Read bura-pabir Aka Yahwana 2 Bible Online

Aka Yahwana 2 - bura-pabir bible

Aka Yahwana 2

¹“Ka gə rəbuta aka mdərthlentərhyel ar ikələziya na ahar Afisa ni abbər, ‘Nggədza ndər na thlata akəla mdə na ka sasəlkayeri murfa akwa tsi mazəmari ni, tsa na ana mwa akwa daɓwa pitəlayeri ar dinar na murfə tə mdə pwi ni.

²“I asəndə shanga suayeri tə ga ana hara. I ku wutə jili ghər tə ga akwa, ka suayeri tə gə nggitə ka mbwi ɗəffa ga ata kər. Tsuwa I ku sənda abbər ga aɗi ana mzhi mbwi ɗəffa ga ata kəra mji na ɗimi wa. Ga ku ngkərtə mji na pəla abbər da aposəlayeri amma aɗi jiri wa ni, ka nggaɓəla abbər da mjir thlandər.

³I ku sənda abbər gə ka mbwiɗəffu, tsuwa ga akwa nggitə bwani kamnyar na, tsuwa ga aɗi akwa ghər wa.

⁴Amma nggədza su pal tə I wuta adzə nga, ga aɗi akwa hir ra wala hir mji kulini apatə ga ana hara akwa baɗitari nə wa.

⁵Ka gə ɗangtə laku tə gə ndla akwa ni bu, ka gə tubi. Ka gə hara kəthlərayeri natə gə hara akwa baɗitari nda. Ma ga aɗi tubi wa, I ata si adzə nga, kəi kələmta pitəlar nga kazhar vəi ndzəndziyirni.

⁶Amma akwa bwa ngəni kam ga ku hara kalkal. Kamnyar ga ku nggəlar surharar mjir Nikolata tsu apatə I nggəlari ni.

⁷Mdə na ka thləmər nggatə su, ka tsa nggatə su tə Mambəl akwa pəlari aka ikələziyayeri. Mdə na ku səma, I ata hir alari ka tsa səm yar nfur mpikə na akwa vəi ndzəndzi na msəra ar mji na kula biku adzə Hyel ni.” ’ ”

⁸“Ka gə rəbuta aka mdərthlentərhyel ar ikələziya na ahar Simirna ni abbər, ‘Nggədza ndər na thlata akəla mdə na aɗi akwa baɗitari ka tsi kərari, mdə na ku mti amma tsa ka mpika ka damwa ni.

⁹“I asəndə bwaniyari ka ngguɗikur tə ga akwa, amma gə ka gəna! I asəndə mnya ɗimi tə mji akwa harari ata kəra gə ni, mji na akwa thlandər abbər da mjir Hyel, amma aɗi jiri wa ni, kamnyar da mjir Shatan.

¹⁰Ga aɗiya thlivər bwani tə ga ata sə ɗarari nə wa. Kamnyar nggədza mdə na ɗimi ni ata vu ka mdə hambwa bwadukwa giri akwa pərsəna, kamnyar ka mdə ngkərtə giri. Antə giri ata hara vir kuma akwa bwani ni. Ka giri ndzi ka jirkur ali, wala ma mda an ata tsi giri, antə I ata sə na giri dzakwar kuthlikur na ar mpika.

¹¹Mdə na ka thləmər nggatə su, ka tsa nggatə su tə Mambəl akwa pəlari aka ikələziyayeri. Mdə na ku səma, mtə na suɗkur ni aɗi ata si ata kərari wa.” ’ ”

¹²“Ka gə rəbuta aka mdərthlentərhyel ar ikələziya na ahar Pirgamum ni abbər, ‘Ndər ngəni thlata akəla mdə na ka katsakar ka mnyari japu suɗa akwa səma.

¹³“I asəndə vəi tə ga andzəndzi akwa ni. Ngənda an vəi tə Shatan akwa hara kuthlikurərni ni. Wala apani ga ku kəsi ra ka jirkur, ga aɗi kampikər hamta jirər nga ali wa, wala akwa sakatə mdə tsi Antibas na seɗarna, akwa nca giri akwa di Shatan ni.

