ka təma, ka takwayeri, ka wagənayeri, ka mafayeri, watau mji ka mpikə ni, aɗi kəra wa.

¹⁴Antə mjir fəli ni tuwa mwala ni akwa pəla, “Shanga suayeri na ɓɗakɓɗaku tə gə hir ka duna ni ku sha ala ga! Shanga gənar nga ka daraja tə gə kəgari ni ku kuri har ba saka madi, ga aɗiya jaktə wutə ɗa kəra wa!”

¹⁵Mjir fəli suayeri ngəni, na hara gəna atar fəli akwa bərni ndaga ni, ata sə thləthlatə ciju, kamnyar thlivər ta da asə ləkwa bwaniyirni ni. Antə da ata haptə kuraku ka tuwa ka ɗəffə ɓzəɓza,

¹⁶abbər, “Sha ku wutə ni! Sha ku wutə bərni na ol ni! Tsa na ana mbwa zhaɓər lilin na ɓɗaku, ka ləptər kalar ndləngi həng'ha ka na mamza, ka dəɓatədzi ka sur dəɓa ar dinar kəga pelayeri na ka daraja ka shanga sur dəɓa ar liya na ata mbəlmbəla!

¹⁷Amma təng akwa awur pal shanga gənarni ni sha!” Antə shanga mthlakər sharayeri ka mjir ləkwa sharayeri ni, ka mjir nggur sharayeri ni, ka shanga mji na ana fəli ata kəra yimi ni, thləthlatə ciju,

¹⁸ka tuwa ka kuraku sakatə da wutə ɗer ar u'u na akwa mbamta mwala ni ni, tə da pəla, “Bərni aɗi na olta bərni ngəni wa!”

¹⁹Antə da pungkər bərbər aka kəra ɗa, ka ləkwa tuwa ka ɗəffə ɓzəɓza, akwa pəla, “Sha ku wutə ni! Sha ku wutə bərni na ol ni! Tsa natə shanga mji na ka sharayeri arɗa ata manda ni ku hara gəna ka gənarni! Kamnyar akwa awur pal shanga su ku ɓzi!”

²⁰Hara kucali ata kərari, giri na amtazi, giri na mjir Hyel ka aposəlayeri ka naɓiyayeri! Kamnyar Hyel ku ɗi ni ata kəra su tə tsa hara ala giri!

²¹Antə mdərthlentərhyel laga na ka duna kətə pela natə olkurari an kalkal ka bur ar hadlə mthli ka ndzəhəuwa akwa manda ni, akwa pəla, “Apani antə mda ata psəmta Babila bərni na ola kula hirərni, mda aɗi ata jaktə wutə ni kəra wa.

²²Mda aɗi ata jaktə nggatə tsa guləm akwa gə wa, wala kuraka mjir ha, ka mjir mbur shwala, ka mjir mbur təmbəl akwa gə kəra wa! Mda aɗi ata jaktə wutə mdər kəthlər tsi akwa gə wa, wala jaktə nggatə kuraka bur ar hadla akwa gə kəra wa!

²³Tsuwa mda aɗi jaktə wutə parakər pitəla akwa gə kəra wa, wala jaktə nggatə kuraka sala mwala ka amaliya akwa gə kəra wa! Kamnyar sakanda mjir fəli ar nga an ka kuthlikur akwa shanga duniya, ga ku ndəndatə shanga mji atar kuzəku ka pwakta tə gə hara ala ɗa!”

²⁴Akwa Babila antə mdə wutə mamshir naɓiyayeri ka mamshir mji na ɓɗakkarkara ka mamshir shanga mji tə mdə tsəgəi akwa duniya.