Read bura-pabir Aka Yahwana 19 Bible Online

Aka Yahwana 19 - bura-pabir bible

Aka Yahwana 19

¹Aghəla ngəni antə I nggatə su laga apa kuraka mji hang amtazi, akwa pəla, “Hu Mthlaku! Ka mbantədzi, ka səli, ka kuthlikur ndzi aka Hyelər mburu!

²Kamnyar shariyarni an kalkal ka jiri. Tsa ku ɗi karwa na ol nda, na hilantə duniya ka karwakurərni ni. Hyel ɗi ni kamnyar tsəgəi mafayeri arni.”

³Antə da jaktə haptə kuraku ka pəla, “Hu Mthlaku! Ɗer ar u'ur bərni ni akwa ləmta ahar hyel ba saka madi!”

⁴Antə mji na ol'ola na sərkumari ka nfwar, ka mwaɓiyayeri na nfwar ni, ku ndla ka vəngkər səli aka Hyel, na andzəndzi ata dəkəl kuthlikur ni, akwa pəla, “Amin! Hu Mthlaku!”

⁵Antə kuraku thlata adzə dəkəl kuthlikur ni, akwa pəla, “Hu gir Hyelər mburu, shanga giri na mafayeri arni ka mjirni, giri na ana thlivər ɗəffari ni, ol ka ntsaha!”

⁶Antə I nggatə kuraku laga apa kuraka mji dlama dlama, apa kuraka yimi na akwa hwi ka pudzi akwa vəi na zurang, apa kuraka dlərər hyel, akwa pəla, “Hu Mthlaku! Kamnyar Mthlaku na Hyelər mburu na ka Duna ta Shang an ka kuthlikur!

⁷Ka mburu kucali ka ndzi ka ɗəffu mwapu ka mburu nar səli alari! Kamnyar sakar kəldzi ar Ɓzər Gam ni ku si. Tsuwa Amaliya ni ku kurtə ka ɗəmhədzi.

⁸Ləptər lilin na kəcəkəcari na ata fəi nca antə mdə na alari ka tsa hata.” Ləptər lilin ni ndzi apa kəthlərayeri na ɓɗakɓɗaku ar mjir Hyel.

⁹Antə mdərthlentərhyel ni pəla ali, “Rəbutə ngəni, ‘Msəra aka mji tə mdə ku kəga ɗa akwa susəmər kucali ar kəldzər Ɓzər Gam ni.’ ” Antə mdərthlentərhyel ni jaktə pəla, “Ndərayeri ngəni an jiri na thlata akəla Hyel ni.”

¹⁰Antə I ndla akəmari adzə səlari ka vəngkər səli alari, amma tsa pəla ali, “Ga aɗiya hara apani wa! I an buɗar kəthlər tsu apa ga, kəga maɗama' nga na akwa ngkər jirkur tə Yesu hara. Hyel antə ga ata vəngkər alari səli!” Kamnyar kəthlər ar naɓikur ni an ka mdə hamta seɗa na jirari ata kəra Yesu.

¹¹Antə I wutə vəi na amtazi ni kəlarkəlarari, ka wutə taku laga mwapu! Thləma mdə na ata taku ni an Jirkur ka Jiri. Tsuwa tsa ana hara shariya ka jirkur, ka mpa akwa laku na kalkalari.

¹²Ncari an apa kyanggyara u'u, tsuwa tsa ka dzakwar kuthlikurayeri hang ata kərari. Tsa ka thləm rəbutə rəbutari ata dzari, amma mda aɗi na asəndə suari wa, tar tsa ka kərari an asəndə suari.

¹³Tsa hatə ləptu natə mdə pshitə ka mamshi. Tsuwa thləm tə mda ana kəga ni kəgari an “Ndər ar Hyel.”

¹⁴Antə sojayeri na amtazi ni hatə ləptər lilin na ɓɗaku kəcəkəcari mwapu, ka fəltə takwayeri na mwapmwapu, ka paudzi akwa layi akwa nu ni.

¹⁵Antə katsakar laga na ata səma ku səɓəla akwa mnyari. Ka katsakar ngəni antə tsa ata dlərəmta mjir tsəɗiyayeri ka hara kuthlikur ata kəra ɗa ka zwal liya mənggəl. Antə tsa ata puɓəla ɗəffə bwarbwarkur na mwavər ar Hyel na ka Duna ta Shang ni, apatə yimər anap ana səɓəla akwa vəi ntsarari ni.

¹⁶Tsuwa mdə ku rəbutə thləmari ata ləptərni ka ata kiɗari abbər, “Kuthlir kuthlyayeri, ka Mthlakər mthlakayeri.”

¹⁷Antə I wutə mdərthlentərhyel laga athləthlata ata pci. Antə tsa haptə kurakari akwa kəga shanga ɗikayeri na akwa fəla akwa daɓwa vəi na amtazi, “Asər giri! Tsaptə girdzi akwa susəmər kucali na ola ar Hyel ni!

¹⁸Asər giri, ka giri ɓɗə kumər dza kuthlyayeri, ka kumər dza sojayeri na ol'ola, ka kumər dza mji na katsala, ka kumər takwayeri, ka kumər dza mjir fəl takwayeri ni, ka kumər dza shanga mji, mafa ka mdə msərmsəra, ol ka ntsaha!”

¹⁹Antə I wutə mwaɓi ni ka kuthlyayeri na akwa duniya kəga sojayeri arɗa tsaptədzi kamnyar mpa mdə na ata hila taku ni ka sojayeri arni.

²⁰Antə mdə ku ngkəi mwaɓi ni ka naɓiyir thlandər na hara surndatayeri akəmari ni. Atar surndatayeri nda antə tsa pwaktəmta mji na ka seɗar mwaɓi ni, ka mji na vəngkər səli aka dludzərni ni. Antə mdə psu mwaɓi ni ka naɓiyir thlandər ni tsu ka mpika akwa mandar u'u na akwa mba ka u'u mwapu na ana shiwur ni.

²¹Antə mdə kurəmta mambila ɗa ka katsakar na səɓəla akwa mnya mdə na ata taku mwapu ni. Antə shanga ɗikayeri ni ku səm ka səm kumər dza ɗa ni ka mzhi ɗa apa da abara kəra wa.