¹⁴Amma I ka suayeri laga yiɗauwa tə I nggəlar adzə nga. Ga ku zhar mji laga akwa nca giri na ana nu thlipər Balaam, mdə na thlipa aka Balak ka tsa vu mjir Israila akwa hara biku, tə da səm susəm tə mdə hamta aka haptayeri, ka hara karwakur.

¹⁵Tsuwa gə ka mji laga na ana nu thlipər mjir Nikolata ni.

¹⁶Antə tar ka gə tubi. Ma apani wa, I ata si adzə nga taktar, kəi mpa ɗa ka katsakar na ata səɓəla akwa mnyi.

¹⁷Mdə na ka thləmər nggatə su, ka tsa nggatə su tə Mambəl akwa pəlari aka ikələziyayeri. Mdə na ku səma, I ata na alari manna na ɗuwarɗuwari, kəi na alari pela mwapu, ka thləm na bilən rəbutə rəbutari ata pela ni, natə mda aɗi na asəndə wa tar mdə na ata dlu pela ni. ” ’ ”

¹⁸“Ka gə rəbuta aka mdərthlentərhyel ar ikələziya na ahar Thliyatəra, “Ngəni an ndər na thlata akəla Ɓzər Hyel, na ka ncari apa kyanggyara u'u, ka səlari akwa mbəlmbəla apa əmza tə mdə ku nggiləmta.

¹⁹I asəndə shanga su tə ga ana hara. I ku wutə hirkur tə gə kəgari, ka hamta jirər nga, ka kəthlərər nga, ka mbwiɗəffər nga. Tsuwa I asənda abbər ga akwa hara kəthlər təramta natə gə hara akwa baɗitari ni.

²⁰Amma nggədza su tə I nggəlar adzə nga, ga akwa kətadzə mwala ngəni Yezebel ni, mwala na namtə kərari apa naɓi ar Hyel ni. Har tsa akwa thlipə suayeri na akwa shamta mjirna abbər ka da hara karwakur, tsuwa ka da səm susəm natə mdə ku hamta aka haptayeri.

²¹I ku nar saka abbər ka tsa tubi ata kəra halər karwakur ni, amma tsa aɗi hir wa.

²²Antə apani I ata peri ni ka nggawakur na mwavər, kəi vu ka shanga mji na ləkə ni ni ləkwa bwani na mwavər, har tar ma da ku tubi ata kəra ɗimikur tə da ana hara ka tsa ni.

²³Tsuwa I ata tsəgəi mji na akwa nu surhararni ni. Antə shanga ikələziyayeri ni ata sənda abbər I an mdə na ana wutə su na akwa hangkala mda kəga ɗəffa mda. Tsuwa I ata hamta aka kəlara mda akwa nca giri watsəɓa na kalkal ka kəthlərərni.

²⁴“Amma aka bwadukwa giri na ahar Thliyatəra, na aɗi nu surthlipə ngəni na ɗimi nə wa, giri aɗi thliptə su tə mji laga ana pəla ‘ashir na zurang ar Shatan' nə wa, ar giri, I aɗi ata vəngkər ala giri kəl damwa wa.

²⁵Amma ka giri kəsi hamta jirər giri ɓəɓal tar ma I ku jaktə ngka.

²⁶Shanga mji na ku səma, ka ləkəma ka kəthlərərna har ka vədza aka kurari, I ata sə hamta ala ɗa dunar kuthlikur ata kəra mji.

²⁷“Da ata hara kuthlikur ata kəra mji ka zwalər liya ka da pukthləmta ɗa apa tughum həi.”

²⁸“Tsu apatə I ku dlu dunar kuthlikur akəla Təddarna, antə I akwa na ɗa dunar kuthlikur ni. Tsuwa I ata hamta ala ɗa sasəlka dzardzar.

²⁹“Mdə na ka thləmər nggatə su, ka tsa nggatə su tə Mambəl akwa pəlari aka ikələziyayeri!”